Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 67

Yeosafati Wataaile Yeova

Yeosafati Wataaile Yeova

UZYE watuyamanya aonsi yaa, nupya watuumanya vino yakucita? Yakuya uku nkondo, na onsi aali nkoleelo yakwimba. Nomba limwi unguzya uti: ‘Ngi cani cino yaayo aakwimba yatasendiile masumo ni mpanga?’ Leka tuvwe vino caali.

Pa nsita ii Yeosafati aliwe wali umwene wa wene wa mitundu iili iya Izlaeli. Wateekanga pa nsita lino umu wene wa mitundu 10 mwali umwene Aabu na Yezebele. Nomba Yeosafati wali umwene musuma, na isi Asa nawe kwene wali umwene musuma. Pa myaka iingi antu amu wene wa mitundu iili iikalanga ningo sana.

Nomba kwacitiike icintu cimwi icatiinyizye sana antu. Yamwi izile-yaneena Yeosafati yati: ‘Kuli maumba ya asilika aakwiza umu kutulwisya yakufuma uku Moabu, ku Amoni nu ku Mwamba wa Seili.’ Aina Izlaeli yakolongiine uku Yelusalemu kuti yalenge uwazwilizyo kuli Yeova. Lino yaile uku ng’anda ya kupepelamo, Yeosafati wapefile ati: ‘Yeova, Leza witu, tutamanyile ivyakucita. Tutakweti maka akulwisya maumba yaa. Tukuleenga ukuti wewe utwazwe.’

Yeova uvwile, lyene watumile umuomvi umwi ukuneena antu ati: ‘Ulwi asi winu, u wakwe Leza. Mwemo mutalalwako. Mukaalola sile vino Yeova alamupususya.’

Acino uwanda uwalondeliilepo akatondo Yeosafati waneenyile antu ati: ‘Mutaile Yeova!’ Lyene wisile antu aakwimba uku nkoleelo ala yakwimbila Yeova malumbo, alino ipalondela asilika, iyatandika ukupita. Uzye watuumanya icacitiike lino yaapaliime ukwayeliile inkondo? Yeova walenzile alwani ukutandika ukukomana aineco. Lino aina Izlaeli yaafisile, yaazanyile alwani yonsi iyafwa!

Fwandi Yeosafati wacisile ica mano ukutaila Yeova, asi avivyo? Nafwe nga tukutaila Yeova, ala tuli na mano.

1 Yamwene 22:41-53; 2 Milandu 20:1-30.