Hijery ny anatiny

Ho any amin'ny fizarana anatiny

Ho any amin'ny loha hevitra

Vavolombelon’i Jehovah

Malagasy

Tari-dalana ho An’ny Fiainantsika sy ny Fanompoana  |  Janoary 2018

 NY FIAINANTSIKA KRISTIANINA

Inona no Dikan’ny hoe Mandehana Aloha Mihavana Amin’ny Rahalahinao?

Inona no Dikan’ny hoe Mandehana Aloha Mihavana Amin’ny Rahalahinao?

Aoka hatao hoe velona tamin’ny andron’i Jesosy ianao, ary nipetraka tany Galilia. Ho any Jerosalema ianao mba hankalaza ny Fetin’ny Trano Rantsankazo. Mifanaretsaka ny ao an-tanàna, satria tonga daholo ny mpiara-manompo avy lavitra. Te hanao fanatitra ho an’i Jehovah any amin’ny tempoly ianao. Iny ianao fa mamakivaky ny tanàna miaraka amin’ny osy iray, na dia tomefy olona aza ny lalankely. Efa feno olona hanao fanatitra tao rehefa tonga ianao, ka elaela vao anjaranao. Ndeha hanome an’ilay osy an’ireo mpisorona anefa ianao no mahatadidy hoe manana alahelo aminao ny rahalahinao. Mety ho ao anaty vahoaka ao izy, na ao an-tanàna. Efa nohazavain’i Jesosy izay tokony hataonao. (Vakio ny Matio 5:24.) Inona no hataonao sy ilay rahalahinao mba hahafahanareo mihavana indray? Mariho izay valiny marina amin’ilay lisitra eto ambany.

NY TOKONY HATAONAO

  • Hiresaka amin’ilay rahalahinao raha hitanao hoe rariny izy raha malahelo

  • Hiezaka hanitsy an’ilay rahalahinao, satria mihevitra ianao hoe mba diso koa izy na sarotsarotiny loatra

  • Hihaino tsara an’izay lazain’ny rahalahinao. Na tsy tena azonao aza izay tsapany, dia hiala tsiny amim-pahatsorana ianao satria nampalahelo azy

NY TOKONY HATAON’NY RAHALAHINAO

  • Hitantara amin’ny hafa eo anivon’ny fiangonana ny zavatra tsy nety nataonao taminy

  • Hiteniteny anao sy hitanisa an’izay rehetra tsy nety nataonao. Tsy hamelany ianao raha tsy miaiky hoe diso

  • Hiaiky fa nitaky fanetren-tena sy herim-po avy aminao ny nanatona azy, ary hamela heloka tanteraka

Tsy mila manao fanatitra biby intsony isika izao. Nampianarin’i Jesosy anefa hoe tsy hankasitrahan’Andriamanitra ny fanompoantsika, raha tsy mihavana amin’ny rahalahintsika isika. Ahoana no nampisehoany an’izany?