Skip to content

Muye pa utantiko wa vilimo

 ISAMBILILO 11

Yaalemvile Ilyasi Pali Yesu

Yaalemvile Ilyasi Pali Yesu

Uzye watuulola aonsi aali apa cikope?— Pali Mateo, Mako, Luka, Yoane, Petulo, Yakobo, Yuda na Paulo. Aonsi yaa yaaliko lino Yesu wali pano nsi, nupya yaalemvile ivingi pali Yesu. Leka tusambilile ivingi pa onsi yaa.

Uzye i vyani vino wamanyapo apa onsi yaa?

Pa onsi kwene yaa, pali yatatu aali atumwa aasimikilanga pamwi na Yesu. Uzye watuyamanya amazina?— Amazina yao aeya: Mateo, Yoane, na Petulo. Mateo na Yoane yaamanyile sana Yesu, nupya cila-muntu walemvile  ibuku ilikaalanda pali Yesu. Mutumwa Yoane walemvile ni buku lyakuti Umbwilo alino na ya kalata yatatu aaka-amwa ukuti 1 Yoane, 2 Yoane na 3 Yoane. Mutumwa Petulo walemvile ya kalata yaili aaya muli Baibo aaka-amwa ukuti 1 Petulo na 2 Petulo. Muli kalata wakwe ciili, Petulo walemvilemo na vino Yeova wavwanzile ukufuma ukwiyulu ukulanda pali Yesu ati: ‘Wii u mwanane. Namutemwa cuze, kapya akanzanzya cuze.’

Aonsi yauze yano ukulola pa cikope nayo kwene yakatusambilizya pali Yesu lino tukuwelenga amabuku yano yaalemvile aaya muli Baibo. Umwi pali yaa a Mako. Mako afwile akuno wali lino yaalemile Yesu, nupya waweni vyonsi ivyacitikiile Yesu. Alino muze nawe a Luka. Luka wali a dokota, nupya afwile wizile aya umwina Klistu ala Yesu wafwa.

Yauze yaili aalemvileko Baibo aali apa cikope, yaali aato yakwe Yesu. Uzye watuyamanya amazina?— Umwi wali a Yakobo muze nawe wali a Yuda. Pa kutandika, yataataile Yesu. Yatandike nu kwelenganya ukuti manye Yesu wavulungiine. Lelo lino paapisile insita, iizile iyataaila Yesu nu kuya Aina Klistu.

Lyene muze uwalemvileko Baibo wino ali apa cikope a Paulo. Lino ataatala waaya Umwina Klistu, yaamwamanga yakuti Saulo. Wapasile sana Aina Klistu nupya ataayakwatiile nu uluse. Uzye wamanya icalenzile ukuti Paulo aize aye umwina Klistu?— Uwanda umwi, lino Paulo wali apa lwendo, uvwile umwi akumuvwanzya ukufuma ukwiyulu. Uwamuvwanzizye wali a Yesu! Yesu uzizye Paulo ati: ‘Ngu mulandu ci uno ukuzunyizya antu yano yantaila?’ Kufuma paapo, Paulo wasenwike aya Umwina Klistu. Paulo walemvile amabuku amuli Baibo aali 14, kutandika pali Loma ukufika uku Ayebulai.

Tukawelenga Baibo cila-wanda, asi avivyo?— Lino tukuwelenga Baibo, tukasambilila ivintu ivingi sana pali Yesu. Uzye ungatemwa ukusambilila ivingi pali Yesu?—

WELENGA MULI BAIBO

  • 2 Petulo 1:16-18

  • Mako 3:21; 14:51

  • Yuda 1

  • Milimo 9:1-18