Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 51

Luti Na Naomi

Luti Na Naomi

MULI Baibo mwaya ibuku lino yaka-ama ukuti Luti. Umwibuku lilyo mwaya ilyasi ilikalanda pa lupwa lumwi ulwaliko lino aina Izlaeli yaatungululwanga na yakapingula. Luti wali u mukazyana wa ku mpanga ya Moabu; wene ataali uwa mu luko lwa ina Izlaeli. Nomba, lino Luti wasambilile pali Yeova Leza ukuti ali wa cumi, wizile atemwa sana Leza. Naomi umukoloci aliwe wasambiliizye Luti pali Yeova.

Naomi wali u mwanaci umwina Izlaeli. Lino ivyakulya vyaceefile umu Izlaeli Naomi nu wakwe, pali pamwi na aana yao yaili aonsi, yaakukiile uku mpanga ya Moabu. Muka Naomi wafwilile uku Moabu kwene. Kufuma papo, ana yakwe Naomi yaatwazile anaci aina Moabu, Luti na Olipa. Nomba lino paapisile imyaka 10, ana yakwe Naomi aonsi yaafwile. Caifile sana kuli Naomi na akazyana yaaya! Nga lyene Naomi wacisile uli?

Wanda umwi Naomi wapingwilepo ukuswilila kuli yalupwa ukutali sana. Luti na Olipa yalondanga ukuti yaikala sile na Naomi, a cino yalondiile lino wakatwike. Nomba, lino yaapisile sile intamfu inoono, Naomi waneenyile akazyana ati: ‘Mwe, swililini mukaikala na yanyoko.’

Naomi aiza ayatonsola nu kuyapakasya. Lyene akazyana yaatamfile ukulila pano yaamutemilwe sana Naomi. Nga iiza yati: ‘Awe! Fwemo tukulondela kuli yalupwa inu.’ Nomba Naomi aiza-asuka ati: ‘Mwemo swililini sile yanane. Cilaziipa nga mwikala uku mwinu.’ Awe, avino Olipa waswilile uku mwao. Nomba Luti wene wasiile.

Nga alino Naomi aiza-muneena ati: ‘Umuzo Olipa wataswilila. Naawe kwene swilila umulondele.’ Nomba Luti aasuka ati: ‘Mutaleka nswilile, imusye! Lekini imulondele. Kuno mulaya a kuno ndaya, na kuno mulaaikala a kuno ndaikala. Antu inu yalaya antu yane, na Leza winu alaya Leza wane. Kuno mulafwila ali kuno ndafwila, nupya aali kuno yalanziika.’ Lino Luti walanzile vii, Naomi watiile ukumuneena kuti aswilile.

Awe, avino yaafisile nu ku Izlaeli. Kuu ali kuno yaatandike ukwikala. Luti watandike ukuomba umu vyalo, pano ala antu yaatandika ukuzombola baale. Kwali umonsi umwi uwiziina lyakuti Boazi uwazumilizye Luti ukuti aatoolelezya tu baale utwasyalanga umu vyalo. Uzye watuumanya iziina lyakwe nyina wakwe Boazi? A Laabu uwa mu musumba wa Yeliko.

Lyene uwanda umwi Boazi waneenyile Luti ati: ‘Nuuvwa ivingi vino antu yakalanda pali wewe, na vino ukasakamala Naomi. Namanya vino wasiile so na nyoko ni mpanga inu, na vino wizile uku kwikala na antu yano utaamanya. Ngala Yeova aye naawe!’

Nawe Luti alikwiza asuka ati: ‘Mukwai nataizya pa cikuuku cino mwandanga. Mwansansamusya sana pali vino mwaneena.’ Boazi wizile atemwa sana Luti icakuti pataalengiile iiza yatwalana nu kutwalana. Naomi watemilwe cuze! Nomba Naomi watemilwe sana lino Luti na Boazi yavyiile iyeli nu kumutemela iziina lyakuti Obedi. Lino paapisile imyaka, Obedi wizile aya sikulu wakwe Davidi; uku nkoleelo tulasambilila ivingi sana pali Davidi

Ibuku lya muli Baibo lyakwe Luti..