Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 76

Musumba Wa Yelusalemu Onoonwa

Musumba Wa Yelusalemu Onoonwa

PAAPISILE imyaka 10 ukufuma pano Nebukadineza wasendiile aina Izlaeli aali asambilile sana nu kuyatwala uku Babiloni. Nomba, lola lyene icikucitika paa! Yelusalemu akupya nu moto. Lyene aina Izlaeli aatumoozilwe yakuyasenda umu uzya uku Babiloni.

Iusya ukuti vii, ali vino ya kasesema yakwe Yeova yaasoowile ukuti avino cilaya nga antu yatatiile imiyele yao iipe. Nomba aina Izlaeli yatuvwilile vino ya kasesema yalandanga. Yaatwalilile sile ukupepa tu leza twaufi, kucila ukupepa Yeova. Fwandi, u lwao kayayafulule. Na cino twalandila vii pano kasesema Ezekelo akatusambilizya ukuti antu yaaya yaacitanga ivintu iviipe sana.

Uzye wamumanya Ezekelo? U mulumendo wino Umwene Nebukadineza wasenzile uku Babiloni pamwi na alumendo yauze aingi ala kucili imyaka 10 lino Yelusalemu ataatala onoonwa. Danieli na auze yatatu Syadilaki, Mesyaki na Abedinego nayo kwene yaayasenzile pa nsita iili yonga kwene.

Lino Ezekelo wali uku Babiloni, Yeova wamulanzile ivintu iviipe ivyacitikanga apa ng’anda ya kupepelapo umu Yelusalemu. Pa kumulanga vii, Yeova waomvizye icizungusyo. Ezekelo wali kuuku kwene uku Babiloni, nomba Yeova wamulenzile ukuti alole vyonsi ivyacitikanga apa ng’anda ya kupepelapo. Vino Ezekelo waweni, vitaazifile foo!

Yeova waneenyile Ezekelo ati: ‘Lola ivintu vya winyi vino antu yakucita apa ng’anda ya kupepelapo. Lola vino pa viumba yaalembolapo vikope vya nzoka alino ni vya nyama. Kapya lola vino aina Izlaeli yakuvipepa ivintu kwene vii!’ Ezekelo waweni vyonsi vii, nupya walemvile ivyacitikanga.

Lyene Yeova uzizye Ezekelo ati: ‘Uzye watuulola vino intunguluzi zya ina Izlaeli zikucita uku mbali?’ Navyo kwene Ezekelo waviweni. Waweni aonsi 70 ala yonsi kwene yakupepa tu leza twaufi. Yakuti: ‘Yeova asikutulola. Wataazyela impanga ii.’

Nupya, Yeova alanga Ezekelo anaci yamwi ala yali lwa pa mpongolo iyayela uku kaeya ka ng’anda ya kupepelapo. Yateenzi yakupepa ka leza kaufi kano yatangi Tamuzi. Nakapya, amulanga aonsi yamwi yali lwa pa mulyango wa kwingilila umu ng’anda yakupepelamo. Yafisile na kuli 25. Nawe Ezekelo ayalola. Yakukontamila ilanzi uku ufumondaka!

Lyene Yeova aizati: ‘Antu yaa yasyancindika foo. Yakucita iviipe nupya yakufika nu ku ng’anda yane kwene akuno yakucitila ivintu vii!’ Nga alino Yeova alaya ati: ‘Yalalola vino nkasoka. Napya ntalayuvwila nu luse lino yalayumoola.’

Paapisile sile imyaka itatu kufuma pano Yeova walangizye Ezekelo ivintu vii, na ina Izlaeli iyapondokela Umwene Nebukadineza. Nawe waile uku kuyalwisya. Mu mwaka onga ni myezi 6 aina Babiloni ingiile umu musumba nu kuoca onsi pyu. Antu aingi yumoozilwe, yauze nayo yaayasenzile umu uzya uku Babiloni.

Ngu mulandu ci uno Yeova walekiile ukuti aina Izlaeli yayacuzye vii? Pano yatuvwilile Yeova, nupya yatalondelanga masunde yakwe. Fwandi cii cikutulanga ukuti cacindama sana ukuti lyonsi kwene twacita vino Leza walanda.

Pa kutandika, antu anoono yaayasiile ukuti yaikala umu Izlaeli. Umwene Nebukadineza wasoolwile umuYuda umwi wino yatangi Gedaliya ukuti ayatungulula. Nomba uwanda umwi aina Izlaeli yumoozile Gedaliya. Lyene antu yaatiinyile sana yati limwi aina Babiloni yaliza yumoole yonsi pa cintu iciipe cino yaacisile. Acino, yapatikizye Yelemiya ukuti yutuke nawe, nu kupuukila uku Eguputo.

Lyene umu mpanga ya ina Izlaeli mutaasiile umuntu nandi umwi. Pa myaka 70 kutaali umuntu uwikazilemo. Impanga yasyazile itongwa. Nomba, Leza walavile antu yakwe ukuti alayaswilizya uku mpanga kwene iiya ndi papita imyaka 70. Uzye lyene, i cani icacitikilanga antu yakwe Leza kuno yaayasenzile uku Babiloni? Leka tuvwe..

2 Yamwene 25:1-26; Yelemiya 29:10; Ezekelo 1:1-3; 8:1-18.