Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 114

Iviipe Vyonsi Vilasila

Iviipe Vyonsi Vilasila

UZYE i vyani vino ukulola pa cikope cii? Pali iumba lya onsi yati-yakwela pa mfalasi zitiswe. Nomba lolekesya kuno yakufuma. Mfalasi zikusimula pa makumbi ukufuma ukwiyulu. Uzye vwile ukwiyulu kwaya imfalasi?

Awe, nupya zii asi mfalasi zya cumi. Twalanda vivyo pano imfalasi zitanga zipite apa makumbi, asi avivyo? Nomba, Baibo ikati kwaya imfalasi ukwiyulu. Uzye watuumanya cino ikaalandila vivyo?

Pano insita imwi yaaomvyanga sana imfalasi uku nkondo. Fwandi, ndi Baibo yati antu yamwi yakwezile pa mfalasi yakufuma ukwiyulu ala ikutusambilizya ukuti Leza alalwa inkondo na antunze pano nsi. Uzye wamanya vino yaka-ama apaakulwila inkondo iyo? Yakati Alamagedoni. Inkondo iiyo, ilonoona iviipe vyonsi pano nsi.

Yesu Aliwe alatungulula umu nkondo ii iya Alamagedoni. Iusya ukuti Yesu ali wino Yeova wasoolwile ukuya umwene wa uteeko wakwe Leza. Fwandi ali cino Yesu azwaliile icisote ca wene. Alino ulupanga luno asenzile lukulangilila ukuti alonoona alwani yakwe Leza yonsi. Uzye tungazunguka ukuvwa ukuti Leza alonoona aipe yonsi?

Lola pa cikope icili umwilyasi 10. I vyani ivikucitika paapa? Pali Mulamba mukalamba uwonoonyile antu aiipe yonsi. A weni uwalenzile ukuti kuye mulamba wiya? A Yeova Leza. Ale lyene lola na pa cikope icili umwilyasi 15. Uzye pene i vyani ivikucitika? Misumba ya Sodoma na Gomola ikupya umu moto uno Yeova watumile.

Lyene nupya kupula apilyasi 33. Lola ivikucitikila imfalasi na maceleta ya ina Eguputo. A weni uwalenzile ukuti amanzi yumoole antu yaaya? A Yeova. Wayumoozile pakuti acingilile antu yakwe. Nakupya, lola icikope icili umwilyasi 76. Pene pakulangizya vino Yeova walenzile ukuti antu yakwe kwene, aina Izlaeli, yonoonwe pa mulandu nu kucita iviipe.

Fwandi, tutafwile ukuzunguka ukuti Yeova alatuma maumba yakwe ku kwiza sisyapo uyi onsi pano nsi. Nomba uzye ungati insi ilaya uli? Leka tulole umwilyasi ilikonsilepo..

Umbwilo 16:16; 19:11-16.