Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 65

Uwene Yaupaatula Paili

Uwene Yaupaatula Paili

UZYE watuumanya cino umonsi wii akulepoolela umwingila wakwe? Yeova aaliwe watamuneena ukuti alepoole. Umonsi wii a Aiya kasesema wakwe Leza. Uzye wamanya vino cikapiliula ndi yati kasesema? Kasesema kuli kuti umuntu wino Leza akaaneenela limwi ivintu ivilacitika uku nkoleelo.

Paa, Aiya akuneena Yeloboamu amazwi yamwi. Yeloboamu u monsi umwi wino Solomoni wasoolwile ukutuungulula umulimo umwi lino kwali ukukuula. Lino Aiya wakomanyile na Yeloboamu apa nzila, Aiya wacisile icintu cimwi cakuzungusya. Wazuzile umwingila wakwe nu kutandika ukuulepoola umu tumpilinsya 12. Nga alino wamuneenyile ati: ‘Toolapo utumpilinsya 10.’ Uzye watuumanya cino Aiya wapeeliile Yeloboamu utumpilinsya 10?

Aiya walanzile ukuti Yeova wali nu kupoka Solomoni uwene. Walanzile nu kuti Yeova wali nu kupeela Yeloboamu uwene wa mitundu 10. Kuli kuti mitundu iili sile i yaali nu kusyala umu wene uno Leoboamu mwana Solomoni wateekanga.

Lino Solomoni uvwile vino Aiya waneenyile Yeloboamu, wasosile cuze. Walondanga nu kukoma Yeloboamu. Nomba Yeloboamu utukiile uku Eguputo. Paapisile sile insita inoono, Solomoni wafwile. Wali umwene pa myaka 40, nomba lyene uwizile atandika ukuteeka a Leoboamu umwanakwe. Lino Yeloboamu wali uku Eguputo, uvwile ukuti Solomoni wafwa, acino, wawezile uku Izlaeli.

Leoboamu ataali umwene musuma foo. Wene wifile umwenzo ukucila na vino isi Solomoni wali. Lyene wanda umwi Yeloboamu na aonsi yamwi aacindikwe yaaile ku Mwene Leoboamu nu kuyamuleenga ukuti aasakamala antu. Nomba Leoboamu wakaanyile ukuvwa. Lyene a lino wacizilemo ukucuzya antu. Acino antu yaasoolwile Yeloboamu ukuya umwene wa mitundu 10, suka sile imitundu iili yakwe Benjamini na Yuda iyasiile ikuteekwa na Leoboamu.

Yeloboamu ataalondanga ukuti antu yaaya uku Yelusalemu ku kupepa Yeova apa ng’anda ya kupepelapo. Lyene wapanzile utwana twa ng’ombe twakwe goldi twili nu kuneena antu amu mitundu 10 ukuti yaapepa tutukwene. Pataalengiile nu kulengela impanga iiya yaziile unkalwe nu upondo.

Nu mu wene wa mitundu iili namo kwene mwali intazi. Pataapisile ni myaka 5 kufuma pano Leoboamu watandikiile ukuteeka, umwene wa Eguputo wizile uku kulwisya Yelusalemu. Wizile asenda iviya vya mutengo ivyali umu ng’anda ya kupepelamo Yeova. Fwandi, ing’anda ya kupepelamo yali ningo pa nsita sile inoono.

1 Yamwene 11:26-43; 12:1-33; 14:21-31.