Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 92

Yesu Watuutulula Umufwe

Yesu Watuutulula Umufwe

UMUKAZYANA wino ukulola paa ali ni myaka ya kuvyalwa 12. Yesu watamulema umu minwe, na avyazi ya mukazyana wii yaimi apiipi. Uzye watuumanya cino yayeliile ni nsansa vii? Leka tuvwe vino caali.

Isi wa mukazyana wii wali umucindame sana, ni ziina lyakwe a Yailo. Wanda umwi umukazyana wii walwile, iyamulaalika na pa musanzi. Nomba ataapozile. Walwalilangako sile. Lyene isi na nyina yaasakamiile sana, pano yaaweni ukuti umwanao amaafwa. Wali ali mwana wao wenga sile. Awe, a vino Yailo waile uku kulonda Yesu. Uvwile ukuti Yesu wacitanga ivizungusyo sana.

Lino Yailo wazanyile Yesu, kwali antu aingi cuze ala iyamuzinguluka. Nomba, Yailo waipatikizye umu yantu mpaka ayafika na pali Yesu nu kumufukamila. Lyene wanenyile Yesu ati: ‘Umwanane umukazyana watalwalisya.’ Alino amulenga ati: ‘Napaapata, twapita ukamupozye.’ Nawe Yesu wazumiile ukuya kweneko.

Lino yaapitanga, kwali iumba lya yantu aalondanga ukupalamila Yesu. Nomba mukupumikizya, Yesu wimiliile. Nga alino aiza-uzya ati: ‘A weni uwandema?’ Yesu wamanyile ukuti kwali umwi uwamulemile, pano uvwile amaka yafuma umu mwili. Nomba, a weni uwamulemile? U mwanaci umwi uwalwile sana pa myaka 12. Aliwe wizile alema ivizwalo vyakwe Yesu, nu kupola apola!

Yailo uvwileko ningo pano waweni ukuti fwandi Yesu wakwata sana amaka ya kupozya alwale. Nomba kwizile inkombe iyaleesile ilyasi. Inkombe iiyo yaneenyile Yailo iti: ‘Tiini ukucuzya Yesu. Umwaninu watafwa.’ Lino Yesu uvwile vivyo, waneenyile Yailo ati: ‘Utasakamala, amazyuka.’

Lino yaafisile uku ng’anda yakwe Yailo, yaazanyile antu yakuloosya wakwe cimwi. Nomba Yesu wayaneenyile ati: ‘Mutaalila. Umwana wii atafwile. Aizi sile.’ Nomba antu yeene yaatandike ukuseka Yesu nu kumusoweka, pano yeene yaamanyile ukuti umukazyana wafwile.

Awe, a vino Yesu wasenzile avyazi ya mwana alino na atumwa yakwe yatatu nu kwingila umu muputule muno yaalaalike umwana. Lyene walemile umwana umu minwe, alino avwanga ati: ‘Katuka!’ Avino umukazyana wiyo watuutulwike wakwe vino ukulola pa cikope. Wakatwike atandika nu kupita! Fwandi ali cino isi na nyina yayelile ni nsansa vii.

Wi asi ali wino Yesu watandikiilepo ukutuutulula uku yafwe. Baibo ikati uwatandikiilepo, u mwana umonsi wakwe mukamfwilwa uwa mu musumba wa Naini. Nupya, Yesu wizile-atuutulula Lazalo kalume wakwe Maliya na Mata. Lino Yesu alaateeka insi umu wene wakwe Leza, alatuutulula afwe aingi wakwe cimwi. Cintu cii cikatuzanzya sana, asi avivyo vwile?

Luka 8:40-56; 7:11-17; Yoane 11:17-44.