Hijery ny anatiny

Ho any amin'ny fizarana anatiny

Ho any amin'ny loha hevitra

Vavolombelon’i Jehovah

Malagasy

Ny Tilikambo Fiambenana  |  Desambra 2014

 MATOAN-DAHATSORATRA | AZO ATAO VE NY MINAMANA AMIN’ANDRIAMANITRA?

Mahatsapa ho Akaiky An’Andriamanitra ve Ianao?

Mahatsapa ho Akaiky An’Andriamanitra ve Ianao?

“Milamin-tsaina ianao rehefa minamana amin’Andriamanitra, sady mahatsapa hoe sambatra. Hitanao hoe mitady an’izay hahasoa anao foana izy.”—CHRISTOPHER, TOVOLAHY ANY GHANA.

“Mahita ny zava-drehetra mahakivy anao Andriamanitra, dia tsy ampoizinao mihitsy ny zavatra ataony satria asehony hoe tia anao izy sady tena mikarakara anao.”—HANNAH, 13 TAONA, ANY ALASKA, ETAZONIA.

“Tsy misy zavatra sarobidy sy mampilamin-tsaina kokoa noho ny hoe minamana amin’Andriamanitra.”—GINA, VEHIVAVY JAMAIKANINA, 45 TAONA EO HO EO.

Olona maro eran-tany no resy lahatra toa an’i Christopher sy Hannah ary Gina fa mandray azy ho namana Andriamanitra. Ary ianao? Mahatsapa ve ianao hoe efa akaiky an’Andriamanitra? Sa ianao te ho akaiky azy na te ho akaiky azy kokoa? Mety hieritreritra ianao hoe: ‘Olombelona ve dia ho afaka hinamana amin’ilay Andriamanitra Mahery Indrindra? Raha azo atao izany, dia amin’ny fomba ahoana?’

AZO ATAO NY MINAMANA AMIN’ANDRIAMANITRA

Milaza ny Baiboly fa azo atao ny minamana amin’Andriamanitra. Nantsoin’Andriamanitra hoe “namako”, ohatra, ilay lehilahy hebreo atao hoe Abrahama. (Isaia 41:8) Mampirisika antsika koa ny Jakoba 4:8 hoe: “Manatòna an’Andriamanitra, dia hanatona anareo izy.” Azo atao àry ny manatona an’Andriamanitra, izany hoe minamana aminy. Tsy hita maso anefa izy, ka ahoana no ‘hanatonanao’ azy sy hahatonga anao ho namany?

Mba hamaliana an’izany, dia andao hojerentsika hoe ahoana no mahatonga ny olona roa ho lasa mpinamana. Mifanontany anarana izy ireo amin’ny voalohany. Mifampiresaka matetika izy ireo avy eo, ary mifamboraka an’izay ao am-po sy ao an-tsainy. Vao mainka izy ireo lasa mpinamana be rehefa miezaka manao zavatra ho an’ny andaniny ny ankilany. Mitovitovy amin’izany koa ny fifandraisan’ny olona iray amin’Andriamanitra. Ahoana izany?