Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 107

Sitivini Yamutamoola Na Mawe

Sitivini Yamutamoola Na Mawe

UMONSI wino ukulola pa cikope uwatafukama, a Sitivini. Wali u musambi wakwe Yesu uwa cumi. Nomba, lola ivikumucitikila! Aonsi yaa, yakumutama ni vimawe ivikulu. Uzye i cani icaleenzile yamupate sana icakuti iyamucitila ni cintu iciipe vii? Leka tulole.

Leza wavwilizyanga Sitivini ukucita ivizungusyo. Aonsi yaa yataatemilwe vino wacitanga, nupya yaatandike ukupaazyanya na Sitivini pali vino wasambilizyanga antu icumi. Nomba, Leza wapeezile Sitivini amano sana, nupya Sitivini walangiliile ukuti aonsi yaaya yaasambilizyanga ivyaufi. Cii calenzile ukuti aonsi yaayo yasoke sana. Lyene yaamulemile, nu kwama antu akuti yalande ivyaufi pali Sitivini.

Simapepo mukalamba uzizye Sitivini ati: ‘Uzye ivintu vii, i vya cumi?’ Pa kwasuka, Sitivini walanzile ilyasi ilisuma sana ilya muli Baibo. Lino wamazile ukuvwanga, walanzile vino aonsi yamwi aipe yaapasile ya kasesema yakwe Yeova aaliko mpiti. Lyene walanzile ati: ‘Mwakolana na onsi kwene yaaya. Mwakomile Yesu umuomvi wakwe Leza, nupya musilondela masunde yakwe Leza.’

Cii calenzile ukuti yasimapepo yasoke cuze! Yaasosile icakuti iyaalumanya ni ncecete. Nomba, Sitivini lyene waloziizye amanso ukwiyulu nu kuvwanga ati: ‘Lolini! Nkulola Yesu wataimilila ukwikasa lilunji lyakwe Leza umwiyulu.’ Lino yuvwile vivyo, aonsi yaaya iisile amakasa apa matwi yao nu kulungama Sitivini. Yaamulemile nu kumukululula ukumufumya umu musumba.

Lyene yaazuuzile amakoti yao nu kupeela umulumendo Saulo ukuti ayasungileko. Uzye watuulola Saulo pa cikope? Lyene aonsi yamwi yaatandike ukutama Sitivini na amawe. Sitivini wafukiime wakwe vino ukulola apa cikope, nupya wapefile kuli Leza ati: ‘Yeova, utaca ukome antu yaa pa cintu cii cino yaacita iciipisye.’ Sitivini wamanyile ukuti yamwi pa onsi yaaya amutamile na mawe yaasomvilwe sile kuli yasimapepo. Lyene Sitivini wafwile.

Nga wemo, ndi cakuti umuntu umwi wakucitila iciipe, uzye ukalonda ukumucitila iciipe nanti ukuleenga Leza ukuti ace aonoone umuntu wiyo? Sitivini na Yesu yene asi vino yaacisile. Yaali ni cikuuku nu ku yantu kwene aataayatemilwe. Fwandi lyonsi kwene tufwile ukukolanya Sitivini na Yesu.

Milimo 6:8-15; 7:1-60.