Salamo 66:1-20
Ho an’ny mpitarika. Hira. Salamo.
66 Manaova horakora-pandresena ho an’Andriamanitra, ry tany manontolo.+
2 Manaova hira fiderana* ho an’ny anarany be voninahitra.
Ataovy makotrokotroka ny fiderana azy.+
3 Milazà amin’Andriamanitra hoe: “Mahatalanjona sy mampahatahotra tokoa ny asanao!+
Tena mahery ianao,Ka hatahotra ny fahavalonao rehefa eo anatrehanao.+
4 Hiankohoka eo anatrehanao ny tany manontolo;+Hihira fiderana ho anao izy ireny,Hihira fiderana ho an’ny anaranao.”+ (Sela)
5 Avia hijery ny asan’Andriamanitra.
Mahatalanjona sy mampahatahotra ny zavatra ataony ho an’ny zanak’olombelona.+
6 Novany ho tany maina ny ranomasina;+Nandeha an-tongotra niampita ny renirano izy ireo.+
Teo izahay no nifaly noho ny zavatra nataony.+
7 Manjaka mandrakizay+ izy satria mahery.
Mandinika an’ireo firenena ny masony.+
Tsy tokony hanandra-tena ireo mafy loha.+ (Sela)
8 Derao ny Andriamanitray, ry firenena!+Ary ataovy maredona tsara ny fiderana azy.
9 Mitsimbina ny ainay izy;+Tsy avelany ho tafintohina* ny tongotray.+
10 Fa nandinika anay ianao, Andriamanitra ô;+Nanadio anay ianao, toy ny fanadio volafotsy amin’ny afo.
11 Nampidirinao tao anaty harato famandrihana izahay;Nampitondrainao enta-mavesatra izahay.*
12 Navelanao hanosihosy anay* ny olombelona mety maty.Namakivaky afo sy rano izahay,Dia avy eo nentinao tany amin’ny toerana fialan-tsasatra.
13 Hankao an-tranonao hitondra fanatitra dorana aho.+Hefaiko aminao ny voadiko,+
14 Izay nampanantenain’ny molotro,+Sy nolazain’ny vavako tamin’izaho nijaly.
15 Hatolotro ho anao ho fanatitra dorana ny biby matavy,Sy ny setroky ny ondrilahy atao sorona.
Hanolotra ombilahy sy osilahy aho. (Sela)
16 Avia hihaino ahy ianareo rehetra matahotra an’Andriamanitra,Dia hotantaraiko anareo izay nataony ho ahy.+
17 Niantso azy ny vavako,Ary nanome voninahitra azy ny lelako.
18 Raha nieritreritra zava-dratsy foana aho tato am-poko,Dia tsy ho nihaino ahy i Jehovah.+
19 Tena nihaino ahy anefa Andriamanitra.+Nohenoiny tsara ny vavaka nataoko.+
20 Hoderaina anie Andriamanitra, izay tsy nanda ny vavaka nataokoSady mbola tia ahy sy tsy mivadika amiko ihany.
Fanamarihana
^ Na: “Mitendre mozika.”
^ Na: “hangozohozo; hivembena.”
^ Abt: “ny andilanay.”
^ Abt: “ny lohanay.”
