Tamin’ny Martsa 2025 i Andrii Kliuka no nanomboka nigadra tany Ukraine, ary dimy taona any am-ponja no saziny

Vavolombelon’i Jehovah Gadraina Noho ny Finoany any Amin’ny Tany Samihafa

HANDEFA

Vavolombelon’i Jehovah 259 mahery maneran-tany no gadraina noho ny finoany, araka ny tatitra tamin’ny Febroary 2026.

Milaza ny Andininy Faha-18 amin’ny Fifanarahana Iraisam-pirenena Momba ny Zo Sivily sy Politika fa manana zo haneho hevitra sy hanaraka ny feon’ny fieritreretany ary hanana ny fivavahany ny olona. Tsy avela hampiasa an’izany zony izany anefa ny Vavolombelon’i Jehovah any amin’ny tany sasany. Gadraina tsy ara-drariny sady ampijalina ry zareo satria mampihatra ny zavatra inoany na tsy mety manao miaramila noho ny feon’ny fieritreretany.

Rosia

Noraran’ny Fitsarana Tampony Rosianina ny fikambanana ara-dalàna ampiasain’ny Vavolombelon’i Jehovah tamin’ny Aprily 2017, satria mampidi-doza, hono, ny zavatra ataon-dry zareo. Nogiazana àry ny fananan’ny fikambanan’ny Vavolombelon’i Jehovah, nakatona ny toeram-pivavahan-dry zareo, ary norarana koa ny boky ara-pivavahana navoakany. Nanomboka nanenjika ny Vavolombelon’i Jehovah isam-batan’olona koa anefa ny manam-pahefana rosianina. Tsy ara-dalàna, hono, ny zavatra ataon-dry zareo mba hampiharana ny zavatra inoany. Manao bemidina any an-tranon-dry zareo ny polisy, dia matetika no mampijalijaly azy sady masiaka rehefa maka am-bavany. Samborina koa aza ry zareo matetika. Miisa 158 izao, fara fahakeliny, ny Vavolombelon’i Jehovah tanana am-ponja vonjimaika any Rosia, na sazina hanao asa an-terivozona, na manefa ny saziny ao am-ponja.

Tsindrio eto raha tianao ho hita hoe iza avy ny Vavolombelon’i Jehovah migadra noho ny finoany any Rosia.

Singapour

Terena hanao miaramila ny lehilahy any Singapour. Tsy eken’ny fanjakana raha hoe noho ny feon’ny fieritreretana na noho ny finoana no mahatonga ny olona iray handa tsy hanao an’izany. Izay mandà anefa dia mety higadra hatramin’ny roa taona sy tapany. Efa am-polony taona maro izao no nangataka tamin’ny fitondrana any Singapour ny Firenena Mikambana hoe tokony havela handa ny olona raha mifanohitra amin’ny feon’ny fieritreretany ilay hoe hanao miaramila. Mbola tsy mampihatra ny fenitra iraisam-pirenena momba ny zon’olombelona anefa i Singapour amin’izao. Misy 11 izao ny tanora Vavolombelon’i Jehovah gadraina satria tsy mety manao miaramila noho ny finoany. Ny dimy amin-dry zareo efa fanindroany amin’izao no manefa ny saziny ao am-ponja.

Tsindrio eto raha tianao ho hita hoe iza avy ny Vavolombelon’i Jehovah migadra noho ny finoany any Singapour.

Korea Atsimo

Lasa afaka manao fanompoana sivily izay olona mandà tsy hanao miaramila any Korea Atsimo, nanomboka tamin’ny 26 Oktobra 2020. Misy miteny anefa hoe hoatran’ny sazy io karazana fanompoana sivily io satria maharitra telo taona be izao, izany hoe indroan’ny fotoana tokony hanaovana miaramila. Efa nisy ihany ny raharaha ara-pitsarana nangataka ny hanovana an’izany, fa nanamafy ny Fitsarana Momba ny Lalàm-panorenana any Korea tamin’ny 2024 hoe tsy misy na inona na inona tokony hovana. Manaiky hanao an’io fanompoana sivily io ny ankamaroan’ny tanora Vavolombelon’i Jehovah, na dia ela be aza ilay izy sady mafy. Nisy rahalahy tanora 14 ihany anefa tsy nanaiky hanao an’ilay izy. Any am-ponja izao ny iray amin-dry zareo, dia maromaro no miandry fitsarana ary mety hogadraina aorian’izay.

Tsindrio eto raha tianao ho hita hoe iza avy ny Vavolombelon’i Jehovah migadra noho ny finoany any Korea Atsimo.

Ukraine

Misy lalàna any Ukraine mamela ny olona hanao fanompoana sivily, raha tsy mety manao miaramila izy noho ny feon’ny fieritreretany. Efa ho 30 taona ny Vavolombelon’i Jehovah tany no nandray soa tamin’io lalàna io. Rehefa nipoaka ny ady tamin’ny 24 Febroary 2022, dia niantso ny olom-pireneny hanao miaramila ny fitondrana. Teo vao hita hoe hay kay tsy voafaritra tsara ao amin’ilay lalàna hoe azo atao ny fanompoana sivily rehefa tsy mandry ny tany. Betsaka àry ny olona nampangaina teny amin’ny fitsarana satria tsy nety nanao miaramila, dia avy eo ry zareo nogadraina. Enina izao ny Vavolombelon’i Jehovah migadra ary misy dimy tanana am-ponja vonjimaika. Nisy olona telo Mpanao Tatitra Manokana eo Anivon’ny ONU nilaza hoe tokony havela hanao fanompoana sivily ny olona na dia amin’ny fotoanan’ny ady aza.

Tsindrio eto raha tianao ho hita hoe iza avy ny Vavolombelon’i Jehovah migadra noho ny finoany any Ukraine.

“Tsarovy izay migadra, toy ny hoe miara-migadra aminy ianareo.”—Hebreo 13:3.