Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 7

Umonsi Umusipe

Umonsi Umusipe

LINO antu yaatandike ukuvula pano nsi, aingi yacitanga iviipe wakwe Kaini. Nomba, umonsi wenga wene wapusiineko. Umuntu wiyo ali wi paa, ni ziina lyakwe a Enoki. Enoki wali umonsi umusipe sana. Antu yonsi aaliko umu nsita yakwe Enoki yaacitanga ivintu iviipisye, nomba Enoki wene watwaliliile ukuombela Leza.

Uzye watuumanya cino antu yaaya yacitilanga ivintu iviipisye? I cisuma, tala elenganya, A weni uwalenzile ukuti Adamu na Eva yapondokele Leza nu kulya icizao cino Leza wayalesiizye? Ee, wali umungeli umwipe. Baibo ikamwama ukuti Satana. Nupya a kaezya umuntu ali wensi ukuti aacita iviipe.

Uwanda umwi, Yeova Leza waneenyile Enoki ukuneena antu ivintu vimwi vino yatalondanga ukuuvwa. Vino wayaneenyile aevi: ‘Uwanda umwi Leza ali nu konoona antu yonsi aipe.’ Antu yafwile yaakaliipe cuze lino yuvwile mazwi kwene yaa. Limwi yalondanga nu kumoola Enoki. Fwandi acino Enoki walondekanga sana ukusipa pa kuneena antu yaaya vino Leza wali nu kucita.

Leza ataalesile Enoki ukuya nu umi insita itali pamwi nantu yaaya aipe. Enoki wikazile sile imyaka 365. I cani cino twalandila twati “imyaka sile 365”? Pano insita iiya antu yaali akome sana, nupya iikalanga imyaka iingi ukucila vino caya ndakai. Icakuzungusya icakuti, Metusela mwana Enoki wene wikazile imyaka 969!

Nomba, lino Enoki wafwile, antu yaatwaliliile sile ukwipilako. Baibo ikati, ‘vyonsi vino yelenganyanga vyali iviipe vitupu,’ nu kuti ‘insi yaziile sile nu unkalwe.’

Uzye watuumanya icalenzile ukuti kuye sana intazi pano nsi umu manda yaaya? A pa mulandu wakuti Satana watandike ukuomvya inzila yuze iya kutunkilamo antu ukucita ivintu iviipe. Tuli nu kusambilila pali cii umu cipande icilondiilepo..

Utandiko 5:21-24, 27; 6:5; Ayebulai 11:5; Yuda 14, 15.