Isaia 64:1-12
64 Raha mba norovitinao mantsy ny lanitra ka nidina ianao,Dia hihovotrovotra eo anatrehanao ny tendrombohitra,
2 Hoatran’ny afo mandoro kirihitra,Sy hoatran’ny afo mampangotraka rano,Dia ho fantatry ny fahavalonao ny anaranao,Ka hangovitra eo anatrehanao ny firenena.
3 Rehefa nanao zavatra mahatalanjona ianao, zavatra tsy sahinay nantenaina akory,+Dia nidina ianao, ary nihovotrovotra teo anatrehanao ny tendrombohitra.+
4 Efa hatramin’ny taloha no tsy nisy naheno na nandre,Na nahita Andriamanitra ankoatra anao,Dia ilay Andriamanitra manao zavatra ho an’izay manantena* azy foana.+
5 Tsenainao izay faly manao ny tsara,+Dia izay mahatsiaro anao ka manaraka ny lalanao.
Tezitra ianao rehefa nanota foana izahay.+Nanota nandritra ny fotoana ela be mantsy izahay.
Dia ho voavonjy ve izahay izao?
6 Lasa hoatran’ny olona maloto daholo izahay,Ary toy ny akanjo voaloton’ny fadimbolana+ ny tsara rehetra vitanay.
Halazo hoatran’ny ravinkazo izahay rehetra,Ary hipaoka anay toy ny rivotra ny fahadisoanay.
7 Tsy mba misy olona miantso ny anaranao,Sady tsy mba misy miezaka ny hifikitra aminao.Fa afeninao tsy ho hitanay ny tarehinao,+Ary ataonao lasa reraka* izahay noho ny* fahadisoanay.
8 Ianao anefa izao no Rainay, Jehovah ô!+
Tanimanga izahay, ary ianao no Mpanefy anay.*+Asan’ny tananao daholo izahay.
9 Aza tezitra be loatra, Jehovah ô,+Ary aza tsaroana mandrakizay ny fahadisoanay.
Mba jereo izahay fa vahoakanao daholo ange izahay e!
10 Lasa tany efitra ireo tanànanao masina.
Lasa tany efitra koa i Ziona,Ary lasa ngazana i Jerosalema.+
11 Masina sady be voninahitra* ilay tranonay,*Dia tao ny razambenay no nidera anao.Kilan’ny afo+ anefa ilay izy,Ary ravarava ny zava-drehetra tianay.
12 Dia mbola tsy hanao zavatra ihany ve ianao, Jehovah ô?
Mbola hangina ihany ve ianao ka hamela anay hijaly be hoatr’izao?+
Fanamarihana
^ Na: “maharitra miandry.”
^ Abt: “mitsonika.”
^ Abt: “eo an-tanan’ny.”
^ Na: “ianao Ilay nanamboatra anay.”
^ Na: “tsara tarehy.”
^ Na: “tempolinay.”
