Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Uzye Baibo Ikatusambilizya Vyani?

 CIPANDE 15

Inzila Yampomvu Iya Kupepelamo Leza

Inzila Yampomvu Iya Kupepelamo Leza

1. A weni aalinzile ukutuneena inzila yampomvu iya kupepelamo Leza?

IMIPEPELE iingi ikailola ukuti ikasambilizya icumi pali Leza. Lelo tutanga tuti imipepele iyo i yacumi, pano vino ikasambilizya vyapusana sana na vino Leza waya alino ni nzila ino akalonda kuti twamupepelamo. Tungacita uli pakuti tumanye inzila ya mpomvu iya kupepelamo Leza? Yeova sile aangatunena vino tufwile ukumupepa.

2. Mungacita uli pakuti mumanye inzila yampomvu iya kupepelamo Leza?

2 Yeova watupeela Baibo pakuti tumanye inzila iyampomvu iya kumupepelamo. Fwandi mwawelenga Baibo, napya Yeova alamwazwa kuti mumanye ivingi pali aliwe pano akamusakamala sana.—Ezaya 48:17.

3. I cani cino Leza akalonda ukuti twacita?

3 Antu aingi yakati imipepele yonsi kwene ikazanzya Leza, nomba vivyo asi ali vino Yesu watusambilizye. Walanzile ati: “Asi muntu wensi aakangama ati, ‘Mwene, Mwene’ alingila mu Wene wa mwiyulu, suka sile yao akacita kulonda kwakwe Tata uwa mwiyulu.” Fwandi, icicindama ukusambilila vino Leza akalonda, nu kulacita vivyo kwene. Tulinzile ukwikako sana mano, pano Yesu wakolinye yayo asiuvwila Leza kuli uku vipondo, kulikuti “ya kacita ya viipe.”—Mateo 7:21-23.

4. I vyani vino Yesu watiile i vilacitika ndi tukulonda ukucita ukulonda kwakwe Leza?

4 Yesu watucelwile ukuti lino tukulonda ukucita vino Leza akalonda, ivintu vimwi vilaatutalila. Watiile: “Ingilini  pa mpongolo ifyenkane, pano mpongolo ya kwingilila ku ononesi iisalale. Nu museo wa kuilamo uusalale, nga na antu aingi yakaingila nu kupitamo. Lelo mpongolo ya kwingilila ku umi iifyenkane. Nu museo wakuilamo wene watala kulondela, cakuti antu akauzana anono sile.” (Mateo 7:13, 14) Museo ufyenkane, nanti inzila yampomvu iya kupepelamo Leza ikatungulula uku umi. Lelo umuseo usalale, nanti inzila isi yampomvu iya kupepelamo Leza ikatungulula uku ononesi. Nomba Yeova asilonda ukuti umuntu aaliwensi ace afwe. Akapeela antu yonsi isyuko lya kusambilila pali aliwe.—2 Petulo 3:9.

INZILA YAMPOMVU IYA KUPEPELAMO LEZA

5. Uzye mungamanya uli antu aakapepa Leza umu cumi?

5 Yesu walanzile ukuti tungamanya aakapepa Leza mu nzila yampomvu. Pakuti tuyamanye, tulinzile ukusambilila vino yazumilamo na vino yakacita. Yesu walanzile ati: “Mulayamanyila ku milimo yao.” Napya watile: “Umuti onsi usuma ukaseeka vizao visuma.” (Mateo 7:16, 17) Cii cisikupiliula ukuti yao aakapepa Leza yamalilika. Lelo aomvi yakwe Leza yakaezya na maka lyonsi ukucita visuma. Tumasambilila vimwi vino tungamanyilako yayo aakapepa Leza umu cumi.

6, 7. U mulandu ci uno ya kapepa ya cumi yakaomvezya Baibo pa kusambilizya? I cani cino tungasambililako kuli Yesu?

6 Tufwile ukulasambilizya ivya muli Baibo. Baibo ikati: “Mazwi yonsi amu malembelo yene yafuma kuli Leza nupya yakaomviwa mu kusambilizya icumi, kukanya ukuluvyanya, kulungika, nga nu kupeela utunguluzi ku antu pa kucita vyawololoke, pakuti umuntu wino akatumikila Leza angalingana, nupya angaiteyanya ukucita imisango yonsi ya vicitwa visuma.” (2 Timoti 3:16, 17) Mutumwa Paulo walembiile Aina Klistu ati: “Lino twamuletile mazwi yakwe Leza, mwemo mwayuvwile nu  kuyapokelela, asi wa mazwi ya muntu lelo wa mazwi yakwe Leza.” (1 Tesalonika 2:13) Ya kapepa yakwe Leza yakasambilizya sile ivyaya umwizwi lyakwe Leza, Baibo. Tusisambilizya pa mano ya untunze, pa ntambi, nanti sile apa vintu vyuze.

7 Vyonsi vino Yesu wasambilizyanga vyali ivya mu Malembelo. (Welengini Yoane 17:17.) Ilingi walandanga mazwi aya umu Malembelo. (Mateo 4:4, 7, 10) Aomvi yakwe Leza a cumi nayo kwene yakakolanya Yesu, vyonsi vino yakasambilizya ivya mu Malembelo.

8. Uzye Yesu watusambilizye cani pali vino tungapepa Yeova?

8 Tufwile ukulapepa sile Yeova. Pa Masamu 83:18 pakati: “Awewe sile wenga uka-amwa Yawe [Yeova], nupya wenga mpo, wewe uli Leza wapapelapela umu nsi yonsi.” Yesu walondanga kuti antu yamanye Leza wacumi, napya wasambilizyanga antu pi zina lyakwe Leza. (Welengini Yoane 17:6, NWT.) Yesu walanzile ati: “Wapepa Mwene Leza wako, wene wenga sile awino uwatumikila.” (Mateo 4:10) Fwandi swe yaomvi yako Leza tukakolanya Yesu. Tukapepa sile Yeova, tukaomvya izina lyakwe napya tukasambilizya na yauze pi zina kwene lii na vino Leza alatucitila.

9, 10. Uzye tukalangizya uli ukuti twatemwana?

9 Tufwile ukutemwa sana antu anji. Yesu wasambilizye alondezi yakwe ukuti yalinzile ukutemwana. (Welengini Yoane 13:35.) Tukalanga ukutemwa asi mulandu nu ku mpanga kuno twafuma, kuno twakulila, nanti sweswe yapina nanti akankala. Pa mulandu wakuti twatemwana, cikalenga kuti twauvwana swensi aina na yankazi. (Kolose 3:14) Fwandi tusiya uku nkondo nu kukoma antu. Baibo ikalanda ukuti: “Uu uli upusano apaswe, uwaya pakasi ka ana yakwe Leza nga na ana yakwe Ciwa. Muntu wensi asyacita visuma nanti kutemwa mwina wakwe  wene asi mwana wakwe Leza.” Napya ikati: “Tulinzile kutemwana. Tutalinzile kukolana na Kaini, wene wali kumbali ya mui, nupya wakomile Abeli mwina wakwe.”—1 Yoane 3:10-12; 4:20, 21.

10 Tukaomvya insita itu, maka, kumwi ni vikwatwa vitu ku kwavwana nu kukomelezyanya. (Ayebulai 10:24, 25) ‘Tukacita ivisuma ku muntu wensi.’—Galatiya 6:10.

11. U mulandu ci uno twatailila ukuti Yesu ali wino Leza akaomvya pa kutupususya?

11 Tulinzile ukulauvwila Yesu pano auno Leza akaomvya pa kutupususya. Baibo ikati: “Kusi umuntu nanti wenga muno antu yangazana ufyusi, pano muno nsi yonsi kusi zina na lyuze lino Leza wapeela kunotuli lyakuti tutuulilwemo.” (Milimo 4:12) Wakwe vino twasambilile umu Cipande 5, Yeova watumile Yesu kuti aize atule umi wakwe pakuti antu acuvwila yakululwe. (Mateo 20:28) Yeova wasonta Yesu ukuya ali Mwene wa nsi yonsi. Ali mulandu uno Baibo ikatuneenela ukuti tulinzile ukuyela Yesu nga tukulonda tukaye nu umi wa pe.—Welengini Yoane 3:36.

12. U mulandu ci uno tusiyela umu vikanza vya miteekele ya muno nsi?

12 Tutafwile ukuya umu vikanza vya miteekele ya muno nsi. Yesu ataali umu vikanza vya miteekele ya muno nsi. Lino yamupingulanga, wanenyile Pilato, kateeka wa Ciloma ati: “Uwene wane usi uwa muno nsi.” (Welengini Yoane 18:36.) Naswe kwene tukakolanya Yesu, twaya acisinka ku Wene Wakwe Leza uwa mwiyulu, acino usi mulandu na kuno twikala, tusiya umu vikanza vya miteekele ya muno nsi. Lelo, Baibo ikatuneena ukuti tulinzile “ukuyela maka yakwe yakateeka,” kuli kuti mauteeko. (Loma 13:1) Tukauvwila masunde yano yaya umu mpanga muno twikala. Lelo kwene, ndi cakuti isunde limwi lisikuvwana na vino Leza akalonda, tukakolanya atumwa  aalanzile yati: “Tulinzile ukuyela Leza, kuluta kuyela antu.”—Milimo 5:29; Mako 12:17.

13. I vyani vino tukasimikila pa Wene Wakwe Leza?

13 Twazumila ukuti Uwene Wakwe Leza sile uulasisya intanzi izyaya muno nsi. Yesu walanzile ukuti “ilandwe lisuma lii lya Wene” lilakosoolwa mu nsi yonsi. (Welengini Mateo 24:14.) Kutaya uwene wa yantunze ungacita vino Uwene Wakwe Leza ulatucitila. (Masamu 146:3) Yesu watusambilizye ukupepela Uwene kwene uu ukuti: “Uwene wako wize. Kulonda kwako kucitike pansi vino kukacitika mwiyulu.” (Mateo 6:10) Baibo ikatunena ukuti Uwene Wakwe Leza ulonona amawene ya antunze yonsi ‘nga lyene ulikalilila amanda pe.’—Danieli 2:44.

14. Uzye mwemo mungati aaweni aakapepa Leza umu cumi?

14 Lyene pali vii vino imusambilila, muyuzye mweineco muti: ‘Aaweni aakasambilizya ivya muli Baibo vitupu? Aaweni aakasambilizya antu pi zina lyako Leza? Uzye aaweni aya nu kutemwa kwa cumi cumi, nupya yazumila ukuti Leza watumile Yesu ukwiza tukulula? Aaweni asiya mu vikanza vya miteekele ya muno nsi? Aaweni aakakosoola ukuti Uwene Wakwe Leza utupu uulasisya intazi zitu?’ A ya Nte Yakwe Yeova sile.—Ezaya 43:10-12.

I VYANI LYENE VINO MUFWILE UKUCITA?

15. I vyani vino tufwile ukucita nga tukulonda kuti Leza apokelele upefi witu?

15 Ukuzumila sile ukuti kwaya Leza, asi ali kuya kapepa wa cumi. Pano ni viwa kwene vyazumila ukuti Leza akuno waya nomba visimuvwila. (Yakobo 2:19) Nga tukulonda kuti Leza apokelele upefi witu, tutafwile sile ukupelela pa kuzumila ukuti akuno waya, lelo tufwile nu kulacita vino akutunena.

16. U mulandu ci uno tulinzile ukutalukila imipepele ya ufi?

16 Pakuti Leza apokelele upefi witu, tulinzile ukutaluka  upefi wa ufi. Kasema Ezaya walemvile ati: “Fumini mu Babiloni! Mutezya muleme vyamankowezya.” (Ezaya 52:11; 2 Kolinto 6:17) Fwandi ali mulandu uno tulinzile ukutaluka vyonsi vino aya umu kupepa kwa ufi yakacita.

17, 18. Uzye “Babiloni Mukulu” kuli kutuuli, nupya i cani cino cipaamvizye ukusenkako kuli aliwe likwene?

17 Uzye imipepele ya ufi yaya uli? Imipepele yonsi iikasambilizya antu ukupepa Leza mu nzila ipusane na ino umwineco walanda, ala i yaufi. Baibo ika-ama imipepele yonsi iya ufi ukuti “Babiloni Mukulu.” (Umbwilo 17:5) U mulandu ci? Pa cisila cako mulamba uwaliko umu manda yakwe Nowa, visambilizyo ivingi ivyaya umu mipepele ya ufi vyatandike mu musumba uwa Babiloni. Visambilizyo vivyo ivya ufi vyasalangine umu nsi yonsi. Antu aikalanga umu Babiloni yapepanga ya leza ayanga mu maumba maumba, na cila umba mwayanga ya leza yatatu. Ndakai imipepele iingi ikasambilizya ukuti muli Leza wenga mwaya ya leza Yatatu, nomba Baibo yene ikasambilizya ukuti kwaya sile Leza wa cumi wenga mpo, na wiyo a Yeova, nu kuti Yesu Klistu u Mwana wakwe. (Yoane 17:3) Napya antu aikalanga umu Babiloni yaazumile nu kuti mu muntu mwaya cimwi icikatwalilila ukuya nu umi ndi umwili wafwa, nu kuti icintu cico yangacicuzya umu moto. Lelo vivyo asi vya cumi.—Lolini Vyeo Vya ku Mpela pa namba 14, 17 na 18.

18 Leza wasowela ukuti imipepele yonsi iya ufi ili nu kononwa likwene. (Umbwilo 18:8) Uzye lyene mwalola cino cicindamile ukusenka zuwa umu mipepele ya ufi? Yeova Leza akulonda ukuti mufumemo likwene.—Umbwilo 18:4.

Ndi mwatandika ukuombela Yeova pamwi na antu yakwe, mulaya umu lupwa ulukulu cuze

19. I vyani vino Yeova alamucitila ndi mwatandika ukumuombela?

19 Ndi mwapingulapo ukufuma umu mipepele ya ufi  nu kutandika ukuombela Yeova, ya cuza inu yamwi nanti ya lupwa yangafilwa ukuvwikisya umulandu uno mwacitila vivyo, napya yangamupata. Lelo Yeova atalamutazyela foo. Namwe mulaya umu lupwa ulukulu cuze ulwa mu nsi yonsi, muno mwaya antu acumi atemwana wakwe cimwi, nakapya mulaya ni syuko lya kwizaikala manda pe mu nsi ipya. (Mako 10:28-30) Limwi ivyuza na ya lupwa aalamukanya ukuombela Yeova, uwanda umwi yangasuka yatandike ukusambilila Baibo.

20. U mulandu ci uno cacindamila ukupepa Yeova umu nzila ya mpomvu?

20 Likwene sile Leza wasya ace asisyepo iviipe vyonsi, napya Uwene wakwe ulateeka insi yonsi. (2 Petulo 3:9, 13) Insita iyo ilaziipa wakwe cimwi! Muntu wensi alaapepa Yeova kulingana na vino Yeova umwineco akalonda. Fwandi icicindama sana ukupingulapo likwene ukupepa Leza mu nzila ya mpomvu.