Skip to content

Muye pa utantiko unono

Muye pa utantiko wa vilimo

Inte Zyakwe Yeova

Cimambwe-Lungu

Masuko uku Mauzyo 10 Yano Acance Yakauzya

 3

Ningacita Uli Ndi Nkulanda na Avyazi Yane?

Ningacita Uli Ndi Nkulanda na Avyazi Yane?

UMULANDU UNO CICINDAMILE UKUMANYA

Ndi cakuti mukulanzyanya ningo na avyazi yako, umi wako ulaya ningo sana.

I VYANI VINO UNGACITA?

Elenganya ukuti vii vikucitika: A pali citatu manguzi. Geoff, aali ni myaka 17, wamala ukuomba imilimo yonsi ino wali akweti, nomba akulonda apuze lyene. Wasya TV wikala na pa mupando uno watemwa sana watandika nu kutamba.

Lino papita kasita ya Isi ingila, ala yasi ni nsansa.

Ya Isi yati: “Geoffrey! I cani cino utuwikalila ukusumba insita ukutamba TV icakuti wazwe umuto wako ukuzana omuweki? Wemo usicita vino yakunena ukucita.”

Geoff waitotoza asikulonda kuti yamuvwe wati: “Nupya kwene yatandika ivya kuvwanga vwanga.”

Ya Isi yapalamila. Yati: “Watuuli?”

Geoff wisya mwenzo ala akuzingulusya amanso lyene wati: “Pasi Tata.”

Nomba ya Isi yasoka sana. Yalanda ala iyasoka yati: “Utakaswilizyepo ukulanda vivyo ndi ukuvwanga nani.”

Ndi cakuti wali wewe Geoff, nga wacisile uli pakuti mulanzyanye ningo na ya tata yako lino yafika iyasoka?

TALA ELENGANYA PALI VII!

Ukulanzyanya na avyazi yako kwaya kwati ukupisya motoka. Ndi wazana iyacilika umuseo, ungalondako inzila yuze ukwakupita.

 KATULANGILILE:

Leah walanda wati: “Cikantalila sana ukulanda na ya tata, limwi kula nkulanda nayo limwi pa nsita sile itali, alino iiza yalanda ati, ‘Unjeleleko uzye ukulanda nani?’”

PALI IVINTU VITATU VINO LEAH ANGACITA.

  1. Ukukalipila ya isi.

    Leah wapunda wati, “Mwe tata uvwini vino nkulanda! Vyativicindama!”

  2. Ukuta ukulanda na ya isi.

    Leah wata sile ukulanda na ya isi pa wavya uno akweti.

  3. Ukulolela, ukwizalanda nayo insita yuze isuma pa wavya uno akweti.

    Leah walolela, wiza walanda na ya isi insita yuze, nanti walembela ya isi kalata pa wavya uno akweti.

Pa nzila zii zitatu i nzila ci ino unganena Leah ukuomvya?

ELENGANYA PALI CII: Ya isi yakwe Leah iyapumbukila kuze na cii icilenga yatikako amano kuli vino Leah akulanda, lyene wasoka. Nomba ngi cakuti Leah wasoolola Inzila A, wapunda, ya isi yatange yamanye icalenga apunde. Inzila ii itamalenga ya isi ukuvwa vino akulanda, nupya cimaloleka kwati atayacindike. (Efeso 6:2) Fwandi inzila ii itange iyazwe yonsi yoili.

Viivikwene vino utange uswilile pa mulandu wakuti wazana iyacilika umuseo, ali vino ulinzile ukucita na lino ukulanzyanya na avyazi yako, ulinzile ukulonda inzila yuze isuma ino mungalanzyanyizizyamo nayo

Nga wasolola Inzila B inganguka ukucita vivyo, nomba ala pasi cino waomba. U mulandu ci uno twalandila vivyo? Pakuti uwavya uno Leah akweti usile, alinzile sile ukunena ya isi, alino ngi cakuti yalinzile kumwazwa, yalinzile ukumanya ivikumucitikila. Ukuya mya nako kutange kuyazwe yonsi yoili.

Inzila C yene, Leah atalesile kuti icili consi cimucilikile. Lelo, wiza walanda na ya isi insita yuze. Nupya ndi walembela ya isi kalata cimalenga auvwe ningo papo kwene.

Ukulemba kalata nako kwene kungamwazwa ukulondolola ningo vyonsi vino akulonda ukulanda. Lino ya isi yakwe Leah yamawelenga kalata, yamauvwikisya vino alakuyanena, na cii cingayazwa ukumanya intanzi ino akweti. Fwandi inzila C ingazwa Leah na ya isi kwene. Ukulanda sile nayo nanti ukulemba kalata cili sile ningo, pano inzila ii ikukonka vino Baibo ikalanda ukuti “tulinzile kwezya kwikala umutende.”—Loma 14:19.

I nzila ci nayuze ino unganena Leah ukuti aomvye?

Lola ndi cakuti ungakwatako inzila yonga, lyene uilembe apisika. Ulembe ni vingacitika ndi waomvya inzila iyo.

 Utaezya Ukupazyanya Na Avyazi

Waiusya ukuti, vino watulanda alino na vino avyazi yakwelenganya ukuti avino watulanda insita zimwi vingapusana.

KATULANGILILE:

Avyazi yako yakuzya umulandu uno watusokela. Lyene nawe wati, “Ntakulonda kulandapo pi lyasi lii.”

Nomba avyazi yako nupya yuvwa wati: “Ntamitaila icakuti ningamunena na vino nkuyuvwa. Ndanena anji uwavya uno nkweti mwemo foo.”

Elenganya ukuti watukwata uwavya umwi ukalamba sana nupya avyazi yako yakulonda kukwazwa. Nomba wayanena wati: “Mutasakamala. Nimaombelapo ne mwineco.”

  • Limwi avyazi yako yanguvwa ukuti:

  • Vino ungayasuka mu nzila isuma aevi: