Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Mungaya ni Nsansa pa Ng’anda

 CIPUTULWA 5

Vino Mungatwalilila Ukuvwana na Yalupwa

Vino Mungatwalilila Ukuvwana na Yalupwa

“Mulinzile kuya na . . . mizu, aicefya, afuke, nupya antu akateeka myenzo.”—Kolose 3:12

Antu ndi yatwalana, ala yapanga ulupwa ulupya. Nanti cakuti lyonsi mulaatemwa nu kucindika avyazi inu, uwinu ali wino akaaya umuntu umucindamisye ukuluta antu yonsi aaya pano nsi. Cii cingatalila sana yamwi pali yalupwa inu ukuzumila ukuti avino cifwile ukuya. Nomba, Baibo ingamwazwa ukuti mwomba ningo, pakuti mutwalilile ukuvwana na yalupwa inu lino mukuombesya na maka ukuti mukuule ulupwa lwinu ulupya.

 1 TWALILILINI UKUCINDIKA YALUPWA INU

BAIBO IKATI: “Cindika so na nyoko.” (Efeso 6:2) Nanti mukule uli, mulinzile ukucindika avyazi inu lyonsi sile. Mulinzile ukwiusya ukuti yawinu nayo kwene yakwata avyazi, nupya yafwile ukusumbako sana mano uku yavyazi yaayo. “Kutemwa kutakwata uzuwa,” fwandi mutafwile ukuvwa uyi pali vino yawinu yakauvwana na avyazi yao.—1 Kolinto 13:4; Galatiya 5:26.

VINO MUNGACITA AEVI:

  • Mutaaomvya amazwi wakwe yaa akuti “Ya lupwa yako lyonsi yasincindika” nanti “Ya mayo yako yasitaizya pali vyonsi vino nkayacitila”

  • Mwalola ivintu ukulingana na vino yawinu yakwelenganya

 2 PANO CALINGA MWALANDA VINO IVINTU VILINZILE UKUYA

BAIBO IKATI: “Umonsi akasya isi na nyina nu kuilundanya uku muci wakwe.” (Utandiko 2:24) Lino mwingila umu cupo, limwi avyazi inu yangaelenganya ukuti yacili yakweti amaka pali mwemwe, nupya yangaalonda ukuti yaamuneena ivyakucita ukuluta umu cipimo.

Cili kuli mweineco vino munguvwana na yawinu pali vino mufwile ukumanyiisya avyazi yinu ukuti yataacita, kwaula kuyasosya. Mungalanzyanya nayo ningo ukwaula umusaalula nanti ukuyapita umumbali. (Mapinda 15:1) Ukuicefya, ukufuka, nu kuteeka umwenzo i vilaleenga ukuti mwauvwana sana na yalupwa inu nu kutwalilila ‘ukulanga ukutemwa.’—Efeso 4:2.

VINO MUNGACITA AEVI:

  • Ndi cakuti pali vimwi ivikamusakamika sana pali vino ya lupwa yakacita umu cupo cinu, mulinzile ukulanzyanya na yawinu lino mwensi mutesile imyenzo

  • Mufwile ukuzumilizyanya pali vino muli nu kucita