Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Ibuku Lyane Ilya Malyasi Amuli Baibo

 ILYASI 3

Umonsi Nu Mwanaci Akutandikilapo

Umonsi Nu Mwanaci Akutandikilapo

UZYE i cani icipusineko pa cikope cii? Ee, pali antu. Yaa, u monsi nu mwanaci akutandikilapo. Uzye a weni uwayaumvile? A Leza. Uzye wamanya iziina lyakwe? A Yeova. Nupya, Leza watemiile umonsi iziina ukuti Adamu, lyene umwanaci nawe yamutemiile ukuti Eva.

Vino Yeova Leza wacisile pa ku-umba Adamu aevi: Watoozile ulukungu ukufuma uku musili nu kupanga umwili wa monsi umalilike. Lyene wapuusile umuza umu mpuno zya monsi, avino Adamu wizile aya uwa umi.

Yeova Leza wapeezile Adamu umulimo. Waneenyile Adamu ukutemela inyama izipusane-pusane amaziina. Adamu afwile walolanga inyama apa nsita itali, fwandi wasoololanga ningo amaziina ya kuzitemela. Lino Adamu watemelanga inyama amaziina, watandike ukwiluka pa cintu cimwi. Uzye watucimanya icintu cico?

Inyama zyonsi izyaliko, paali kalume na kaci. Kwali inzovu kalume ni inzovu kaci, alino kwali ya cisama yakalume na yacisama yakaci. Nomba Adamu wene wali sile wenga. Acino Leza walaalike adamu utulo utwingi, nu kumufumya ulumbazo. Ukuomvya ulumbazo kwene luulo, Yeova waumbiile Adamu umwanaci, nu mwanaci wiyo aya umuci wakwe Adamu.

Adamu watemilwe sana! Nupya elenganya vino Eva wazanzile lino yamwisile umu calo icisuma cuze ukuti aikala mwenemo! Lyene yaali nu kukwata ana nu kwikala nayo umu nsansa.

Yeova walondanga Adamu na Eva ukwikala amanda pe. Walondanga ukuti yace yaziifye insi yonsi ukuti ice iyaloleka ningo wakwe vino icalo ca Edeni caali. Adamu na Eva yaali sana ni nsansa lino yelenganyanga pa kuomba umulimo kwene uu! Nga wemo, uzye nga watemilwe ukuzifyako insi ukuti iyaloleka ningo? Nomba, insansa zino Adamu na Eva yaakweti, zitatwaliliile foo. Leka tulole icalenzile.

Masamu 83:18; Utandiko 1:26-31; 2:7-25.