Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

“Ikalini mu kutemwa kwakwe Leza”

 VYEO NAVYUZE

Vino Baibo Ikalanda pa Kutaana nu Kupalukana

Vino Baibo Ikalanda pa Kutaana nu Kupalukana

Yeova akalonda ukuti atwalana yatwalilile ukuya acisinka uku milapo ya cupo. Lino Yeova watwalizye umonsi nu mwanaci akutandikilako, walanzile ati: ‘Umonsi . . . akailundanya ku muci wakwe, nga iyaya umwili onga.’ Yesu nawe wizile alanda amazwi kwene yaa ala paapita imyaka ingi sana ati: ‘Kusi umuntu wakulekanya cino Leza watalundanya.’ (Utandiko 2:24; Mateo 19:3-6) Acino fwandi, Yeova na Yesu yakalola icupo ukuti cilinzile ukutwalilila amanda yonsi yano atwalana yali nu umi suka sile ndi wenga wafwa. (1 Kolinto 7:39) Vino Leza u watandike icupo, ukutaana asi cintu cino atwalana yalinzile ukulola kwati i cangupale. Yeova wapata ukutaana ndi cakuti pasi umulandu wa mu Malembelo uwakucitila vivyo.—Malaki 2:15, 16.

 Uzye u mulandu ci uwa mu Malembelo uungalenga ukuti atwalana yataane? Yeova wapata ucende nu uzelele. (Utandiko 39:9; 2 Samueli 11:26, 27; Masamu 51:4) I cumicumi, Leza wapata uzelele icakuti wazumilizya ukuti ungalenga atwalana ukutaana. (Ivyeo ivikalondolola vino uzelele waya, mungavizana umu Cipande 9, palagalafu 7, umwibuku kwene lii.) Yeova wapeela insambu kuli wiyo wino uwakwe wacita uzelele ukusoololapo ukutwalilila nawe umu cupo nanti ukutaana. (Mateo 19:9) Fwandi, ndi cakuti uwakaele pali yano yaatwalana wasoololapo ukuti yataane na wino wacita uzelele, Yeova ataapata ukutana kwa musango uwo. Pa nsita iliyonga kwene, icilongano ca Ina Klistu cisikomelezya umwi ukutaana nu wakwe. Limwi-limwi uwakaele pali yano yaatwalana angasoololapo ukutwalilila umu cupo nu wakwe uwatacita uzelele ndi cakuti walanga ukuti watalapila umu cumi. Lelo, yaayo ali nu untungwa wakutaana, yalinzile ukuisoolwela aineco nu kuipekanya kuli vyonsi ivingayacitikila ukulingana nu kusoolola kwao.—Galatiya 6:5.

Insita zimwi ivintu ndi vyatala sana, Aina Klistu yamwi yakasoololapo ukupalukana nanti ukutaana na lino uwakwe atacisile uzelele. Mu milandu ya musango uu, Baibo ikati uwasoololapo ukutaana nu wakwe “alinzile kutwalilila kwikala mu usimbe.” (1 Kolinto 7:11) Umwina Klistu uwacita vivyo asikwata untungwa wa kutwala muze. (Mateo 5:32) Lekini tulole vyuze ivikalenga yamwi ukupingulapo ukupalukana.

Ukukana sakamala ulupwa uku mufulo sile. Ulupwa lungaacula sana, nu kukanakwata ivikalondekwa umu umi, pa mulandu wakuti iya pa ng’anda akufilwa ukusakamala ulupwa, na lino watakwata amaka ya kusakamala ulupwa. Baibo ikati: “Ndi cakuti umwi asyasakamala . . . amu ng’anda yakwe, ala wene wakana utailo nupya umwipisye kuluta wiyo atataila.” (1 Timoti 5:8) Ndi cakuti umonsi wiyo atatile imiyele iiyo, mama angapingulapo ukuti yapalukane ukulingana ni sunde lya uteeko pakuti aicingilile nu kucingilila ana yakwe. Kuya kwene, ya eluda yalinzile ukulolapo ningo  nu kusininkizya ukuti i cacumi avino cili. Ukukana sakamala ulupwa uku mufulo kungalenga umwi ukuzingwa umu cilongano.

Ukucuzya sana. Iya nanti umuci angaya sana nu unkalwe icakuti umi wa muze ungaya umu uzanzo. Ndi cakuti wino akucuzya uwakwe u Mwina Klistu, ya eluda umu cilongano yalinzile ukulondelezya pakuti yamanye ndi cacumi nanti foo. Ukuya sana ni cifukusi nu unkalwe kungalenga umwi ukuzingwa umu cilongano.—Galatiya 5:19-21.

Ukukanya ukupepa Leza. Iya nanti umuci angaalenga ukuti catalila sana uwakwe ukupepa Leza nanti angaezya nu kuti uwakwe atame masunde yakwe Leza muli vimwi. Ndi caya vivyo, uwakaele angapingulapo ukupalukana nu wakwe ukulingana ni sunde lya uteeko ndi cakuti ukucita vivyo i cingavwa sile “kuyela Leza, kuluta kuyela antu.”—Milimo 5:29.

Muli vyonsi vii vino twaalandapo ivingalenga aatwalana ukupalukana, pasi alinzile ukupatikizya uwakaele ukuti apalukane nu wakwe nanti ukutwalilila ukwikala nawe. Nanti cakuti ya cuza Aina Klistu aakoma umu utailo na ya eluda yangavwa nu kupeela ukusunda ukwaya muli Baibo, yatanga yamanye ivisinka vyonsi pali vino vikacitika lino aatwalana yali sile yoili apa ng’anda. Yeova sile aangalola vivyo. Iya nanti umuci Umwina Klistu angalanga ukuti asicindika Leza ni cupo ndi cakuti akulanda ivyaufi pa ntazi zino yakakwata pa ng’anda pakuti sile apalukane nu wakwe. Yeova akamanya vyonsi vino umwi akwelenganya, nanti i cakuti umwi angezya uli ukufisa cino wapingwilapo ukuti apalukane nu wakwe. I cumicumi, “vintu vyonsi mu uumbo onsi vili paswe nupya [Leza] wene akavilola. Swensi kwene tulinzile kuilondolwela kunoli.” (Ayebulai 4:13) Ndi cakuti ivingaletela Umwina Klistu uwatwalwa uzanzo vyatwalilila ukucitika umu cupo, kusi wino afwile ukupeela Umwina Klistu wiyo umulandu ndi wasoolola ukupalukana nu wakwe. Tulinzile ukwiusya ukuti, “swensi kwene tulimilila pa manso yakwe Leza kuti atupingule.”—Loma 14:10-12.