Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Mwasambilizya Ana Inu

 ISAMBILILO 3

Laabu Wataaile Yeova

Laabu Wataaile Yeova

Leka tucite ngati tuli umu musumba wa Yeliko. Umusumba uu, waeliile umu mpanga ya Kenani, umwali antu aatapepanga Yeova. Umu musumba kwene uu, u mwikalanga umwanaci uwiziina lyakuti Laabu.

Lino Laabu wali umwance, uvwanga amalyasi alandwanga pali vino Mose watungulwile Aina Izlaeli ukufuma umu Eguputo na vino walekiinye amanzi pali Yemba Muyenzu. Uvwile na vino Yeova wavwilizye antu yakwe ukucimvya alwani yao yonsi aayalwisyanga. Lyene pa nsita ii, Laabu uvwile ukuti Aina Izlaeli yaali apiipi nu musumba wa Yeliko!

Laabu wacingiliile inengu pano wataaile Yeova

Uwanda umwi amanguzi, aonsi yaili aina Izlaeli yaaile uku kulengula umusumba wa Yeliko. Yaaile uku ng’anda yakwe Laabu. Laabu wayapokeliile nu kuingizya umu ng’anda. Lino kwafiisile, umwene wa Yeliko uvwile ukuti kwati-kwiza inengu nu kuti zili umu ng’anda yakwe Laabu. Lyene umwene watumile aonsi ukuti yakayaleme nu kuyaleeta kuli aaliwe. Laabu wafisile inengu zizyo apipaala lya ng’anda yakwe nu kuneena aonsi yano umwene watumile ati: ‘Inengu zyali-ziiza, nomba zyati-zipita. Ndi cakuti mwazikonka likwene, mungazizana!’ Uzye watuumanya icalenzile ukuti Laabu acingilile inengu?— Pano wataaile Yeova nupya wamanyile ukuti Yeova wali nu kupeela impanga ya Kenani uku Ina Izlaeli.

Lino inengu zitaatala zyafuma umu ng’anda yakwe Laabu, zyasiile zyamulaya ukuti lino umusumba wa Yeliko ulonoonwa, Laabu na yalupwa yakwe yaali nu kwiza-cingililwa. Uzye watuumanya vino inengu zyaneenyile Laabu ukucita?— Zyamuneenyile ziti: ‘Toola umwando uu uyenzu, uunyepelele apiwindo lya ng’anda yako. Ndi wacita vivyo, yonsi aalaya umu ng’anda yako yalacingililwa lino umusumba ulonoonwa.’ Laabu wacisile viivi kwene vino inengu zyamuneenyile. Uzye watuumanya ivyacitiike ukufuma paapo?—

Yeova wapuswisye Laabu na yalupwa yakwe

Lino paapisile sile manda anono, Aina Izlaeli yaatandike ukuzinguluka umusumba wa Yeliko ala yali mya. Pa manda 6, yaazingulukanga umusumba umuku onga cila-wanda. Nomba pa wanda walenga 7, yaazingulwike umusumba imiku 7. Lyene yonsi kwene yaapunzile sana. Yeova waleenzile  iviumba ivyazingulwike umusumba ukuwa. Nomba ing’anda iyakweti umwando uyenzu apiwindo yene itaawile! Uzye watuulola ing’anda iiyo apa cikope?— Laabu nu lupwa lwakwe yaapuswike!

Uzye i cani cino ungasambilila kuli Laabu?— Laabu wataaile Yeova pa mulandu wa vizungusyo vino wasambiliile pali aaliwe. Naawe kwene ukusambilila ivintu ivingi ivisuma sana pali Yeova. Uzye naawe wataaila Yeova wakwe vino Laabu wacisile?— Ee, naawe kwene wataaila!

WELENGA MULI BAIBO

  • Yoswa 2:1-24; 6:1-5, 14, 15, 20-25

  • Ayebulai 11:31