Isaia 8:1-22
8 Ary hoy i Jehovah tamiko: “Makà takela-kazo+ lehibe dia izao soratana amin’ny penina tsotra:* ‘Mahera-salala-hasi-baza.’*
2 Aleo hisy vavolombelona mendri-pitokisana hanamafy an’izany an-tsoratra* ho ahy, dia i Oria+ mpisorona sy Zakaria zanak’i Jeberekia.”
3 Ary nanao firaisana tamin’ilay* mpaminanivavy* aho. Dia bevohoka izy ka nitera-dahy.+ Ary hoy i Jehovah tamiko: “Ataovy hoe Mahera-salala-hasi-baza ny anarany,
4 fa raha mbola tsy mahay miantso hoe ‘Dada’ sy ‘Neny’ ilay zaza, dia hoentin’ny olona ho any amin’ny mpanjakan’i Asyria ny fananan’i Damaskosy sy ny zavatra nobaboina tany Samaria.”+
5 Niteny tamiko indray i Jehovah hoe:
6 “Satria ity vahoaka ity nanda ny ranon’i Siloa,* izay mikoriana moramora,+Sady faly noho ny amin’i Rezina sy ny zanak’i Remalia,+
7 Dia hampiakarin’i Jehovah hamely azyNy mpanjakan’i Asyria+ sy ny voninahiny rehetra.Hoatran’ny rano be mikoriana mafy avy any amin’ny Renirano* izy,
Ary ho tondraka be,Ka hihoatra ny morony rehetra ny rano,
8 Dia hibosesika eran’i Joda.
Hiakatra be izy ary hiparitaka, ka hisondrotra hatreny amin’ny vozona.+Handrakotra ny sakan’ny taninao ny elany rehefa mivelatra,Ry Imanoela ô!”*+
9 Mameleza, ry firenena, nefa ho torotoro ihany ianareo.
Mihainoa ianareo rehetra avy any lavitra any!
Miomàna hiady,* nefa ho torotoro ihany ianareo!+
Miomàna hiady, nefa ho torotoro ihany ianareo!
10 Manaova tetika, nefa tsy hahomby izany!
Lazao izay tianareo hotenenina, nefa tsy ho tanteraka izany,Satria manampy antsika Andriamanitra!*+
11 Nanohana ahy ny tanana matanjak’i Jehovah, ka izao no nolazainy tamiko mba hisakanana ahy tsy hanaraka ny fanaon’ity vahoaka ity:
12 “Aza ataonareo hoe fikomiana ny zavatra lazain’ity vahoaka ity hoe fikomiana.
Aza matahotra an’izay atahorany,Ary aza mihorohoro amin’izany.
13 I Jehovah Tompon’ny tafika no tokony ho masina aminareo.+Izy no tokony hatahoranareo,Ary Izy no tokony hampangovitra anareo.”+
14 Dia ho lasa toy ny toerana masina Izy,Nefa koa ho vato hamelezana,Sady ho vatolampy mahatafintohina+Ho an’ny fanjakana roan’ny Israely,Ary ho fandrika sy vela-pandrikaHo an’ny mponin’i Jerosalema.
15 Maro amin’izy ireo no ho tafintohina sy ho lavo ary ho torotoro.Ho voafandrika sy ho voasambotra izy ireo.
16 Ahoròny ny taratasy fanamafisana,*Ary asio tombo-kase any amin’ny mpianatro ny lalàna!*
17 Izaho hanantena foana* an’i Jehovah,+ izay manafina ny tarehiny amin’ny taranak’i Jakoba.+ Dia hanantena Azy aho.
18 Ireto izaho sy ireo zaza nomen’i Jehovah ahy!+ Famantarana+ sy fahagagana eo amin’ny Israely izahay, famantarana sy fahagagana avy amin’i Jehovah Tompon’ny tafika izay mipetraka eo amin’ny Tendrombohitra Ziona.
19 Mety hisy hiteny anareo hoe: “Manontania mpamoha angatra na olona itoeran’ny fanahy mpilaza ny hoavy, izay samy manao feom-boronkely sy mibitsibitsika.” Tsy ny Andriamaniny anefa ve no tokony hanontaniany? Ny maty indray ve no hanontaniana mba hahasoa ny velona?+
20 Ny lalàna sy ny taratasy fanamafisana* kosa no tokony hojereny.
Tsy hahita ny hazavana*+ izy ireo, rehefa tsy mifanaraka amin’ity teny ity ny zavatra lazainy.
21 Ary samy hivezivezy ao amin’ilay tany ny olona efa mijaly sady noana.+ Hanozona ny mpanjakany sy ny Andriamaniny izy rehefa mijery ambony, satria noana sady tezitra.
22 Hiondrika hijery ny tany indray izy, dia tsy hahita afa-tsy fahoriana, haizina, haizim-pito, fotoan-tsarotra, ary andro manjombona tsy misy mangirana.
Fanamarihana
^ Abt: “penin’ny olombelona mety maty.”
^ Mety hidika hoe “Nihazakazaka Haka Babo, Nandeha Haingana Handroba.”
^ Na: “hijoro ho vavolombelona; hanamarina.”
^ Abt: “nanakaiky an’ilay.”
^ Izany hoe ny vadin’i Isaia.
^ Lakandrano fahiny i Siloa.
^ Izany hoe Eofrata.
^ Na: “Misikìna.”
^ Na: “fanamarinana.”
^ Na: “toromarika.”
^ Na: “hiandry mafy.”
^ Na: “fanamarinana.”
^ Abt: “hazavan’ny maraina.”
