MATOAN-DAHATSORATRA
Mankasitraka ny Ady ve Andriamanitra?
Ahoana no hamalianao an’izany? Betsaka no mieritreritra hoe mankasitraka ny ady Andriamanitra. Mihevitra izy ireo fa nasainy niady ny mpanompony sasany taloha, ary manamafy an’izany ny Baiboly. Ny hafa indray mahafantatra fa nampianatra ny mpianany ho tia ny fahavalony i Jesosy Zanak’Andriamanitra. (Matio 5:43, 44) Mihevitra àry izy ireo fa lasa tsy mankasitraka ny ady intsony Andriamanitra amin’izao.
Ahoana ny hevitrao? Mankasitraka ny ady ve Andriamanitra? Raha eny, miandany amin’iza izy rehefa misy ady? Hanampy anao handinika tsara ny fiheveranao ny ady ny valin’ireo fanontaniana ireo. Andeha atao hoe misy foko anankiroa miady. Raha fantatrao, ohatra, hoe mankasitraka ny ady Andriamanitra sady miandany amin’ilay foko tohananao, tsy ho faly ve ianao? Matoky mantsy ianao fa tsy maintsy handresy ilay foko. Ahoana indray raha ilay foko iray no tohanany? Azo antoka fa hieritreritra ianao hoe sao dia tokony hiova hevitra.
Misy zavatra tena lehibe hafa anefa. Raha fantatrao ny fiheveran’Andriamanitra ny ady, dia ho hainao hoe hoatran’ny ahoana izy. Raha anisan’ireo an-tapitrisany mankahala ny ady ianao, dia azo antoka fa hahaliana anao ireto: Marina ve fa mamela ny olona hiady Andriamanitra na mampirisika azy ireo hiady, amin’izay ny olona mijaly? Tsy raharahainy ve na mijaly vokatry ny ady aza ny olona?
Mety ho gaga ianao raha mahalala fa tena tsy mitovy amin’ireo mihitsy ny lazain’ny Baiboly. Tsy niova mantsy ny fiheveran’Andriamanitra ny ady hatramin’izao. Andeha hodinihintsika ny fiheveran’Andriamanitra ny ady tamin’ny andro taloha sy tamin’ny taonjato voalohany, izany hoe tamin’i Jesosy tetỳ an-tany. Hanampy antsika hahita izany hoe ahoana no fiheveran’Andriamanitra ny ady amin’izao, ary mbola hisy foana ve ny ady.
