Jachin ama ayúkaw wënake

Índicew wëna

 SECCIÓN 1

Lióstawem rukte matrimóniopo alʼlenake bechïbo

Lióstawem rukte matrimóniopo alʼlenake bechïbo

“Bueïtuk júnakoï ániata [Liosta] naateyo, ‘outa entok jámutta yáuhuakʼ” (Mateo 19:4).

Jehová * Lios bat owta éntok bat jámutʼta jubtúak. Jú Biblia júneli jiawa ke apo bat jámutʼta yawʼwak éntok “owta a [...] makʼkak”. Adán may alʼleaka táwak wanay júneli jiawa: “Iʼi tuá in ótampo weyʼye éntok in tewʼwapo wëme” (Génesis 2:22, 23). Jehová jiba júneli a watiay buéytuk wame emo jubékame am alʼle iʼa.

Wanay woy géntem emo jubeko, jámak júneli énake ke sïme türina. Te lutüriapo jume emo jubékame chë emo nákeme junʼne obiáchisi ámew wénake (1 Corintios 7:28). Imi follétopo principio bíblicome ama tewna, en jiápsawapo am wétuaka, buéytuk ámet tekipánuateko alʼleriata en matrimóniopo éntok en famíliapo tewna (Salmo 19:8-11).

 1 TÉKILTE MABETA JEHOVATA ENCHI MÁKLAWI

BÍBLIATA NOKÄWI: Jú oʼow famíliataw koba yöwe (Efesios 5:23).

Empo jubeko, Jehová en jubi nákeka enchi a suaya iʼa (1 Pedro 3:7). Apo a yawʼwak enchi aniánake bechïbo tüysi a bítnake éntok a náknake (Génesis 2:18). Tüysi a náknake áporik wátiawi chë a bepʼpa béxresi a bítnake (Efesios 5:25-29).

Empo kunakäteko, Jehová en kuna tüysi a yöreka enchi a bit iʼa éntok enchi a aniá iʼa a tekʼkil yumaria bechïbo (1 Corintios 11:3; Efesios 5:33). Jita a yä bárepo a aniá éntok tüysi éaka a aniánake (Colosenses 3:18). Júneli a yákateko, Jehovátawi éntok en kunábewi béxresi bitʼtuna (1 Pedro 3:1-6).

JITA ARA EN YANAKËWI:

  • Ákea temaje en kuna o en jubita jítase yánake chë tüysi jita yä bechïbo. At suake a jikʼkaja éntok jita émow a áwawi ákea yawʼwa

  • Yanti éaka. Tülisi naw emo täyanake bechïbo ili tiémpota wéweria

2 TUALE AT SUUWA JITA EN KUNA O EN JUBITA INʼNEAWI

BÍBLIATA NOKÄWI: Tüysi béxresi machi suamsi a bítnake jita en kuna o en jubi inʼneawi (Filipenses 2:3, 4). Tüyse a bitcha en kuna o en jubi, awe wate Jehová sïme a tekipanualérom jiba tüysi emo am wériw iʼa (2 Timoteo 2:24). Ache suuwa jachin en nokbarëwi, buéytuk Biblia júneli jiawa: “Jume nókim ka tüysi nokwame esparata bénasi kökosi itom etua, te jú noki tüysi nokwame itom jikaw étuanake” (Proverbios 12:18, La Biblia Latinoamérica, 2011). Jehovata espíritu enchi aniánake suamsi éntok watem nákeka en noknákewi (Gálatas 5:22, 23; Colosenses 4:6).

JITA ARA EN YANAKËWI:

  • Lióstawe aʼawa enchi aniánake bechïbo yanti énake ketune ke en kunámaki o en jubímak nokákari

  • Suamse eyʼya jita en nokbarëwi éntok jáchise a nokná

 3 ÁWEM WATE NAW ENCHIM TEKIPÁNUAWI

BÍBLIATA NOKÄWI: Emo jubékame, jamʼmut éntok wepu oʼow “wepulak naw takáhuanake” (Mateo 19:5). Te jiba bénasi jámak weyo woyíkam ka nánancha énake. Wa bechïbo béxresi bitʼtu ke emeʼe junénake ara nánancha énake jáchisem eyʼya éntok jáchisem emo inʼnea (Filipenses 2:2). Naw éwame tüysi béxresi machi jita yä báwapo. ¿Jáchisu jojowa? Jú Biblia júneli jiawa: “Türi conséjom wojáwapo [...] sïme tüysi yew sisime” (Proverbios 20:18). Principio bíblicom pámanem emo weríwtebo jita naw béxresi machita yä barëteko (Proverbios 8:32, 33).

JITA ARA EN YANAKËWI:

  • Kate kiá jita bétana noka en kunábew o en jubíbew; jachin en inʼneaw keche a texwa

  • Ketune ke jita yákari, bache en kuna o en jubi temaje

^ parr. 4 Biblia júneli jiawa ke Liosta téwam Jehová.