Hijery ny anatiny

Vavolombelon’i Jehovah

Hifidy fiteny Malagasy

Milaza ve ny Baiboly hoe Ratsy ny Manao Makiazy sy Firavaka?

Milaza ve ny Baiboly hoe Ratsy ny Manao Makiazy sy Firavaka?

Valiny ara-baiboly

Tsy miresaka momba ny makiazy sy firavaka amin’ny an-tsipiriany ny Baiboly. Tsy milaza koa anefa izy io hoe ratsy ny manao makiazy sy firavaka ary haingo hafa. Resahiny kosa hoe tsy ny fisehoana ivelany no tena zava-dehibe, fa “ny toetra tony sy malemy paika”, ary “toy ny manao fitafiana tsy mety simba” ny olona manana toetra hoatr’izany.—1 Petera 3:3, 4.

Tsy ratsy ny hoe mihaingo

  • Nihaingo ny vehivavy nanam-pinoana fahiny. Nanao kavin’orona volamena, brasele volamena, ary firavaka sarobidy hafa i Rebeka, izay lasa vadin’i Isaka zanak’i Abrahama. Fanomezana avy tamin’ilay ho rafozandahiny ireo firavaka ireo. (Genesisy 24:22, 30, 53) Neken’i Estera koa ny ‘hikarakarana ny bika aman’endriny’, tamin’izy sy ny tovovavy hafa nokarakaraina ho lasa vadin’ny mpanjakan’i Persa. (Estera 2:7, 9, 12) Toa nisy “zavatra fanatsarana tarehy” na “makiazy samy hafa” ilay izy.—New International Version; Easy-to-Read Version.

  • Asehon’ny fanoharana ao amin’ny Baiboly fa tsy ratsy ny manao firavaka. Resahin’ny Baiboly hoe hoatran’ny “kavina volamena ... eo amin’ny sofin’ny olona mihaino anatra” ny olona manome torohevitra tsara. (Ohabolana 25:12) Milaza koa Andriamanitra hoe nataony hoatran’ny vadiny ny firenen’Israely, ka noravahany brasele sy rojo ary kavina mba ho lasa “tena tsara tarehy be.”—Ezekiela 16:11-13.

Hevi-diso momba ny makiazy sy firavaka

Hevi-diso: Resahin’ny 1 Petera 3:3 hoe ratsy “ny firandranam-bolo sy ny fanaovana firava-bolamena.”

Ny tena marina: Asehon’ny teny manodidina fa tian’io andininy io hasongadina hoe ny toetra tsara ao am-po no zava-dehibe noho ny fisehoana ivelany. (1 Petera 3:3-6) Misy andininy hafa koa mampiseho an’izany.—1 Samoela 16:7; Ohabolana 11:22; 31:30; 1 Timoty 2:9, 10.

Hevi-diso: Ratsy ny manao makiazy matoa resahin’ny Baiboly hoe nanao “manjamaso” ilay vehivavy ratsy fanahy atao hoe Jezebela, izay vadin’ny mpanjaka.—2 Mpanjaka 9:30.

Ny tena marina: Nilalao ody sy namono olona i Jezebela. Ireo zava-dratsy nataony ireo no nanamelohana azy, fa tsy noho izy nanao makiazy.—2 Mpanjaka 9:7, 22, 36, 37.