Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 110

Timoti Watandika Ukwavwa Paulo

Timoti Watandika Ukwavwa Paulo

UMULUMENDO wino ukulola pa cikope ali na Paulo, a Timoti. Timoti akaikala uku Lisitala pamwi nu lupwa lwakwe. Iziina lyakwe nyina a Yunisi, na nyinakulu a Loisi.

Uu uumuku wakwe citatu uno Paulo waile uku Lisitala. Paapisile umwaka kufuma pano Paulo na Banaba yiziile uku kusimikila kuu umuku wa kutandikilako. Lyene paa Paulo wizile nupya ala ali nu muze, Sailasi.

Uzye watuumanya vino Paulo akuneena Timoti? Akumuzya akuti: ‘Uzye ungatemwa ukuti utulondele na Sailasi? Tukulonda ukuti ukatwazwe ukuyasimikila uku ncende zya kutali sana.’

Nawe Timoti ati: ‘Ee, ningatemwa ukulondela.’ Pataalengiile nu kulengela a vino Timoti wasile yalupwa apita na Paulo na Sailasi. Nomba, lino tutatala twasambilila pali vino yaapisile, leka tuvwe ivyacitikilanga Paulo. Paapisile imyaka 17 kufuma pano Yesu walolekiile kuli aliwe lino wayanga uku Damasiko.

Iusya ukuti Paulo wayanga uku Damasiko kuti akacuzye asambi yakwe Yesu, nomba paa, ala nawe kwene u musambi! Lino paapisile insita, alwani yaalondanga ukukoma Paulo pano yataatemilwe vino wasambilizyanga pali Yesu. Nomba asambi yauze izile yavwa Paulo ukuti autuke. Yaamulonzile muli basiketi nu kuyamupisizya papela ya ciumba ica musumba.

Kufuma papo, Paulo waile uku kusimikila uku Antioki. Kuuku ali kuno alondezi yakwe Yesu yaatandikiilepo ukwamwa ukuti Aina Klistu. Lyene Paulo na Banaba yaayatumile ukufuma uku Antioki nu kuya uku kusimikila uku mpanga zya kutali. Umusumba umwi uno yaatandaliile wali a Lisitala kuno Timoti wikalanga.

Lyene lino paapisile mupiipi nu mwaka onga, Paulo waswiliile uku Lisitala umuku wakwe ciili. Lino Timoti wapisile na Paulo na Sailasi, uzye watuumanya kuno yaaile? Lola pali maapu uleke tumanye incende zimwi-zimwi kuno yaaile.

Yaatandikiilepo ukuya uku musumba uwayeliile apiipi uwa Ikoniamu, nga alino yaaile uku musumba nauze uno yatangi Antioki. Kufuma kuuku, yaapisile yaya uku Tuloa, alino yaya uku Filipi, ku Tesalonika, nu ku Beleya. Uzye watuulola apayeliile Atena pali maapu? Paulo waile asimikila na kuuku kwene. Ukufuma kuuku yaaile uku Kolinto yaya-yamala umwaka onga ni myezi 6 ala yakusimikila. Alino yaaile-yafika uku Efeso, kuno yaateenzi sile insita inoono. Nga alino yaakwezile uwato yatandika ukuweluluka, iiza-yafika uku Kesaliya, nu kutwalilila ulendo iyaya yafika uku Antioki kuno Paulo wikalanga.

Fwandi Timoti wapisile intamfu itali wakwe cimwi ala akwazwilizya Paulo ukusimikila “ilandwe lisuma” nu kutandika ivilongano ivya Ina Klistu ivingi. Nga wemo nga waca-wakula, ulaaombela Leza wakwe vino Timoti wacisile?

Milimo 9:19-30; 11:19-26; ivipande 13 kufika uku 17; 18:1-22.