Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Mwasambilizya Ana Inu

 ISAMBILILO 2

Labeka Walondanga Ukuzanzya Yeova

Labeka Walondanga Ukuzanzya Yeova

Labeka wali u mwanaci uwatemilwe Yeova. Iya wakwe Labeka wali a Isaki. Nawe kwene Isaki watemilwe Yeova. Uzye cali uli pakuti Labeka yamanyane na Isaki? Ngi vyani vino Labeka wacisile pakuti alangizye ukuti walondanga ukuzanzya Yeova? Leka tusambilile ivingi pali Labeka.

Avyazi yakwe Isaki yaali a Abulaamu na Sala. Yonsi kwene iikalanga umu mpanga ya Kenani, muno mwali antu aatapepanga Yeova. Lelo Abulaamu wene walondanga ukuti umwana wakwe ace atwale umwanaci uwapepanga Yeova. Fwandi watumile umuomvi wakwe; muomvi wiyo afwile wali a Elieza; wamutumile ukuya uku mpanga ino yaatangi Halani kuti akuno akalondele Isaki umuci. Kuuku kwene u kwikalanga yalupwa yakwe Abulaamu.

Labeka wazumiile ukuomba umulimo ukome uwa kusembela ingamila amanzi

Avino Elieza watandike ulwendo pamwi na aomvi yauze yakwe Abulaamu. Lwali u lwendo ulutali sana. Yaali ni ingamila 10 zino yaasendiilepo ivyakulya alino na mawila. Uzye Elieza wacisile uli pakuti amanye umwanaci wakusoolwela Isaki? Lino Elieza na aomvi yauze yaafisile uku Halani, yaile iimilila pa cifula, pano Elieza wamanyile ukuti antu yaali nu kwiza uku kusemba amanzi. Fwandi wapefile kuli Yeova ati: ‘Ndi cakuti niza nalenga umwanaci amanzi alino wazumila nupya wasembela ni ngamila zyamwa, lyene namaiza imanye ukuti ali mwanaci wino usoolwile.’

 Lyene, avino nu mukazyana Labeka wizile uku cifula. Baibo ikalanda ukuti wali umwanaci umuyembe sana. Elieza wamulenzile amanzi akumwa, nawe walanzile ati: ‘Cili sile ningo. Namakusembela amanzi akuti umwe, nupya namasembela ni ngamila kwene zimwe.’ Tala elenganya! Ingamila zikamwa amanzi aingi cuze, fwandi Labeka wakweti umulimo ukome uwa kusemba amanzi. Uzye watumulola Labeka apa cikope vino akuombesya?— Elieza wazungwike vino Yeova waswike ipepo lyakwe.

Elieza wapeezile Labeka mawila aingi sana. Lyene Labeka wasenzile Elieza na aomvi yauze uku ng’anda ukumwao. Elieza walondolwile cino Abulaamu wamutumiile kuuku na vino Yeova waswike ipepo lino wapefile. Ulupwa lwakwe Labeka lwatemilwe, nu kuzumila ukuti Labeka angatwalwa kuli Isaki.

Labeka wakonsile Elieza uku Kenani, nu kuyatwalwa kuli Isaki

Uzye vwile Labeka walondanga ukutwalwa kuli Isaki?— Labeka wamanyile ukuti uwatumile Elieza ukuya kuuku wali a Yeova. Fwandi, lino yalupwa yakwe Labeka yaamuzizye ndi cakuti akulonda ukulondela uku Kenani nu kuya twalwa kuli Isaki, walanzile ati: ‘Ee, nkulonda ndondele.’ Avino nu kupita wapisile alondela Elieza. Lino yaafisile uku Kenani, waile atwalwa kuli Isaki.

Yeova wapoleliile Labeka, pa mulandu wakuti viivi kwene vino Labeka wacisile, avino Yeova walondanga. Lino paapisile imyaka iingi, umu luko lwakwe Labeka u mwizile imuvyalilwa Yesu! Ndi cakuti ukukolanya Labeka nu kuzanzya Yeova, naawe kwene alakupolelela.

WELENGA MULI BAIBO

  • Utandiko 12:4, 5; 24:1-58, 67