Fanamboarana ny mpamaky efijery

Search

Hifidy fiteny

Ho any amin'ny fizarana anatiny

Ho any amin'ny loha hevitra

Hijery ny anatiny

Vavolombelon’i Jehovah

Malagasy

NY TILIKAMBO FIAMBENANA NO. 1 2016

 TORO LALANA FAHINY FA MBOLA MANDAITRA ANKEHITRINY

Aza Manahy Be Loatra!

Aza Manahy Be Loatra!

TORO LALAN’NY BAIBOLY: “Aza manahy intsony ny amin’ny ainareo.”—Matio 6:25.

Inona no dikan’izany? Tamin’ilay Toriteny teo An-tendrombohitra i Jesosy no niteny an’ireo. Ilay matoanteny grika nadika hoe “aza manahy”, dia azo ilazana ny “zavatra tsapan’ny olona isan’andro momba ny fahantrana sy ny hanoanana ary ny olana hafa mahazo azy.” Ny zavatra hitranga amin’ny hoavy matetika no mampanahy ny olona. Ara-dalàna ianao raha manahy momba ny zavatra ilainao sy izay hahasoa ny fianakavianao sy ny olon-kafa akaiky anao. (Filipianina 2:20) Rehefa nilaza anefa i Jesosy hoe “aza manahy intsony”, dia te hiteny izy hoe aza manahy be loatra. Tsy hahafinaritra mantsy ny fiainana raha manahy be loatra ny amin’izay hitranga ny ampitso isika.—Matio 6:31, 34.

Mbola azo ampiharina ve izany? Hendry isika raha manaraka ny torohevitr’i Jesosy. Nahoana? Misy boky milaza fa rehefa manahy be loatra ny olona iray, dia miasa be foana ny rafi-pitatitra ao aminy, ka lasa “marary vavony, ohatra, izy na voan’ny aretim-po na asma.”

Inona no maharatsy ny hoe manahy be loatra, araka ny nolazain’i Jesosy? Tsy mitondra mankaiza ilay izy. Hoy izy: “Iza aminareo no mahay manalava ny androm-piainany, na kely monja aza, rehefa manahy?” (Matio 6:27) Raha manahy be loatra isika, dia tsy hoe hitombo akory ny halavan’ny androm-piainantsika, na dia ampahan-tsegondra fotsiny aza. Tsy hanatsara ny fiainantsika mihitsy koa izany. Tsy araka ny nieritreretantsika azy koa matetika ny zava-mitranga. Hoy ny manam-pahaizana iray: “Reraka eo fotsiny ianao raha manahy be hoe inona no hitranga, satria matetika no tsara kokoa fa tsy araka ny nieritreretanao azy ny zava-misy.”

Inona àry no hanampy antsika tsy hanahy be loatra? Voalohany, matokia an’Andriamanitra. Ny vorona aza mantsy omeny sakafo ary ny voninkazo ampanaoviny fitafiana tsara tarehy, koa mainka fa ny mpanompony? Azo antoka fa hahazo izay ilainy eo amin’ny fiainana koa izy ireo, satria miezaka manao loha laharana ny sitrapony. (Matio 6:25, 26, 28-30) Faharoa, ny androany ihany aloha eritreretina. Nilaza i Jesosy hoe: “Aza manahy mihitsy ny amin’ny ampitso, fa ny ampitso hanana ny fanahiany.” Tsy manaiky ve ianao fa efa “ampy ho an’ny andro tsirairay ny ratsy mitranga eo aminy”?—Matio 6:34.

Hisoroka olana maro isika, raha manaraka ny torohevitr’i Jesosy. Hilamin-tsaina koa isika, izany hoe hanana an’ilay antsoin’ny Baiboly hoe “fiadanan’Andriamanitra.”—Filipianina 4:6, 7.

Fanampim-panazavana

Matoky An’Andriamanitra ve Ianao?

Inona no soa horaisinao raha mahafantatra tsara an’Andriamanitra, toy ny namanao akaiky, ianao?