Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Uzye Baibo Ikatusambilizya Vyani?

 CIPANDE 8

Uzye Uwene Wakwe Leza I Cani?

Uzye Uwene Wakwe Leza I Cani?

1. Iipepo ci ilyamanyikwa sana lino tumasambililapo?

ANTU aingi wakwe cimwi yamanya ipepo lyakuti Tata Witu nanti lino yakati Ipepo Lya Mwene. Yesu waomvizye ipepo kwene lii pa kusambilizya alondezi yakwe ivya kupepa. I vintu ci vino walumbwile umwi pepo? Nupya, u mulandu ci uno ipepo lii lyacindamila kuli sweswe?

2. I vintu ci vitatu vino Yesu watusambilizye ukupepela?

2 Yesu watiile: “Acino mwemo mwapepa mukuti, ‘Tata witu uwa mwiyulu, izina lyako licindikwe, Uwene wako wize, kulonda kwako kucitike pa nsi vino kukacitika umwiyulu.’” (Welengini Mateo 6:9-13.) U mulandu ci uno Yesu watusambilizizye ukupepela pa vintu viivi vitatu?—Lolini Vyeo Vya ku Mpela pa namba 20.

3. I vyani vino tufwile ukumanya apa Wene Wakwe Leza?

3 Twasambilile ukuti izina lyakwe Leza a Yeova. Nakapya, twasambilila na pali vino Leza alacitila antu uku nkoleelo na vino akalonda kuti insi ikaye. Nomba uzye Yesu walozizye mwi lino walanzile ukuti: “Uwene wako wize”? Tumasambilila pali vino Wene Wakwe Leza waya, vino ulacita, na vino ulalenga izina lyakwe Leza ukuya ilya muzilo.

UZYE UWENE WAKWE LEZA I CANI?

4. Uzye Uwene wakwe Leza i cani, nupya Umwene wa Wene uwo a weni?

4 Yeova wimika uteeko wa kwiyulu nu kusonta Yesu kuya Umwene wa uteeko kwene uwo. Baibo ika-ama  uteeko kwene uu kuti Uwene Wakwe Leza. Yesu u “Mwene wa ene, mulasi wa alasi.” (1 Timoti 6:15) Yesu wene angacita ivintu vya mpomvu kucila kateeka aaliwensi wa untunze, nupya wene wakwata amaka ukuluta maka yano ya kateeka yonsi ukuika pamwi yakwata.

5. Uzye Uwene wakwe Leza ulaateekela kwi? Nupya ulaateeka cani?

5 Lino papisile manda 40 kufuma pano Yesu watuutulukile, waswilile ukwiyulu. Mu kupita kwa nsita Yeova wamusonsile ukuya Umwene wa Wene wakwe. (Milimo 2:33) Uwene wakwe Leza ulaateeka insi kufuma ukwiyulu. (Umbwilo 11:15) Ali mulandu uno Baibo ika-amila Uwene Wakwe Leza iti “Uwene wa kwiyulu.”—2 Timoti 4:18.

6, 7. I vyani ivyalenga ukuti Yesu aye Umwene umusuma ukucila kateeka ali wensi umuntunze?

6 Baibo ikalanda ukuti Yesu u mukalamba ukuluta kateeka ali wensi umuntunze, pano wene “aliwe wenga sile asyafwa.” (1 Timoti 6:16) Ya kateeka antunze yene pa nsita imwi yakafwa, lelo Yesu wene atalatala afwe. Visuma vyonsi vino Yesu alatucitila, vitalatala visile.

7 Usesemo wa muli Baibo ukalanda ukuti Yesu alaya Umwene wa mulinganya nupya uwa luse: ‘Umupasi wakwe Leza uliza wikalilile pali aliwe, umupasi wa malango nu wa kwiluka. Umupasi wa kupanda amano nu wa maka, umupasi wa kumanya ivintu nu koopa Yeova. Ukutiina Yeova ali cintu cino alimilila penepo. Atalaputula umulandu pa mulandu nu kulondelela ukuloleka kwa vintu, nanti ukuuvwilila sile uku matwi. Lelo umu ololoke amuno wene alaputula imilandu ya antu aakucula, nga nu kupingwila alanda amu nsi umu ulungami.’ (Ezaya 11:2-4) Uzye namwe mungatemwa ukukwata umwene wa musango uuwo?

8. Twamanya uli ukuti Yesu atalateeka wenga?

 8 Leza wasoolola antunze yamwi alateeka na Yesu mu uteeko uwa mwiyulu. Paulo wanenyile Timoti ati: “Ndi twatwalilila kuposya, ale lyene tulateeka pamwi nawe.” (2 Timoti 2:12) Uzye aantu yanga alateeka pamwi na Yesu?

9. Uzye aantu yanga aalateeka pamwi na Yesu? Nupya a lilaci lino Leza watandike ukuyasoolola?

9 Wakwe vino twasambilile mu Cipande 7, umutumwa Yoane wapeezilwe icilolwa muno waweni Yesu na ya 144,000 yano yalateeka nawe. Uzye ya 144,000 kwene yaayo aaweni? Yoane walondolola ukuti: “Pa mausyu yao palemvilwe izina lyakwe [Yesu] nga na lyakwe Isi.” Napya walanzile ukuti: “Yene yalondelanga Mwana wa Mfwele [Yesu] konsi kuno akuya. Yene yakulwilwe kufuma pa antu yonsi asyala.” (Welengini Umbwilo 14:1, 4.) Ya 144,000 a Ina Klistu ya cumi, yano Leza wasoolola ukuti yaye “ya kateeka pano nsi” na Yesu. Ndi yafwa yakatuutulukila ukwiyulu. (Umbwilo 5:10) Ukutandikila umu manda ya yatumwa, Leza akasoolola Aina Klistu ya cumi pakuti icipendo cakwe 144,000 cikumanile.

10. U mulandu ci uno cilaziipila sana ukuti Yesu na ya 144,000 yace yateeka antu?

10 Yeova akatusakamala wakwe cimwi, cakuti wapekanya na antunze alateeka pamwi na Yesu. Yesu alaya kateeka musuma sana pano watumanya ningo. Wamanya ningo vino swe yantu twaya kumwi ni ntazi zino tukakwata. Paulo walanzile ukuti Yesu asiuvwa ningo lino tukucula, angatuvwila “uluse pa utonte witu” nupya wene “weziwe mu misango yonsi ndi vino naswe tukaeziwa.” (Ayebulai 4:15; 5:8) Ya 144,000 nayo kwene yamanya vino caya ukuya umuntunze. Nupya yalwisyanyapo  nu kukanamalilika alino nu kulwala. Fwandi tungataila ukuti Yesu na ya 144,000 lino yalaateeka, yatalamanya sile vino tukayuvwa, lelo yalamanya ni ntazi zino tukakwata.

I VYANI VINO UWENE WAKWE LEZA ULACITA?

11. U mulandu ci uno Yesu wasambilizizye alondezi yakwe ukupepa ukuti ukulonda kwakwe Leza kucitike ukwiyulu?

11 Yesu wasambilizye alondezi yakwe ukupepa ukuti ukulonda kwakwe Leza kucitike umwiyulu. U mulandu ci? Twasambilile umu Cipande 3 ukuti Satana Ciwa wapondokile Yeova. Lino Satana wapondwike, Yeova wamuzumilizye kumwi na angeli yacipondoka, nanti iviwa, ukutwalilila ukwikala ukwiyulu pa kasita kanono. Fwandi asi yonsi aali umwiyulu apa nsita iiya aacitanga ukulonda kwakwe Leza. Umu Cipande 10, tulasambilila ivingi pali Satana ni viwa.

12. Uzye i vintu ci viili ivicindame sana ivyalondololwa apa Umbwilo 12:10?

12 Baibo ikalondolola ukuti lino Yesu waya Umwene wa Wene Wakwe Leza, wali nu kulwa inkondo na Satana. (Welengini Umbwilo 12:7-10.) Pa cikomo 10 pakalanda ivintu viili ivicindame sana ivyali nu kucitika. Cakutandikilako, Yesu Klistu watandika ukuteeka umu Wene Wakwe Leza, cako ciili, Satana wasumbwa ukufuma ukwiyulu kwiza pano nsi. Wakwe vino tulasambilila, vyonsi vii vyacitika mpiti.

13. I vyani ivyacitike ukwiyulu lino Satana wazinzilwe?

13 Baibo ikalondolola vino angeli acisinka yazanzile lino Satana ni viwa vyakwe yayasumvile ukufuma ukwiyulu. Tukawelenga ukuti: “Acino zangini mwe mayulu na mwe muno mwikalamo!” (Umbwilo 12:12) Ndakai, ukwiyulu kwaya sana umutende nupya yonsi aaya  kweneko yakauvwana pano yakacita ukulonda kwakwe Leza.

Kufuma lino Satana ni viwa vyakwe yayazinzile ukufuma ukwiyulu, insi yazula na malanda. Likwene sile ukucula konsi kwasya kusile

14. Uzye i vyani ivyacitika pano nsi pa mulandu wakuti Satana wasumbwa ukufuma ukwiyulu?

14 Nomba pano nsi pene ivintu vitazipa foo. Ivintu ivipisye vikacitikila antu “pano Ciwa watasumbwa pa nsi” nupya “ali nu ukali cuze pano amanyile ukuti watasyala sile ni nsita inono.” (Umbwilo 12:12) Satana wasoka wakwe cimwi. Yamuzinga ukwiyulu, napya wamanya ukuti likwene sile wasya aononwe. Akaezya na maka ukucita ivili vyonsi ivingalenga ukuti kuye intazi, malanda nu kucula konsi ukwayako pano nsi.

15. Uzye Leza akalonda ukuti insi ikaye uli?

15 Lelo ukulonda kwakwe Leza pano nsi kutaasenuka foo. Yeova acili akalonda ukuti antu amalilike yakikale pano nsi manda pe. (Masamu 37:29) Nga lyene Uwene wakwe Leza ulafikilizya utuli cico?

16, 17. Uzye ilembelo lyakwe Danieli 2:44, likatusambilizya vyani pa Wene Wakwe Leza?

16 Usesemo uwaya pali Danieli 2:44 ukati: “Umu nsita zyakwe yakateeka yalya, Leza wa kwiyulu alakatusya Uwene uno utalatala wononwe. Wene utalatala ucimviwe, lelo ulonona amawene yauze yonsi nga lyene wikalilila amanda pe.” Uzye usesemo uu ukatusambilizya cani pa Wene Wakwe Leza?

17 Icakutandikilako, tukusambilila ukuti Uwene Wakwe Leza wali nu kutandika ukuteeka “umu nsita zyakwe yakateeka yalya.” Cii cikupiliula ukuti kwali nu kuya mauteeko yauze pano nsi lino Uteeko uu watandika ukuteeka. Cakwe ciili, tukusambilila ukuti Uwene ulikalilila amanda pe, napya kusi uwene uli onsi ulapyanapo. Cakwe citatu, tukusambilila ukuti kulaya inkondo pakasi ka Wene Wakwe Leza na mauteeko ya muno nsi.  Uwene Wakwe Leza ulacimvya amawene yonsi nupya ulasyala sile onga uulateeka insi yonsi. Lyene antu yonsi yalaateekwa ningo sana.

18. Uzye inkondo ya kusyalikizya ino Uwene Wakwe Leza ulalwa na mauteeko ya muno nsi ika-amwa ukuti uli?

18 Icani ciilacitika pakuti Uwene Wakwe Leza uce wateeka insi yonsi? Lino inkondo yakulekelezya, ikaamwa ukuti alamagedoni itali itandike, angeli yakwe Ciwa, yalaasomba ‘yakateeka yonsi mu nsi, kuti yayakonganike ku ulwi ulacitika pa wanda wakwe Leza wa maka onsi.’ Mauteeko ya muno nsi yalalwisya Uwene Wakwe Leza.—Umbwilo 16:14, 16; lolini Vyeo Vya ku Mpela pa namba 10.

19, 20. U mulandu ci uno tukalondela Uwene Wakwe Leza kuti auno wateeka insi?

19 U mulandu ci uno tukalondela Uwene Wakwe Leza? Kwaya imilandu ukufika kuli itatu. Inkoleelo, swensi kwene sweswe ya kaifya, ali cino tukalwalila nu kufwa. Lelo Baibo ikalanda ukuti lino Uwene Wakwe Leza ulaateeka, tulikala manda pe. Pali Yoane 3:16 pakati: “Leza watemilwe amu nsi nga apeela Mwana wakwe wino uwavilwe wenga, kuti wensi wino wataila munoli atakalowe, lelo aye nu umi wa pe.”

20 Umulandu wako cili uno tukalondela Uwene Wakwe Leza uwakuti ndakai twikala na antu akacita ivipe. Antu aingi yasilanda icisinka, yakasomba, napya yakacita upulumusi. Tutange tufumyepo ivintu vii, lelo Leza wene alavifumyapo. Antu aakatwalilila ukucita ivipe yalononwa pa alamagedoni. (Welengini Masamu 37:10.) Umulandu wakwe citatu uno tukalondela Uwene Wakwe Leza uwakuti mauteeko ya antu aingi yatakwata amaka, yamwi nayo ankalwe, nga yauze nayo yatemwa mafisakanwa. Yasilonda ukukomelezya antu ukuvwila  Leza. Baibo ikati “Antu yamwi aamaka yakateeka auze mu unkalwe.”—Kasambilizya 8:9.

21. Uzye Uwene ulacita vyani pakuti ukulonda kwakwe Leza kukacitike pano nsi?

21 Lino inkondo ya Alamagedoni ilasila, Uwene Wakwe Leza ulalenga kuti ukulonda kwakwe Leza kucitike umu nsi. Icintu conga cino ulacita i cakuti, ulasisyapo Satana ni viwa vyakwe. (Umbwilo 20:1-3) Lyene antunze yatalaalwala nanti ukufwa. Pa mulandu ni mfwa yako Yesu, antu yonsi acisinka yalikala amanda pe mu Paladaise. (Umbwilo 22:1-3) Uwene ulalenga ukuti izina lyakwe Leza licindikwe. Uzye icintu cii cilozile mwi? Cilozile umukuti lino Uwene Wakwe Leza ulaateeka insi, antu yonsi yalaacindika izina lyakwe Yeova.—Lolini Vyeo Vya ku Mpela pa namba 21.

A LILACI LINO YESU WATANDIKE UKUTEEKA?

22. Uzye twasininkizya uli ukuti Yesu atali Umwene lilikwene lino wali pano nsi, nanti apa nsita kwene ino waswiliile ukwiyulu?

22 Yesu wasambilizye asambi yakwe ukupepa ukuti: “Uwene wako wize.” Fwandi cali usininkizyo wakuti Uwene Wakwe Leza uliza uku nkolelo. Cakutandikilako Yeova wali nu kwimika uteeko wakwe nu kusonta Yesu kuya Umwene wa uteeko kwene uwo. Uzye lilikwene lino Yesu waswilile ukwiyulu ali lino waile aya Umwene?  Awe foo, wali nu kulolela. Lino papisile insita kufuma pano Yesu watuutulwike, Petulo na Paulo yalanzile pa usowelo uwaya pa Masamu 110:1 ukuti walozyanga kuli Yesu. Mu usesemo uu Yeova walanzile ati: ‘Ikala kwi kasa lilunji kufika lino ndakucimvizya anisi yako yaye wa cilimba ca ngazo zyako.’ (Milimo 2:32-35; Ayebulai 10:12, 13) Uzye Yesu pakuti aye Umwene wali nu kulolela ukufika insita ci?

Uwene wakwe Leza ulalenga ukuti ukulonda kwakwe Leza kucitike pano nsi

23. (a) Uzye a lilaci lino Yesu wizile aya kateeka wa Wene wakwe Leza? (b) I vyani vino tulasambilila umu cipande cilondelilepo??

23 Imyaka iingi lino umwaka wakwe 1914 utatala wafika, iumba lya Ina Klistu ya cumi yamanyile ukuti umwaka wakwe 1914 wali nu kuya ucindame sana mu mausesemo ya muli Baibo. Ivyacitika ukufuma umu 1914 vyasininkizya ukuti vino Aina Klistu yaa yamanyile vyali ivyacumi. Yesu watandike ukuteeka umwaka kwene uwa. (Masamu 110:2) Lino Yesu watandike sile ukuteeka, wasumvile Satana pano nsi, lyene ndakai Satana “watasyala sile ni nsita inono.” (Umbwilo 12:12) Umu cipande cilondelilepo tulasambilila ivingi ivikulangilila ukuti tukwikala umu manda akusyalikizya. Nupya tulasambilila ukuti likwene sile Uwene Wakwe Leza wasya ucite ukulonda kwakwe Leza pano nsi.—Lolini Vyeo Vya ku Mpela pa namba 22.