Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 22

Yosefu Yamuyalila Umu Cifungo

Yosefu Yamuyalila Umu Cifungo

YOSEFU wali sile ni myaka 17 lino yaamusenzile uku Eguputo. Lino yaafisile kuuku, yaamukazizye kuli Potifa. Potifa wali u muomvi wa mwene uwa Eguputo, wino yatangi Falao.

Yosefu waombesyanga sana ndi Potifa wamupeela imilimo. Lyene lino Yosefu wakuzile, Potifa wamupeezile umulimo wa kwangalila aomvi ya mu ng’anda yakwe yonsi. Nomba, uzye u mulandu ci uno Yosefu ayeliile umu cifungo? A pa mulandu wakwe muka Potifa.

Yosefu wakuzile aya umulumendo uwalolekanga ningo sana; lyene muka Potifa walondanga ukuti alaale nawe. Nomba Yosefu wakaanyile, pano wamanyile ukuti ukucita vivyo, i cintu iciipe sana. Umuci wakwe Potifa wasosile cuze. Lino uwakwe wizile uku ng’anda, wasomvile ati: ‘Yosefu u mwipe sana, wali akulonda ukulaala nani!’ Potifa wazumiile vino umuci wamuneenyile, nu kusokela sana Yosefu. Avino watumile aomvi ukuyalila Yosefu umu cifungo.

Umonsi uwangalilanga icifungo waweni ukuti Yosefu wali umuntu uwa miyele isuma. Wamwisile ukuya uwa kwangalila auze yonsi aanyepwa umu cifungo. Lino paapisile amanda, Falao wasokiile umukalamba wakwe ya kapeela ya vyakumwa kumwi na kapaanga wa mukate, nu kuyalila yonsi yoili umu cifungo. Wanda umwi yonsi yoili yaaloosile iviloto vino yaafizilwe ukwilula. Uwanda uwalondeliilepo, Yosefu wayaneenyile ati: ‘Neeniini iviloto vino mwaloosile.’ Lino yaamuneenyile, Leza wavwilizye Yosefu ukwilula iviloto vyao.

Yosefu waneenyile umukalamba wakwe ya kapeela ya vyakumwa ati: ‘Kwasyala sile amanda yatatu ukuti yakufumye umu cifungo, ulaya umukalamba wakwe ya kapeela ya vyakumwa nupya.’ Yosefu alanda nu kuti: ‘Ndi wafuma, uce undandileko kuli Falao, pa kuti incemfume muno.’ Nomba, kuli kapaanga wa mukate Yosefu walanzile ati: ‘Kwasyala sile amanda yatatu ale Falao wakuputulako umutwe.’

Lino paapisile amanda yatatu, vino Yosefu walanzile vyacitiike. Kapaanga wa mukate yamuputwileko umutwe. Lelo, umukalamba wakwe ya kapeela ya vyakumwa wene yaamufumizye umu cifungo atandika nu kuombela umwene nupya. Nomba, umukalamba wakwe ya kapeela ya vyakumwa atiiwisye Yosefu! Ataaneenyile Falao pali Yosefu; avino na Yosefu watwaliliile ukwikala umu cifungo.

Utandiko 39:1-23; 40:1-23.