Jachin ama ayúkaw wënake

Índicew wëna

 LECCIÓN 11

¿Jáchisum ítom aniá jume Liosta nésawrim?

¿Jáchisum ítom aniá jume Liosta nésawrim?

1. ¿Jatchiasu ítow bëye ke jabe ítom téxwana jáchinte ito nüna?

¿Jáchisu ítom aʼania jume Liosta nésawrim ka kökosi ayu bechïbo? (SALMO 36:9)

Jehová ítom yawʼwak éntok ítom Átchayria, junen bechïbo, che ito bepʼpa juneyʼya. Äpo ítom waatia éntok ítot suuwa. Lios ka ítom yawʼwak ítapola ítom nésawnakew bechïbo (Jeremías 10:23). Jume ili usim ámew bëye ke bem átchayriam am téxwana jachin emo wériwnake. Ítapo ket júnel bénasi Lios ítom téxwana jáchisute ito nünake (Isaías 48:17, 18). Jume Liosta nésawrim ítomim wéweria éntok i wepu regalo Liosta bétana ajaria. 2 Timoteo 3:16te nooka.

Jume Liosta nésawrim ítom maxtiá jáchinte che tülisi jiápsana éntok ítom texwa jáchinte púxbaw bicha jiba bechïbo bendicionimte jípuna. Tüysite eaka Liosta nokjikʼkaixna jachin ito nünakew bétana ítom téxwayo, buéytuk Äpo ítom yawʼwak. Salmo 19:7, 11 éntok Revelación (Apocalipsis) 4:11te nooka.

2. ¿Jáchisu ítom wéweria jume Liosta Nokim?

Bíbliapo maxtíriam may béxresi machim ítom aniame jita türita jiba ya bechïbo ama weyʼye. Wate nésawrim éntok lútulaysi ítom texwa jítasute yäna (Deuteronomio 22:8). Ime maxtíriam paman ito wériw bechïbo tua tülisite pensaruana jáchinte am wëtuana ketune ke jita ítom ya bárew yew pualatuko (Proverbios 2:10-12). Ache suuwa: jume Bíbliam ítom maxtiá ke ju jiápsiwa Liosta bétana mikʼri. I lutüria may béxresi machi, buéytuk ítom texwa jáchisute ito nünake éntoket ítow a wätitua kete tüysi ito suayana jita ya báreteko jumu tékilpo ítom joäpo éntok jakun bicha sájateko. Hechos 17:28te nooka.

3. ¿Jítasamʼme jume woy nésawrim che béxresi maachim?

Jesús woy nésawrim yew bitʼtuak. Ju bat wëme ítom a bitʼtebo jítasute yänake ítom jiápsimak: Lióstate täyana, ata náknake éntok witʼtílasite a tekipanoáriana. Sïme ítom ya bárepo ika nésawtawte wätina (Proverbios 3:6). Wame ia paman emo wériame Lióstaw jëlam anʼnake éntok jiba bechïbo jiápsiwatam jípuna. Marcos 12:28-30te nooka.

 Ju woy nésawri ítom aʼania watemʼmak tülisi ito nu bechïbo (1 Corintios 13:4-7). Ítom jiápsipo ika nésawrita wëtuako Liosta bénasite ito wériwna jachin äpo watemʼmak aw nüye bénasi. Marcos 12:31 éntok Lucas 6:31te nooka.

4. ¿Jáchisum tülisi ítow wetche jume Liosta nésawrim?

Jume nésawrim Bíbliapo wëme famíliata naw chachcha éntok nákwamta ama ayúkame che a yoyöturia (Colosenses 3:12-14). Wepu nésawrim Bíbliapo wëme famíliata susuaya buéytuk a maxtiá ke jume emo jubʼlame jiba bechïbo naw anʼnake. Marcos 10:7-9te nooka.

Jume Liosta nésawrim kéchim ítom aniá buawamta, sánkota éntok kárita jipu bechïbo éntok alʼleaka ítom jijiápsatua. Ache suuwa: juebena tékilimpo géntem ime nésawrim nokjikʼkajamem takiabábare, buéytuk áram tekipanoa éntok káytam eʼebʼbua (Proverbios 10:4, 26; Hebreos 13:18). Éntoket, ju Biblia ítom maxtiá kete alʼlena jita che béxresi machik jípurëteko jiapsa bechïbo éntok Lióstaw jëla anëteko che ju tomi éntok jita bepʼpunem béxresi machítunake. Mateo 6:24, 25, 33 éntok 1 Timoteo 6:8-10te nooka.

Jume nésawrim Bíbliapo wëme kéchim ítom aʼania ítom takáwata tülisi ëtua bechïbo. Ket ju nésawri Liosta nokame vinojïwame bétana ítom suaya, buéytuk ka ai köko wénʼnake éntok ka jiápsita täru bechïbo jita ítom jojuaw ka tülisi at suákaw bechïbo (Proverbios 14:30; 22:24, 25; 23:20). Te Jehová tülisi a bitcha kete ka jaikik jiba vinojïna (Salmo 104:15; 1 Corintios 6:10). Jume Liosta nésawrim ítom aniá ke jachin ito nüyepo tua türituna éntoket ítom pensaruawi ket türina (Salmo 119:97-100). Te jume tua cristíanom jume Liosta nésawrim katʼte kiélam nokjikʼkaja tülisi ítow wënakew bechïbo; atam nokjikʼkaja buéytuk ítom Átchay, Jehová, téwekapo katekamta yöri bechïbo. Mateo 5:14-16te nooka.