Jachin ama ayúkaw wënake

¿Ákea juuneriapeyʼya juka lutüriata?

¿Ákea juuneriapeyʼya juka lutüriata?

¿JU LUTÜRIA jita bétana? Jume nátemaisrim ché béxresi maachim sámarim emo yälawi. Pueke empo jatweye junel emo temaisla:

  • ¿Dios ítot suá jäni?
  • ¿Jatweyo ju naw nasʼsuawame éntok ju kökosi ëwame lütina?
  • ¿Mukuko jítasu ítow sisime?
  • ¿Juchim jiápsana jume kokʼkolam?
  • ¿Jáchisute oraaruana Diosta ítom jikʼkainakew bechïbo?
  • ¿Jachin alʼleriata tewna?

¿Jákuse am jariweyʼyey jume yómiarim ime nátemaisrim bétana? Juebena sámarim am temájeteko akimam ara yomia titʼtia. Junenta junʼne, bürukam naw emo nok bebexre. Wate éntok yómiarim tuá lutüriam bénamim mímika, te láwtipom akim a kopkoptia éntoket juchi bemélamim jojoá.

Te, wepu librom aika yómiarim wériame ara at eaame éntok tuá lutüriam. Jesucristo Dióstaw oraaruaka junen jiawa: “Em nooki tuá lutüria” (Juan 17:17). En énriapo juka Nokita Santa Bibliam bénasim a täya. En äbo wëme ilikʼkisim yäri jume yómiarim, jünakiachimʼme éntok ara at eaame Diosta Nokím nonókame wame nátemais amáw yäri bétana.

¿Dios ítot suá jäni?

Wepu oʼou juebena sámarim násuku aneme

¿JATCHIASUM JUNËLIM EMO TETÉMAJE? Wepu ánia ka tüwa éntok ka witʼtisi aw wériapote jiapsa. Juebena religionim akim a maxtiá ke juka ítom kökosi ëwamta Dios junel a waatia.

DIOSTA NOKÍM MAXTIAWI. Dios jatwey june jita ka tüwata ka jojoá. Job 34:10 junen jiawa: “¡Ju tuá lútulay Dios jatwey june juka kökosi ëwamta yäna, éntok jú Sïmem bepʼpa utʼtiakame ka witʼtita yäna!”. Dios, a nakpo, sámarim bechïbo, wepu musälamachísi wemta jípure, wanay wäri bechïbo, Jesús i oración pámani jita ítom aunakewta ítom maxtiá: “Ítom Atchay áman téwekapo kátekame […]. Em yáutʼte äbo bitʼtua. Em nésaw yaatunake, téwekaw bénasi, imi buiäpo ket jiba junëli, áman bénasi” (Mateo 6:9, 10). Lútulay Dios tüysi ítot suuwa bueytuk Dios a usita ítom miika a yäbarew chupbechïbo (Juan 3:16).

Ketche a bitcha Génesis 1:26-28; Santiago 1:13, éntok 1 Pedro 5:6, 7 ta.

¿Jatweyo ju naw nasʼsuawame éntok ju kökosi ëwame lütina?

Sontarom

¿JATCHIASUM JUNËLIM EMO TETÉMAJE? Ju naw nasʼsuawapo juebena sámarim ama kokʼkola. Wanay sïmetakate jita ka tüwata bechïbo jiookot eeyʼya.

DIOSTA NOKÍM MAXTIAWI. Dios sïme buiäpo yanti anwamta ore bäre. A Yáut nésaw paman, jume sámarim beja katim “naw nasʼsuawamta emo maxtiana”, éntoket “bem macheetam arado buiäta momoitia bechïbo ténasim am yäna” (Isaías 2:4). Éntoket, Dios ka witʼtisi aw wériamta éntok kökosi ëwamta chúpana. Ju Diosta Nooki i promeesata nooka, jume sámarim bechïbo: “[Dios] sïme pusimpo ópoam tütena, éntok kokʼkowame káytatunake, buamwame éntok kökosi ëwame éntok wantiriam junʼne. Bueytuk ju jita bat ayúkaiwi [éntoket ju ka witʼtisi aw wériame éntok kökosi ëwame] beja káytatuna” (Revelación [Apocalipsis] 21:3, 4).

Ketche a bitcha Salmo 37:10, 11; 46:9, éntok Miqueas 4:1-4 ta.

¿Mukuko jítasu ítow sisime?

Kokʼkolam mamäwapo

¿JATCHIASUM JUNËLIM EMO TETÉMAJE? Ché juebena religionimpo akim a maxtiá ke jábeta mukuko jita jan waixwa ítom jípurew jijiapsa. Wateka akim a lutüria tiyʼya ke jume kokʼkolam áram jume jiápsamʼmew emo iʼia, ke ju Dios wame ka tüwata joaame jiba bechïbo taixpo am tatatʼta.

DIOSTA NOKÍM MAXTIAWI. Kokʼkoteko béjate kakáytatu. Eclesiastés 9:5 junen jiawa “jume kokʼkolam  […] toktim kaytam juuneria”. Katim juuneyʼya, katim inʼnea, karam jita joowa wanay karam jiápsamʼmew emo iʼia éntok kaachinim áram am aniá (Salmo 146:3, 4).

Ketche a bitcha Génesis 3:19 éntok Eclesiastés 9:6, 10 ta.

¿Juchim jiápsana jume kokʼkolam?

Wepu ili usi jamʼmut tüysi sirókame bueytuk wepu a wawajita mukʼriala

¿JATCHIASUM JUNËLIM EMO TETÉMAJE? Sïmetakate ítom atʼtiarimʼmakte alʼleaka jiápsabábare. Junentak, jabe june a kokʼkolam bitpëna.

DIOSTA NOKÍM MAXTIAWI. Juebena sámarim kokʼkokame juchim jiäbitenake. Jesús junel a nokʼla “sïme jume maarim Diosta ámew waateme a nokjiautam jikʼkaixna wanayim yew katʼnake” (Juan 5:28, 29). Jume sámarim imi buiäpo jiäbitekame juchi bemélasim ama joaana wanayim a bitna jachin ju buiá musälamachísi tawana, junel batnaataka Diosta a yäbarew bénasi (Lucas 23:43). Tuá lutüriapo, ju musälamachísi äbo wëme, jume sámarim Dióstamak tülisi au wériame jiba bechïbom jiápsina éntok jatwey junem ka kökorina. Ju Diosta Nooki junen jiawa: “Jume lútulaysi au weeriame buiätam atʼtiana, wanay jiba bechïbom ama joäna” (Salmo 37:29).

Ketche a bitcha Job 14:14, 15; Lucas 7:11-17, éntok Hechos 24:15 ta.

¿Jáchisute oraaruana Diosta ítom jikʼkainakew bechïbo?

Wepu oʼou oracionta joame

¿JATCHIASUM JUNËLIM EMO TETÉMAJE? Sïme religionimpo, jume sámarim oʼoraruamʼme. Junenta junʼne, juebénaka junëlim eyʼya ke Dios bem oracionim ka am yóyomia.

DIOSTA NOKÍM MAXTIAWI. Jesús junen jiawa: “Oraaruateko, kate élaka mismotibe nonoka (Mateo 6:7). Diosta ítom jikʼkaiʼiateko, a waatia bénasite oraaruana. Wa bechïbo, ata täyana jita a waatiawta wanay juunenakete jáchinte aw oraaruana. “Eläposu jita june au nétanëteko a watiaw bénasi, äpo ítom jikʼkaixna”, ítow jiawa 1 Juan 5:14 po.

Ketche a bitcha Salmo 65:2; Juan 14:6, 14, éntok 1 Juan 3:22 ta.

¿Jachin alʼleriata tewna?

Wepu jamʼmut alʼleriata jariame Diosta Noki pámani

¿JATCHIASUM JUNËLIM EMO TETÉMAJE? A suaaleka ke ju tomʼmi, jak june täyawi, o ju musälamachiwa alʼlerita am makna, junen bechïbo juebena sámarim ukayrim jipubábare. Junenta June, katim alʼleleya.

DIOSTA NOKÍM MAXTIAWI. Jesús a yuktiá jítasute tuá yäna alʼleriata jipu bechïbo junel jiaka: “Alʼleamʼme wame Diosta bétana juunepiamta jípureme” (Mateo 5:3). Junel jíbate tuá alʼlena utʼtiata joateko juka ché ítow bëyewta jipu bechïbo. ¿Jítasa?: juka lutüria Diosta bétana juunepiamta éntok ítom bechïbo jita a jípurewta. Jú lutüria Diosta Nokipo weyʼye, wanay a täyaka ítom aʼania at juuné bechïbo jítasu tuá béxresi maachi éntok jita eʼe. Diosta Noki jiaw paman ito wériäteko, juka jiapsiwamtate ché béxresite a bíbicha (Lucas 11:28).

Ketche a bitcha Proverbios 3:5, 6, 13-18 éntok 1 Timoteo 6:9, 10 ta.

Béjate lí am bitʼla jume yómiarim Diosta Nokím mámakame busan nátemaisrim bétana. ¿Chëre juunepeyʼya? Empo wame “Diosta bétana juunepiamta” jípuremak násuk anëteko, lútulaypo chëre juunebäna. Pueke emo temaísnake jatchia Dios kiela a bitcha juka ka tüwamta éntok kökosi ëwamta si lútulaypo ítot suuwa. Pueke juunebäna jachin em familiamak ché tülisi emo wériuna. Ju Diosta Noki tuá am yóyomia imeʼe éntok wate nátemaisrim.

Junenta junʼne, juebena sámarim katim Diosta Nokím nokbábare. Junëlim jijiá ke may yun jita nokím wéria éntokim am oʼobiachile at juuné bechïbo. ¿Aniáwamte mabetpeyʼya jume yómiarim Diosta Nokím mámakame tew bechïbo? Juka yabáreka, jume Jehováta testigom woy aniamta emo bechïbo jípure.

Ju bat wëme, ju libro ¿Qué enseña realmente la Biblia?, sámarim aniá bárekam yäri —te ché wame obisi aneme bechïbo— Diosta Nokím yómiarimʼmet suá bechïbo jume nátemaisrim béxresi machím bétana. Ju senu éntoko em joaapo Diosta Noki bétana kayta béxtuaka enchi maxtiana. Kie enchi maxtiá báreka, wepu Jehováta testigo ara Diosta Nokím bétana jabem maxtiame alʼleaka ama em joaw wëna, o jakun ché em türewi, wanay chikti semaanapo li tiémpota jiba émow yéyebisna émomak Diosta Nokím tüysi ámet suaka am bit bechïbo. Juebena sámarim ime maxtiriam bétana jita türitam ama yew nüla, wanay buurukam alʼleaka júnelim jiawla ke en alʼla lutüriatam tewla.

Empo ket are a bitna kem tüysim béxresi maachim jume lutüriam Diosta Nokipo wëme. Ka kie nayütiriam bétana enchi jíjinew, ket ka aw juuneame bétana ketchi éntok beje ka mauxna jita sualwamta bétana, wanay ítom jiápsiwamta esperánzata éntok alʼleriata a mámaka. Ju Jesús junel jiawa: “Lutüriatem täyana, wanay ju lutüria enchím jíneuna” (Juan 8:32).

1. Wepu oʼou Diosta Noki maxtiawi au maxtiaka; 2. Wepu jamʼmut Diosta Noki maxtiawi au maxtiaka