Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Welini Kuli Yeova

 CIPUTULWA 4

Kuyuvwa Uwa Mulandu—“Mfumizyini Impulupulu Zyane Zyonsi Pyu”

Kuyuvwa Uwa Mulandu—“Mfumizyini Impulupulu Zyane Zyonsi Pyu”

Ya Martha yasimike yati: “Incito ino natandike ukuomba yalenzile ukuti ulupwa lwitu lwaikala ningo, lelo yalenzile nu kuti inje ni vicitwa ivisizanzya Leza. Natandike ukuzevya manda ya mwikalwe, nu kuyika umu vikanza vya muno nsi, nupya natandike nu kuzanwa sile nu ku calici cuze. Paapisile imyaka 40 ala nata ukulongana nu kusimikila. Myaka yonsi kwene yii iyapisilepo, nelenganyanga sile ukuti nemo caasila Yeova atalatala anjelele. Lyonsi nayuvwanga ukuti nene wasilesile pali vino nacisile.  Pano namanyile mpiti icumi lino ntatala natandika ukucita iviipe.”

UKUYUVWA uwa mulandu kungaya i cisendo icinyome sana. Umwene Davidi walemvile ati: “Uyi wane wati unduta. Vyati vintotomezya pansi pa mulandu wa kunyoma kwa viko.” (Masamu 38:4) Aina Klistu yamwi yakasakamala sana nu kuya sile nu ulanda lyonsi, ala yakwelenganya ukuti Yeova atalatala ayelele. (2 Kolinto 2:7) Uzye ukwelenganya kuko kwaya sile ningo? Uzye kwene nanti mwacisile uluyembu ulwipisye uli, Yeova wamutaluka icakuti atanga amwelele? Awe, atamutaluka foo!

“Lekini Tuvwane Lyene”

Yeova asitazyela ya kacita ya viipe ndi cakuti yalapila. Wene akapalama kuli aliyo! Mu mulumbe uno Yesu walanzile pa mwana uwapondwike, wakolinye Yeova ku muvyazi umwi uwaya nu kutemwa. Umwana wa muvyazi kwene wii wapingwilepo ukufuma pa ng’anda aya atandika ukwikala imikalile yaula ukulondoloka kuno waile. Lino paapisile insita, umwana wii wapingwilepo ukuwela uku ng’anda. Lyene “lino acili ukutali kufuma ku mwao, isi amulola; aya na mizu mu mwenzo wakwe. Alino asimula amukukula nu kumutonsola.” (Luka 15:11-20) Uzye namwe lino mukulonda ukupalama kuli Yeova, mukaelenganya ukuti mucili “ukutali” na aliwe? Vivikwene vino umuvyazi wino Yesu walanzilepo umu cilangililo wali na mizu, avino na Yeova akamuvwila sana uluse namwe kwene. Akaalondesya ukuti muwele kuli aliwe.

Nomba mungacita uli ndi cakuti mukulola ukuti Yeova atanga amwelele pano maifyo inu a ipisye nupya yavulisya? Tale elenganyini pa mazwi yano Yeova akatunena aya pali Ezaya 1:18, aakuti: “Lekini tuvwane lyene. Amaifyo inu nanti yangayenza cee, nemo namayafula nga nayo yamaswepa mpe wakwe pamba.” I cacumi, nanti i cakuti maifyo itu yangaloleka kwati u wazi uwati-witikila ku cakuzwala citiswe, yatanga yalenge Yeova afilwe ukutwelela.

Yeova asilonda ukuti kampingu winu atwalilile ukumucuzya pali vino mwacisile. Uzye lyene mungacita uli pakuti Leza amwelele muye ni nsansa na kampingu musanguluke? Lekini tulande pa vintu viili vino Umwene Davidi wacisile. Cakutandikilapo walanzile ukuti: “Kanje kuli Yeova nkailongwele amaifyo yane.” (Masamu 32:5) Mwaiusya ukuti Yeova wamunena mpiti kuti mwapepa kuli aliwe nu kuti ‘muvwane’ nawe. Fwandi mwacita vivyo kwene vino wamunena. Mwanena Yeova maifyo inu nupya mwamunena na vino mukuyuvwa. Davidi wanenyile Yeova pali vyonsi ivyamucitikiile, wapefile ukuti: “Mfumizyini impulupulu zyane zyonsi pyu. . . . Usisuula umwenzo uwakutontelela mu kuzenzuka.”—Masamu 51:2, 17.

Cakwe ciili, Davidi wapokelile uwazwilizyo ukufuma kuli Natani kasesema wakwe Leza. (2 Samweli 12:13) Na ndakai kwene, Yeova watupeela ya eluda umu vilongano aamanya ningo ivya kwazwa ya kacita ya viipe aakalapila pakuti yatwalilile ukuya ya cuza yakwe Yeova. Ndi mwanena ya eluda vino mukuyuvwa, yalaomvya Malembelo pa kumwavwa, nupya yalamupepelako ni pepo ililamukomelezya, yalalenga ukuti mutauvwa uyi pali vino mwacisile, nupya yalamwavwa ukutwalilila ukuya cuza wakwe Leza.—Yakobo 5:14-16.

Yeova akaalondesya ukuti namwe kwene muye na kampingu musanguluke

“Wasyuka Umuntu Wiyo Wino Amaifyo Yakwe Yafumiziwa”

I cacumi, limwi mungauvwa umu mwenzo ukuti i citale sana ukunena Yeova Leza na ya eluda pa maifyo inu. Davidi nawe kwene ali vino uvwanga vivyo kwene. Nawe kwene pa nsita ntali ‘wakutumalanga’ pa mulandu na maifyo yakwe ukwaula kunena aliwensi. (Masamu 32:3) Lelo, pacisila wizile auvwa ningo sana lino wanenyile Leza nu kulapila pa maifyo yano wacisile.

Lyene ni calusilepo ukuzipa i cakuti Davidi wizile aya nu luzango wakwe cimwi. Walemvile ukuti: “Wasyuka umuntu wiyo wino amaifyo yakwe yafumiziwa, wino inkota zyakwe zyelelwa.” (Masamu 32:1) Nupya wapefile nu kuti: “We Mwene, sapula imilomo yane, na kanwa kane kamatakolanga umucinzi wako.” (Masamu 51:15) Insansa zino Davidi wakweti lino Leza wamwelela, zyalenzile ukuti aanenako antu yauze pali Yeova.

Yeova akaalondesya ukuti namwe kwene muye na kampingu musanguluke. Nupya asilonda ukuti mwayuvwa a mulandu, lelo akaalondesya kuti mwaya ni nsansa lino mukunenako yauze pali aliwe, alino na vino alacitila antu uku nkoleelo. (Masamu 65:1-4) Mwaiusya vino wamunena ukuti, “zenzukini nu kuswilila kuli Leza pakuti nawe amwelele amaifyo inu.”—Milimo 3:19.

Vikwene i vyacitikile na ya Martha. Yasimike iyati: “Umwanane umonsi wantumilanga ya magazini ya Lupungu Lwa Mulinzi na Loleni!. Natandike ukupalama kuli Yeova panono-panono. Icantalile sana pa kuwela kuli Yeova u kulenga uwelelo pa maifyo yonsi yano nacisile. Lelo nasusile napepa kuli Leza nu kumulenga ukuti anjelele. Mungazunguka sana ukuvwa ukuti paapisile imyaka 40 pakuti imbwele kuli Yeova. Ivyancitikile, uusininkizyo wakuti nanti imyaka iingi ingapita, umuntu angawela kuli Leza nu kutandika ukumuombela.”