Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Mwasambilizya Ana Inu

 ISAMBILILO 5

Samueli Wacitanga Ivisuma Lyonsi

Samueli Wacitanga Ivisuma Lyonsi

Samueli watandike ukwikala api tenti lyakwe Leza nu kuombela papa kwene ala acili umwance sana, nupya api tenti kwene lilyo apano antu iizanga uku kupepa Yeova. Uzye umanyile vino caali pakuti Samueli atandike ukwikala apitenti lya kupepelapo? Leka tutale tusambilile pali nyina wakwe Samueli, Hana.

Pa myaka iingi, Hana walondesyanga ukukwata umwana, nomba ataakweti nanti a wenga. Fwandi wapefile kuli Yeova nu kupaapata ukuti amwavwe. Walavile Yeova ukuti ndi waca wakwata umwana umonsi, alamutwala akaikala apitenti lya kupepelapo nu kuombela papakwene. Yeova waswike ipepo lyakwe Hana, cakuti Hana wizile akwata nu mwana umonsi. Wamutemiile izina lyakuti Samueli. Vivikwene vino Hana walavile, avino wizile acita; lino Samueli wali ni myaka ya kuvyalwa pakasi kakwe itatu na ini (4), wamutwazile apitenti lya kupepelapo kuti apano akaikala nu kuombela Leza.

Pa nsita iiya, Eli u wali simapepo mukalamba apitenti lya kupepelamo. Na ana yakwe aonsi yaili yaombelenga papakwene. Iusya ukuti itenti lyali ali ng’anda yakwe Leza iya kupepelamo, acino antu paapa yalondekwanga ukucita ivisuma. Lelo ya mwana Eli aonsi yene yacitanga sana iviipe. Samueli waweni vino yacitanga. Uzye Samueli nawe wacitangako iviipe wakwe vino yamwana Eli yaacitanga?— Awe foo, wene wacitanga ivisuma vitupu, ndi vino avyazi yakwe yaamusambilizye.

Uzye vwile i vyani vino Eli walondekwanga ukucita apa yana yakwe yaaya yaili?— Walondekwanga ukuyazinga. Ataalinzile ukuyaleka sile yatwalilile ukuombela apa ng’anda yakwe Leza. Nomba Eli wene wasuuzileko sile, acino Yeova nawe wamusokiile pamwi na ana yakwe yoili. Yeova wapingwilepo ukufulula aonsi kwene yaaya.

Samueli wanenyile Eli amazwi aafumile kuli Yeova

Uwanda umwi usiku ala Samueli watalaala, uvwile izwi lyakwe umwi lyamwama likuti: ‘Samueli!’ Avino wakatwike asimula aya kuli Eli, nawe Eli walanzile  ati: ‘Awe nemo ntakwamilepo.’ Cintu cii cacitiike amaila yatatu. Lino icintu cii cacitiike iila lyakwe citatu, alino Eli wanenyile Samueli ukuti ndi uvwa nupya izwi lyamwama, aasuke ati: ‘Yeova vwanga, aneene nkuvwa.’ Viivi kwene ali vino Samueli wacisile. Lyene Yeova wanenyile Samueli ati: ‘Uneene Eli ukuti indi nu kufulula ulupwa lwakwe pa mulandu ni vicitwa vyao iviipe.’ Uzye vwile cali icangupale kuli Samueli ukuyafisya amazwi yaaya kuli Eli?— Awe, citangupiile nanti panoono. Lelo nanti icakuti Samueli watiinanga, wacisile vino Yeova wamunenyile ukucita. Vino Yeova walanzile i vyacitiike. Ya mwana Eli aonsi yoili yaakomilwe, na Eli kwene waafwile.

Tulinzile ukukolanya Samueli. Wene wacitanga ivisuma nanti cakuti walolanga antu yamwi yakucita ivintu iviipe. Nga wemo? Uzye ulaakolanya Samweli nu kutwalilila ukucita ivintu ivisuma? Nga ali vino ulacita, ulazanzya Yeova na avyazi yako.

WELENGA MULI BAIBO

  • 1 Samueli 2:22-26; 3:1-21