Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ilyasi Lisuma Lino Leza Akutuneena!

 ISAMBILILO 13

Uzye Ilyasi Lisuma Likati Uli pa Mipepele?

Uzye Ilyasi Lisuma Likati Uli pa Mipepele?

1. Uzye imipepele yonsi yaya sile ningo?

Mu mipepele yonsi mwaya antu yamwi aya ningo. Ni lyasi lisuma i lyakuti Leza wayamanya antu yayo kapya wayasakamala. Nomba iciipako i cakuti antu amu mipepele aliyo kwene akaleeta ni intazi. (2 Kolinto 4:3, 4; 11:13-15) Malyasi yano tukaumvwa umu nsi yakati antu yamwi aya umu vya mapepo aliyo yakaleta mazanzo pa yantu yauze, nu kumoolana, inkondo, nu kucuzya ana. Cumi kwene antu atemwa Leza cikayawaya sana ndi yumvwa ivintu vya musango uu!—Welengini Mateo 24:3-5, 11, 12.

Upefi wa cumi ukacindika Leza, nomba imipepele ya ufi yene ikamukalifya. Vintu vino imipepele ya ufi ikasambilizya pali Leza, na pa yantu afwa, vitaya na muli Baibolo foo. Nomba Yeova akalonda kuti antu yamanye icumi pali aliwe.—Welengini Ezekeli 18:4; 1 Timoti 2:3-5.

2. Uzye ilyasi lisuma likati uli pa mipepele?

Icazipako i ca kuti Leza atatemwa imipepele ino ikati yamutemwa lelo ino yatemwa ivintu vyako Satana ivyaya pano nsi. (Yakobo 4:4) Izwi lyakwe Leza likati mipepele yonsi iya ufi a Babiloni Mukalamba. Izina lya kuti Babiloni lyafumile ku musumba uwaliko mpiti lino Mulamba wa pali Nowa wapisile. Mu musumba kwene uuwa, amuno nu kupepa kwa ufi kwafumile. Likwene sile Leza wasya aonone imipepele yonsi ino ikasomba nu kufyenga antu.—Welengini Umbwilo 17:1, 2, 5, 16, 17; 18:8.

Kwaya ilyasi lisuma na lyunze. Yeova wayamanya antu akalonda ukumupepa yano yasalangana mu mipepele ya ufi. Leza akayasambilizya icumi pa kuti nayo kwene yalemane na aunze mu kumupepa.—Welengini Mika 4:2, 5.

 3. I vyani vino antu aakalonda ukupepa Leza yalinzile ukucita?

Ndakayi upefi wa cumi ukalemanya antu

Yeova wasakamala antu aatemwa icumi kapya aakacita ivintu ivisuma. Akayanena ukuti yafumeko ku mipepele ya ufi. Antu yonsi atemwa Leza yakasenka uku viipe pa kuti yamuzanzya.—Welengini Umbwilo 18:4.

Mu manda ya atumwa, antu iingi ayuvwile ilyasi lisuma ku yatumwa, yacisile vivi kwene vino yuvwile. Yatamfile ukwikala ningo ukulingana na vino Yeova akalonda; nupya iisile mano pa vintu vino vilacitika ukunkoleelo. Nafwe tungacita wako vino antu yaya yacisile, pano yene, lino yumvwile ilyasi lisuma, lilyo kwene sile, yatamfile nu kulaombela Yeova nu mwenzo onsi.—Welengini 1 Tesalonika 1:8, 9; 2:13.

Yeova akapokeelela yonsi yano yakafuma mu mipepele yaufi nu kwiza kuli yakapepa ya cumi. Ndi mulazumila ukwiza kuli Yeova, mulaya cuza wakwe. Nupya, mulazana yakapepa yako Yeova asuma aalamupokeelela ni nsansa. Alino uku nkoleelo, mulaya nu umi usuma amanda pe.—Welengini Mako 10:29, 30; 2 Kolinto 6:17, 18.

4. Uzye Leza alacita uli pa kuti impanga yonsi ice iziipe?

Cumi kwene lino Leza alapingula imipepele ya ufi, cilazipa cuze! Antu yonsi yalakululwa, pano lyene kutalaya ulufyengo. Mipepele ya ufi italatala iponzyepo antu nupya, nanti ukuyapatanya. Antu yonsi yano yalayapo yalalemana, kapya yalaapepa sile Leza wa cumi wenga.—Welengini Umbwilo 18:20, 21; 21:3, 4.