Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 23

Viloto Vino Falao Waloosile

Viloto Vino Falao Waloosile

PAAPISILE imyaka iili, ala Yosefu acili umu cifungo. Umukalamba wakwe ya kapeela ya vyakumwa atamwiwisye zuwa. Lyene wanda umwi usiku, Falao waloosile iviloto ivitale ukwilula, nupya ataamanyile nu upiliulo wa viloto vivyo. Uzye watumulola apa cikope aizi? Lyene uwanda uwalondeliilepo, Falao wamile aonsi yamano nu kuyaneena vino waloosile. Nomba, yafizilwe ukumwilwila iviloto viivi.

Pa nsita iiya, apano umukalamba wakwe ya kapeela ya vyakumwa wiwisye Yosefu. Waneenyile Falao ukuti: ‘Lino naali umu cifungo, kwali umonsi umwi uwilulaanga iviloto.’ Lilyo kwene sile, Falao watumile aomvi ukuya-fumya Yosefu umu cifungo.

Falao wasimikiile Yosefu iviloto ati: ‘Naweni ing’ombe cinimbali (7) izisuma nupya iziine. Nupya nizile indola ing’ombe nazyuze cinimbali (7) izyonde sana. Ni ng’ombe izyonde zizile-zilya ing’ombe iziine.

Umu ciloto cakwe ciili, naweni imitwe ya vilimwa vya mpeke cinimbali (7) ni impeke izingi. Lyene nizile ndola utumitwe twa vilimwa vya mpeke tuuze cinimbali (7) utunyale nupya utuume. Nu tumitwe utunyale utwa vilimwa vya mpeke twatandike ukumila imitwe cinimbali (7) iya vilimwa vya mpeke ivisuma.’

Nawe Yosefu waneenyile Falao ukuti: ‘Iviloto vyonsi vyoili vikupiliula sile icintu conga. Ing’ombe cinimbali iziine ni imitwe ya vilimwa vya mpeke isuma cinimbali, vikupiliula imyaka cinimbali, ni ng’ombe izyonde sana alino nu tumitwe twa vilimwa vya mpeke utunyale vikupiliula imyaka na yuze cinimbali. Kulaya imyaka cinimbali lino ivyakulya vilavula sana umu Eguputo. Lyene kulaya imyaka nayuze cinimbali lino ivyakulya vilaceepa sana umu Eguputo.’

Nga alino Yosefu aiza-neena Falao ukuti: ‘Soolola umonsi wa mano kuti aangalila umulimo wa kukolonganika ivyakulya umu myaka cinimbali lino ivyakulya vilavula. Lyene antu yatalaya ni cipowe lino ivyakulya vilaceepa umu myaka cinimbali iilalondelelapo.

Falao watemilwe sana pali vino Yosefu wamuneenyile. Nupya wasoolwile Yosefu kwene ukukolonganika ivyakulya, nu kuvisunga ningo. Yosefu wizile aya umuntu umucindame sana umu Eguputo, wali ali wakwe ciili kuli Falao.

Lino papisile imyaka cinani (8), ala kwaya sana icipowe, Yosefu waweni aonsi yamwi yakwiza. Uzye watuyamanya aonsi yaayo? Aasilenzi ikumi (10)! Ala papo isi Yakobo watayatuma uku Eguputo pano ivyakulya vyaceefile sana uku Kenani kuno yaafumile. Yosefu wayamanyile aina yakwe, nomba yene yataamumanyile. Uzye watuumanya umulandu? Pano pa nsita ii ala Yosefu wakula, nupya wazwite ivizwalo ivipusaneko.

A pano Yosefu wiwisye ukuti lino wali umulumendo, waloosile aina yakwe yakwiza uku kumufukamila. Uzye ukwiusya ilyasi lii lino wawelenzile? Fwandi Yosefu waweni ukuti a Leza uwamutumile uku Eguputo kuti akamuomvye. Nomba uzye watumanya vino Yosefu wacisile? Leka tuvwe.

Utandiko 41:1-57; 42:1-8; 50:20.