Nilaza ny mpahay siansa tamin’ny 24 Janoary 2023 fa tena efa eo akaikin’ny misasakalina ilay Famantaranandro Manondro ny Fara Andro a.

•   “Ampiasain’ny mpahay siansa mba ampisehoana ny fotoana hahapotika an’izao tontolo izao ny ‘Famantaranandro Manondro ny Fara Andro.’ Naroson-dry zareo teo akaikin’ny misasakalina izy io tamin’ny talata, noho ny ady any Ukraine sy noho ny fahatahorana hoe hisy ady niokleary hipoaka ary noho ny fahasimban’ny tontolo iainana.”​—AFP International Text Wire.

•   “Nanao fanambarana ny mpahay siansa tamin’ny talata fa 90 segondra sisa dia ho tonga eo amin’ny misasakalina ilay ‘Famantaranandro Manondro ny Fara Andro.’ Tena kely sisa dia hahita ny Aramagedona ny olombelona.”​—ABC News.

•   “Nisy mpahay siansa avy amin’ny firenena maromaro nampitandrina fa mbola tsy tandindomin-doza hoatr’izao mihitsy ny fiainan’ny zanak’olombelona.”​—The Guardian.

 Tsy ho ela ve dia ho potika tanteraka ny tany, dia ho ripaka ny olombelona? Tokony hatahotra an’izay hitranga amin’ny hoavy ve isika? Inona no lazain’ny Baiboly?

 Lazain’ny Baiboly fa “ny tany ... maharitra mandrakizay” ary hisy olona “honina eo mandrakizay.” (Mpitoriteny 1:4; Salamo 37:29) Tsy ho potika mihitsy àry ny tany na koa hoe tsy ho azo iainana intsony noho ny ataon’ny olombelona.

 Miresaka momba ny farany anefa ny Baiboly. Lazain’izy io, ohatra hoe “mandalo izao tontolo izao.”​—1 Jaona 2:17.

•   Raha tianao ho fantatra hoe inona no tian’ny Baiboly holazaina amin’ilay hoe faran’izao tontolo izao, dia vakio ilay lahatsoratra hoe “Tena ho Tonga Tokoa ve ny Faran’izao Tontolo Izao?”

•   Vakio ilay lahatsoratra hoe “Rahoviana no ho Tonga ny Faran’izao Tontolo Izao?”, raha tianao ho fantatra izay lazain’ny Baiboly momba ny fotoana hahatongavan’ny faran’izao tontolo izao.

 Afaka manampy antsika tsy hanary toky ny Baiboly na dia eo aza ny olana maro be maneran-tany. Amin’ny fomba ahoana?

•   Manome antsika torohevitra mandaitra ny Baiboly. (2 Timoty 3:16, 17) Afaka manampy anao ho be fanantenana, ohatra, izy io na dia misy olana aza. Hahita torohevitra momba an’izany ianao ao amin’ilay lahatsoratra hoe “Inona no Hanampy Anao Tsy Hanahy Be Loatra?”

•   Tena azo antoka ny zavatra ampanantenain’ny Baiboly. (Romanina 15:4) Hazavain’izy io mazava tsara hoe inona no tokony hampoizintsika hoe hitranga amin’izao sy amin’ny hoavy. Manampy antsika tsy hatahotra izany na dia mikorontana aza izao tontolo izao.

 Te handray soa avy amin’izay lazain’ny Baiboly ve ianao? Manasa anao àry izahay izao mba hanandrana an’ilay fianarana Baiboly maimaim-poana miaraka amin’ny mpampianatra atolotray.