Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 34

Vyakulya Vino Aina Izlaeli Yataalolapo

Vyakulya Vino Aina Izlaeli Yataalolapo

UZYE watuumanya tuno antu yakuzyola apansi utukuloleka pa cikope? Tukuloleka ngati amawe ya mvula. Ututiswe, nupya utupapatane ngati utupaapa. Nomba, asi mawe ya mvula; i vyakulya.

Iipapita apiipi ni myezi iili pano aina Izlaeli yaafumiile uku Eguputo. Yali umu lwanga. Mukamela sile utwakulya utunoono, acino antu yakuilizyanya yakuti: ‘Fwandi ngacaziifile Yeova atumoola lino tucili uku Eguputo. Pano kuuku twalyanga ivyakulya vino twalondanga swe-eneco.’

Lyene Yeova alanda ati: ‘Namalenga ivyakulya ukutoonya ukufuma ukwiyulu.’ Nupya vivyokwene avino Yeova wacisile. Uwanda uwalondeliilepo lino aina Izlaeli yaaweni utuuntu tuu ututiswe twati-tupona ukufuma ukwiyulu, yaatandike ukuuzyanya yakuti: ‘Utwani tuu?’

Mose walanzile ati: ‘Vii, i vyakulya vino Yeova watamupeela ukufuma ukwiyulu.’ Antu yaatandike ukwama ivyakulya kwene vii yakuti a MAANA. Vyuvwikanga ngati umukate upapaatane uno iikako uuci.

Mose waneenyile antu ati: ‘Cila-muntu aazyola vino angakwanisya ukulya.’ Lyene yaatandike ukucita vivyokwene cila-wanda akatondo. Lyene ndi kwakaya, maana uwasyala apa musili ala amasunguluka.

Mose walanzile nu kuti: ‘Kusi wino afwile ukusunga maana usiku onsi ukufika uwanda uwalondelelapo.’ Nomba yamwi yatuvwilile vino Mose wayaneenyile. Uzye watuumanya lyene icacitikaanga? Uwanda uwalondelelapo ndi wafika, maana wino yasunzile ala amakwata ingonyo, nu kutandika ukununka!

Nomba, uwanda onga umu mulungu wene, Leza waneenyile aina Izlaeli ukuzyola maana umwingi. Uu u wanda wakwe mutanda (6). Na Yeova wayaneenyile ukusunga maana umwi ukufika uwanda ulondeliilepo, pano Yeova ataaponyanga maana pa wanda wakwe cinimbali (7). Ndi yasunga maana ukufika pa wanda wakwe cinimbali, ataakwatanga ingonyo nupya ataanunkanga! Cii naco caali i cizungusyo na cuze ukufuma kuli Leza!

Imyaka yonsi ino aina Izlaeli yaatwaliliile ukwikala umu lwanga, Yeova watwaliliile ukuyaliisya maana.

Kufuma 16:1-36; Mpendwa 11:7-9; Yoswa 5:10-12..