Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

“Ikalini mu kutemwa kwakwe Leza”

 VYEO NAVYUZE

Alilaci Lino Mama Alinzile Ukuvimba Uku Mutwe, Nupya U Mulandu Ci?

Alilaci Lino Mama Alinzile Ukuvimba Uku Mutwe, Nupya U Mulandu Ci?

U mulandu ci, nupya alilaci lino mama alinzile ukuvimba uku mutwe pa kuomba imilimo yakwe Leza? Lekini tusambilile pali vino umupasi wamuzilo walenzile Paulo ukulemba apilyasi kwene lii. Walanzile pali vino vingatwazwa ukupingula ningo pa vintu ivingalenga twacindika Leza. (1 Kolinto 11:3-16) Paulo walanzile pa vintu vitatu ivyakwelenganyapo: (1) imilimo iingalenga mama aivimbe uku mutwe, (2) ivikucitika pa nsita ino akuomba imilimo iyo, na (3) ivingamulenga ukuvwila isunde lii.

Imilimo. Paulo walumbwile ivintu viili: ipepo nu kusema. (Vikomo 4, 5) Kupepa, u kulanda kuli Yeova. Ndakai, ukusema kungapiliula umulimo wa kusambilizya antu ivyaya muli Baibo uno Umwina Klistu akacita. Uzye Paulo walozyanga umu kuti mama alinzile ukuvimba uku mutwe lyonsi lino akupepa nanti lino akusambilizya icumi ca muli Baibo? Awe. Ivikucitika lino mama akupepa nanti ukusambilizya, i vingalenga avimbe uku mutwe nanti foo.

Ivikucitika. Mazwi yakwe Paulo yaalanda pa vintu viili, nanti kwili kuno imilimo ikuombelwa—kulikuti umu lupwa nu mu cilongano. Walanzile ukuti: “Monsi nawe ali mutwe pa mwanaci; . . . mwanaci ali wensi wino akapepa nanti kusema mazwi yakwe Leza kwaula kuvimba cimwi ku mutwe wakwe ala wene akuzewanya umutwe wakwe.” (Vikomo 35) Umu lupwa, iya ali  wino Leza wapeela amaka ya kuya umutwe wa muci. Ndi cakuti mama asikulanga umucinzi uku utunguluzi wakwe iya, angalenga iya ukuya ni nsonyi ndi cakuti aliwe akuomba imilimo ino Yeova wapeela iya. Wakwe, ndi caticilinga ukuti atungulule isambililo lyakwe Baibo ala na iya apanoli, angalanga ukuti akucindika utunguluzi ndi waivimba uku mutwe. Mama alinzile ukucita vivyo nanti cakuti iya wawatiziwa nanti foo, pano iya ali mutwe wa lupwa. * Ndi cakuti mama amapepa nanti ukusambilizya lino pali umwanakwe umulumendo uwawatiziwa aacili umwance, nalyo kwene alinzile ukuivimba uku mutwe, asi pa mulandu wakuti umwana wiyo u mutwe wa lupwa, lelo a pa mulandu wa utunguluzi uno Leza wapeela Aina Klistu aonsi umu cilongano.

Paulo walanzile na pa milimo ya mu cilongano ati: “Lelo ndu muntu ali wensi akulonda kupazyanya pa mulandu wakwe cii, ale cino nemo ningalanda cakuti swemo nanti mauvi yakwe Leza tutakweti lutambi luze lwa mipepele.” (Cikomo 16) Umu cilongano ca Ina Klistu, utunguluzi wapeelwa uku onsi awatiziwa. (1 Timoti 2:11-14; Ayebulai 13:17) Aonsi sile, aakasontwa ukuya ya eluda na aomvi ya mu cilongano ukuti yaomba imilimo ino Leza wayapeela iya kusakamala ufyo wakwe. (Milimo 20:28) Nomba limwi-limwi mama Umwina Klistu anganenwa ukuomba imilimo imwi iikaombwa sile na onsi awatiziwa umu cilongano. Limwi angalondekwa ukutungulula ukukomaana kwa kuya umu mulimo pa mulandu wakuti pasi umonsi umuliinge aangatungulula. Nanti limwi angatungulula isambililo lyakwe Baibo ala pali nu monsi uwawatiziwa. * Vino imilimo iyo nayo yaaya pa milimo ya cilongano, mama angaivimba uku mutwe, ukulanga ukuti akuomba imilimo ino aonsi awatiziwa umu cilongano yalinzile ukuomba.

Nupya, kwaya navyuze ivya mu cilongano vino mama atanga alondekwe ukuivimba uku mutwe lino akucita ivintu vivyo.  Wakwe lino akwasukapo pa kulongana, lino akusimikila uku ng’anda ni ng’anda pamwi na iya nanti nu monsi muze uwawatiziwa, nanti lino akusambilizya nanti ukupepa na ana yakwe aonsi aatawatiziwa. Kwene kungaya mauzyo na yauze yano umwi anguzya, nupya ndi cakuti nkazi atasininkizye vino afwile ukucita, angalondelezya ivyeo na vyuze umu mpapulo ziitu. * Ndi cakuti acili akutwisika, cingazipa ukuti aivimbe uku mutwe, wakwe vino tukulola pa cikope.

Ivingamulenga ukuvwila. Umu cikomo 10, mwaya imilandu iili ino mama alinzile ukuivimbila uku mutwe: “Pa mulandu wa angeli, mwanaci alinzile kuvimba cimwi ku mutwe pakuti alange vino iya ali na maka panoli.” Lolini amazwi akuti, “pakuti alange vino iya ali na maka panoli.” Ukuivimba cimwi uku mutwe iinzila ino umwanaci akalangilamo ukuti wacindika utunguluzi uno Yeova wapeela aonsi awatiziwa umu cilongano. Fwandi, ndi mama akucita vivyo, akalanga ukuti watemwa sana Yeova nupya u wa cisinka kuli aliwe. Umulandu wakwe cili ukazanwa umu mazwi yakuti “pa mulandu wa angeli.” Uzye angeli yakauvwa uli ndi cakuti umwanaci akuivimba cimwi uku mutwe?

Angeli yakauvwa ningo sana ukulola ukuti utunguluzi wakwe Yeova ukucindikwa umwiyulu na pano nsi. Nupya angeli yakauvwa ningo ukukolanya antunze aatamalilika. Pano nayo kwene yafwile ukutontela ukutantika kwakwe Yeova. Cii, i cintu cino angeli yamwi mpiti yaafizilwe ukucita. (Yuda 6) Ndakai, angeli yangalola mama Umwina Klistu uwamanya sana ivintu, nupya uwacenjela sana ukucila umonsi uwawatiziwa umu cilongano;  lelo mama wiyo akatontela utunguluzi wa monsi kwene wii. Limwi, mama angaya Umwina Klistu umupakwe wino uku nkoleelo alaya pali yaayo aalateeka pamwi na Klistu. Mama wa musango uwo umukuya kwa nsita alaya ni cifulo icapapela sana ukuluta na angeli nupya alaateeka na Klistu ukwiyulu. Angeli yangakolanya sana mama wiyo ndakai! I cumicumi, yamama Aina Klistu yonsi yakwata isyuko ilya kulanga angeli yacisinka aingi cuze ukuti yaaya ni cuvwila na ucisinka lino yakulanga imiyele isuma nu kutontela utunguluzi wakwe Leza!

^ par. 3 Ndi cakuti vyonsi vili sile ningo, mama atanga apepe lino pali iya uwawatiziwa suka sile ndi catala, wakwe lino iya watalwala sana icakuti atanga avwange nu kuvwanga.

^ par. 1 Nkazi atanga aivimbe uku mutwe lino akutungulula isambililo lyakwe Baibo ala pali nu monsi aatatala wawatiziwa wino asi wakwe.

^ par. 2 Pa kuti mumanyilepo navyuze, lolini Lupungu Lwa Mulinzi ulwa Ciyemba lwakwe, 15 Julai, 2002, amafwa 26-27, na lwakwe, 15 Novemba, 2009, amafwa 12-13.