Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Mwasambilizya Ana Inu

 ISAMBILILO 10

Yesu Wali Uwa Cuvwila Lyonsi

Yesu Wali Uwa Cuvwila Lyonsi

Uzye cangupala ukuvwila avyazi yako lyonsi?— Kwene insita zimwi cikatala. Uzye wamanya ukuti Yesu wali uwa cuvwila kuli Yeova alino nu ku yavyazi yakwe?— Ndi wamukolanya, cilakwazwa naawe kwene ukuuvwila avyazi, nanti i cakuti cisi cangupale. Leka tusambilile apilyasi lii.

Lino Yesu ataatala wiza pano nsi, wali ukwiyulu pamwi na Isi, Yeova. Lelo na pano nsi kwene Yesu wakweti avyazi. Amaziina ya yavyazi yaayo a Yosefu na Maliya. Uzye wamanya vino cali pakuti Yosefu na Maliya iize yaye avyazi yakwe Yesu?—

Yeova wakuusiizye umi wakwe Yesu umu ndilwa yakwe Maliya pakuti Yesu ace avyalwe nu kutandika ukwikala pano nsi. Icintu cii cali i cizungusyo! Yesu wakulanga umu ndilwa yakwe Maliya wakwe vino ana yauze yakakula umu ndilwa yakwe yanyina. Lino paapisile imyezi 9, Yesu waviilwe. Fwandi vikwene ali vino Maliya na iya, Yosefu, izile yaya avyazi yakwe Yesu pano nsi.

Lino Yesu waali ni myaka iya kuvyalwa 12 sile, wacisile icintu cimwi icalangiizye vino watemilwe Isi wa kwiyulu, Yeova. Cii cacitiike lino Yesu pamwi na yalupwa yaapisile ulwendo ulutali ulwa ku Yelusalemu ku kuzevya Ucilo. Lyene lino yaawelanga ukufuma uku Yelusalemu, Yosefu na Maliya yaaweni ukuti Yesu ataali nayo. Uzye watuumanya kuno Yesu wasiile?—

U mulandu ci uno Yesu waeliile apa ng’anda ya kupepelamo Yeova?

Yosefu na Maliya yaaswilile uku Yelusalemu uku kulonda Yesu. Lino yalonzile iyafilwa ukumuzana, yaali sana nu ulanda. Lelo lino paapisile amanda yatatu, iizile iyamuzana umu ng’anda ya kupepelamo Yeova! Uzye umanyile umulandu uno Yesu wayeelile apa ng’anda ya kupepelamo Yeova?— Umulandu u wa kuti muumu amuno wali nu kusambilila pali Isi, Yeova. Watemilwe Yeova nupya walondanga ukusambilila vino angacita pakuti aazanzya Yeova. Nanti sile lino wakuzile aya uwikolo, lyonsi kwene Yesu wali ni cuvwila kuli Yeova. Yesu wali uwa cuvwila kuli Yeova, nanti icakuti limwi-limwi catalaanga ukucita vivyo. Uzye Yosefu na Maliya nayo kwene Yesu wayuvwilanga?— Ee, Baibo ikati wayuvwilanga.

I vyani vino ungasambilila kuli Yesu?— Ulinzile ukuvwila avyazi yako, nanti lino citangupiile ukucita vivyo. Uzye ulaacita vivyo?—

WELENGA MULI BAIBO

  • Luka 1:30-35; 2:45-52

  • Efeso 6:1

  • Ayebulai 5:8