Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Uzye Baibo Ikatusambilizya Vyani?

 CIPANDE 5

Imfwa Yakwe Yesu U Wila Uwakulisya Ukufuma Kuli Leza

Imfwa Yakwe Yesu U Wila Uwakulisya Ukufuma Kuli Leza

1, 2. (a) Uzye mungati uwila pakuti uye uwampomvu kuli mwemwe, ufwile ukuya uli? (b) U mulandu ci uno tungalandila ukuti ukutukulula uku maifyo ni imfwa ali wila uno Leza watutumila uwaluta amawila yonsi?

UZYE u wila ci usuma sana uno mwapokeelilepo? Asi kuti uwila ufwile ukuya uwa mutengo sana pakuti uye uwa mpomvu kuli mwemwe. Ndi cakuti uwila uwo wamulenga ukuya ni nsansa, nanti ngi cakuti ali cintu cino mukulondesya, ala mumautemwa nu kutaizya sana.

2 Pa mawila yonsi yano Leza watupeela, paaya uwila onga uno tukalondesya sana ukucila ivintu vyonsi. Uwila kwene uuwo ali wila uwakulisya uno Leza wapeela antunze. Umu cipande cii, tumasambilila ukuti Yeova watumile Umwanakwe, Yesu Klistu, pakuti tukikale amanda pe. (Welengini Mateo 20:28.) Vino Yeova watumile Yesu pano nsi ku kwiza tukulula, cikalangilila ukuti cumicumi watutemwa cuze.

TULINZILE UKUKULULWA KULI VYANI?

3. U mulandu ci uno antu yakafwila?

3 Yeova wapekinye ukuti Yesu atufwile pakuti tukululwe uku maifyo ni imfwa. (Efeso 1:7) Pakuti tuvwikisye umulandu uno antu yalondekanga ukukululwa, tufwile ukumanya ivyacitiike mpiti sana umu calo ca Edeni. Avyazi itu akutandikilapo, Adamu na Eva, iifizye. Lyene pa mulandu wa kuti iifizye, calenzile ukuti yafwe. Naswe kwene tukafwa pa mulandu wakuti twapyana uluyembu  lwakwe Adamu na Eva.—Lolini Vyeo Vya ku Mpela pa namba 9.

4. Uzye Adamu wali a weni, napya isyuko ci lino wakweti?

4 Lino Yeova waumvile umuntu wa kutandikilapo, Adamu, wamupeezile icintu cimwi icicindame sana. Wamupile uumi umaliilike. Wakweti amelenganyo nu mwili vimaliilike. Wali nu kwikala ukwaula ukulwala, nanti ukukota, nupya ataali nu kufwa. Yeova wali wakwe isi kuli Adamu, pano aliwe wamuumvile. (Luka 3:38) Yeova ilingi kwene walandanga nawe. Leza walondolwelile ningo Adamu vyonsi vino walondekwanga ukucita, nupya wamupeezile imilimo isuma sana ino waipakizyanga ukuomba.—Utandiko 1:28-30; 2:16, 17.

5. Uzye Baibo ikalozya mwi lino ikalanda ukuti Adamu waumvilwe umu “cata cakwe Leza”?

5 Adamu waumvilwe umu “cata cakwe Leza.” (Utandiko 1:27) Yeova wapeezile Adamu imiyele imwi ino aliwe kwene wakwata, wakwe ukutemwa, amano, mulinganya, na amaka. Wamupeezile maka ya kuipingwila ivyakucita. Adamu atali wakwe cimasyini. Leza wamu-umvile ukuti aisoolwela ivyakucita, ivisuma nanti viipe. Adamu asoolola ukuvwila Leza, nga wikazile amanda pee umu Paladaise.

6. I cani cino Adamu waponzizye lino wapondokile Leza?

6 Lino Adamu wapondokiile Leza nu kupingulwa ukufwa, waileteliile sile. Waponzizye ucuza wakwe na Yeova, umi umalilike, na Paladaise muno wikalanga. (Utandiko 3:17-19) Ivintu vitaali nu kuzipila Adamu na Eva pano yasoolwile ukupondokela Leza.

7, 8. Pa mulandu wakuti Adamu wifizye i cani catucitikila?

7 Pa mulandu na vino Adamu wacisile, “iifyo lingile muno nsi . . . nga ni iifyo lyakwe i lyaleta imfwa. Caleka, imfwa nayo yasalangine mu antu yonsi pano antu yonsi  iifizye.” (Loma 5:12) Lino Adamu wifizye, waikazizye umwineco pamwi na swe yana yakwe umu uzya wa maifyo ni imfwa. (Loma 7:14) Nomba uzye tulatala tukululwe? Ee.

8 Kutaali umuntu nanti umwi uwali nu kulipila pali vino Adamu ononyile lino wayembwike nu kulenga ukuti twafwa. Nomba Yeova wapekinye inzila ya kutukulwilamo ku maifyo ni mfwa. Lekini tusambilile vino wacisile pakuti atukulule na vino cingatwavwa.

VINO YEOVA WACISILE PAKUTI AKULULE ANTU

9. I cani icalondekwanga pakuti antu yakululwe?

9 Kutaaya umuntu nanti wenga angakulula antu yauze nu kulenga yaye nu umi umalilike uno Adamu waponzizye. U mulandu ci? Pano fwensi tutaamalilika. (Masamu 49:7, 8) Pa kukulula antu yonsi, umi umaliilike u walondekwanga. Ali mulandu uno Yesu “waipiile” umweneco pano nawe wali umumalilike. (1 Timoti 2:6) Umi uwali nu kupeelwa wali nu kuya ulingane na uno Adamu waponzizye.

10. Uzye Yeova wacisile uli pakuti akulule antu?

10 Uzye Yeova wacisile uli pakuti akulule antu? Yeova watumile Umwanakwe wino watemwa cuze ukwiza pano nsi. Umwana wiyo, a Yesu, nupya ali wino watandikilepo uku-umba. (1 Yoane 4:9, 10) Yesu waitemiilwe ukusya Isi ukwiyulu nu kwiza pano nsi. (Filipi 2:7) Yeova wakuusizye Yesu ukufuma ukwiyulu ukwiza pano nsi, lyene Yesu wizile avyalwa umuntu umumaliilike, uwaula iifyo.—Luka 1:35.

Yeova watupile umwana wakwe wino watemwisya sana pakuti atukulule

11. Uzye umuntu wenga sile wali nu kukulula uli antu yonsi?

11 Lino umuntu wa kutandikilako, Adamu, wapondokile Yeova, waponzizye uumi umalilike uno antu yonsi  yaali nu kukwata. Uzye umuntu muze sile aliwe wali nu kukulula ana yakwe Adamu yonsi uku mfwa? Ee. (Welengini Loma 5:19.) Yesu, wino atatazile aifye, watuuzile uumi wakwe umalilike pakuti atukulule. (1 Kolinto 15:45) Umi wakwe Yesu umalilike u walondekwanga pa kufumyapo imfwa ino twapyanyile kuli Adamu.—1 Kolinto 15:21, 22.

12. U mulandu ci uno Yesu waculile sana?

12 Baibo ikalondolola sana pali vino Yesu wacuzile lino atali afwe. Yamumile ivikoti, yamupampamile na pa cimuti, nupya wacuzile sana pakuti aize afwe. (Yoane 19:1, 16-18, 30) U mulandu ci uno Yesu waculile sana? Pano Satana walanzile ukuti aomvi yakwe Leza yatanga yatwalilile ukuya acumi lino yakweziwa. Yesu walangiizye ukuti umuntu umumalilike angatwalilila ukuya uwa cumi nanti icakuti wacula sana. Elenganyini vino Yeova watemilwe lino Yesu wazizimizye nu kutwalilila ukuya uwa cumi!—Mapinda 27:11; lolini Vyeo Vya ku Mpela pa namba 15.

13. Uzye caali uli pakuti antu yakululwe?

13 Uzye caali uli pakuti antu yakululwe? Umu mwaka wakwe 33 C.E., apa Nisani 14 kulingana na kalenda wa Ciyuda, Yeova wazumilizye ukuti Yesu akomwe ku yalwani yakwe. (Ayebulai 10:10) Apa wanda wakwe citatu ukufuma pano Yesu wafwiliile, Yeova wamutuutulwile, aya ndi vino wali lino atatala wiza pano nsi. Lino Yesu waswilile ukwiyulu, waile alolekela kuli Leza, nawe Leza wapokelile vyonsi vino Yesu wacisile pa kutuula umi wakwe umalilike kuti akulule ana yakwe Adamu. (Ayebulai 9:24) Imfwa yako Yesu yalenga kuti tuye ni syuko lya kukululwa uku maifyo ni mfwa.—Welengini Loma 3:23, 24.

 VINO IMFWA YAKWE YESU INGAMWAVWA

14, 15. Uzye apakuti amaifyo itu yelelwe tufwile ukucita vyani?

14 Uwila uno Leza watupeela ukatwazwa na ndakai kwene. Lekini tusambilile pa vintu vimwi-vimwi ivisuma vino imfwa yakwe Yesu yatucitila ndakai na vino ilatucitila uku nkoleelo.

15 Tukaelelwa maifyo. Cikatutalila sana ukucita ivya ololoke insita yonsi. Swensi kwene tukaluvyanya, nupya insita zimwi tukalanda nu kucita ivintu ivipe. (Kolose 1:13, 14) Tungacita uli pakuti amaifyo itu yelelwe? Tulinzile ukulapila pa vipe vino itucita nu kupepa kuli Yeova kuti atwelele. Ndi twacita vivyo, lyene tungataila ukuti amaifyo itu yelelwa.—1 Yoane 1:8, 9.

16. I vyani vino tulinzile ukucita pakuti tuye na kampingu umusanguluke?

16 Tukaya na Kampingu umusanguluke. Ndi cakuti kampingu akutucuzya pa mulandu ni viipe vino itucita, tukaumvwa uyi sana, nu kwelenganya ukuti sweswe ya sile-sile. Nomba tutalinzile ukutoovoka. Ndi cakuti twalenga Yeova kuti atwelele, tulinzile ukutaila ukuti amaumvwa ipepo litu nupya amatwelela. (Ayebulai 9:13, 14) Yeova akalonda kuti twamunena amavya yonsi yano tukweti na vino tukaluvyanya. (Ayebulai 4:14-16) Na cico cilalenga ukuti tuye na ucuza usuma na Leza.

17. I vintu ci ivisuma vino tulapokelela pa mulandu wa kuti Yesu watufwilile?

17 Tulaya nu umi wa pe. “Malipilo yi ifyo, imfwa. Lelo uwila wakwe Leza umi wape muli Klistu Yesu Mwene witu.” (Loma 6:23) Pa mulandu wakuti Yesu watufwilile, tulikala amanda pe nu kuipakizya uumi usuma nupya umalilike. (Umbwilo 21:3, 4) Nomba i vyani vino tulinzile ukucita pakuti tukaipakizye uumi uwo?

 VINO MUNGALANGA UKUTI MUKALONDA UKUKULULWA

18. I cani icalenga tusininkizye ukuti Yeova watutemwa?

18 Elenganyini vino mukaumvwa ningo ndi cakuti umwi wamupeela uwila usuma cuze. Ukutukulula uku maifyo ni mfwa ali wila uwacindamisya sana pa mawila yonsi, nupya tulinzile ukutaizya sana Yeova. Pali Yoane 3:16 pakati: “Leza watemilwe amu nsi nga apeela Mwana wakwe wino uwavilwe wenga.” Yeova watutemwa sana icakuti watumile Umwanakwe, Yesu. Nakapya, twamanya ukuti na Yesu kwene watutemwa, pano waitemiilwe ukutuula umi wakwe pakuti tukululwe. (Yoane 15:13) Uwila uu, ulinzile ukumulenga musininkizye ukuti Yeova na Yesu yamutemwa sana.—Galatiya 2:20.

Lino tukutwalilila ukusambilila pali Yeova, tulaya ya cuza yakwe napya tulamutemelwako sana

19, 20. (a) Mungacita uli pakuti muye cuza wakwe Yeova? (b) Mungalanga uli ukuti mukataizya pali vino Yesu wamukulula?

19 Nomba vino mwasambilila pali vino Leza wamutemwa, i vyani vino mungacita pakuti muye cuza wakwe? Citanguka ukutemwa umuntu wino mutamanya. Pali Yoane 17:3 pakalondolola ukuti tungamanya ivingi pali Yeova. Lino mukumanyilako Yeova, mulaamutemelwako sana, nupya mulaalondesya ukumuzanzya, lyene mulaya cuza wakwe. Fwandi twalililini ukusambilila pali Yeova muli Baibo.—1 Yoane 5:3.

20 Mwalanga ukuti mukataizya pali vino Yesu wamukulula. Baibo ikati: “Wino wensi akataila Umwana wene ali nu umi wape.” (Yoane 3:36) Uzye ukuya nu utailo kuli kutuli? Kuli kuti tulinzile ukucita vino Yesu watunenyile ukulacita. (Yoane 13:15) Tutafwile sile ukulanda pa kanwa ukuti twataila Yesu. Pa kulanga ukuti tukataizya pali vino Yesu watukulula, kuli na vyuze vino tulinzile ukucita pa utailo witu. Pali Yakobo 2:26 pakati: “Utailo uwaula milimo isuma ufwe.”

21, 22. (a) U mulandu ci uno tulinzile ukuyilako uku Cakulya ca Manguzi Ica Mwene cila mwaka? (b) I vyani ivilalondololwa umu Vipande 6 na 7?

 21 Mwazanwako uku Ciusyo ca mfwa yakwe Yesu. Insita ya manguzi lino Yesu atali afwe, watusambilizye ukuti tulinzile ukulaiusya imfwa yakwe. Tukacita vikwene cila mwaka, napya ukuzevya kuu kuka-amwa ukuti Ciusyo nanti “Cakulya ca Manguzi Ica Mwene.” (1 Kolinto 11:20, NWT; Mateo 26:26-28) Yesu akalonda kuti twaiusya ukuti wapeezile umi wakwe umalilike pakuti atukulule ku maifyo. Yesu walanzile ati: “Mwacita cii pa kunjiusya.” (Welengini Luka 22:19.) Nga mukuzanwako uku Ciusyo, ala mukulanga ukuti mukaiusya pali vino antu yakululwa na vino Yeova na Yesu yatutemwa cuze.—Lolini Vyeo Vya ku Mpela pa namba 16.

22 Icumicumi ukutukulula kuno Yeova watukulula uku maifyo ni mfwa, ali wila uwa mpomvu uno tungapokelela. (2 Kolinto 9:14, 15) Uwila uu ucindamisye ulazwa na antu aingi cuze yano yafwa mpiti. Vipande 6 na 7, vilalondolola ivingi api lyasi lilyo.