Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 115

Paladaise Apa Mpanga Ya Pansi

Paladaise Apa Mpanga Ya Pansi

LOLA imiti itali, maluwa asuma, ni myamba itali. Uzye vwile icalo cii asi iciyembe sana? Lola vino kacisongo kakulya umu minwe ya kalumendo. Nupya lola yacisama, lola ni mfalasi zyati-zimilila umumbali ya luzi. Uzye naawe ungatemwa ukwikala pa ng’anda apaya wakwe vii?

Leza akaalonda ukuti naawe kwene ukikale umu paladaise pano mpanga ya pansi. Nupya asyalonda ukuti uce wawaikwa uku vintu ivikacuzya antu ndakai. Vino Baibo yasoowela kuli yano yalikala umu paladaise ipya, aevi: ‘Leza wene alaya pamwi nayo. Kutalaya imfwa nanti ukulila, nanti ukuwaikwa. Vintu vya mpiti ala vyati-vipita.’

Lyene Yesu alasininkizya ukuti ivintu vyonsi ivisuma, vyati-vifikiliziwa. Uzye wamanya lino vilafikiliziwa? Vintu vii vilafikiliziwa ndi Yesu wazifya insi, kusisyapo iviipe vyonsi na antu aipe. Iusya ukuti lino Yesu wali pano nsi, wapoziizye antu andwala izipusane-pusane, nupya watuutulwile na afwe. Yesu wacisile vii ku kulangilila vino wali nu kwiza-cita apa mpanga ya pansi ndi waya umwene wa wene wakwe Leza.

Elenganya vino cilaziipa ukwikala umu nsi iipya! Yesu, pamwi na yano wasoolola, yalaateekela ukwiyulu. Ya kateeka kwene yaa, yalasakamala antu yonsi aalaya pano nsi, nupya yalasininkizya ukuti yonsi pyu yali ni nsansa. Fwandi leka tulole vino tulinzile ukucita pakuti nafwe Leza ace atupeele umi wa pe umu nsi ipya.

Umbwilo 21:3, 4; 5:9, 10; 14:1-3.