Jachin ama ayúkaw wënake

Índicew wëna

 SECCIÓN 3

Jáchisu problémam tütenake

Jáchisu problémam tütenake

“Nánanchem tüisi émo nákke, bueïtuk jü émo nákhuame juebéna [pecádom] yáarim tuchánake” (1 Pedro 4:8).

Wanay wepu oʼow éntok wepu jamʼmut emo jubeyo, juebena problémam yew wéweye, katim nanálaysi éaka bétana éntok jachin inʼneaka o jachin yöturiarika bétana. Ket ámat wëyo jume problémam sekäna bétana wéweye o jita ka itom böbichaka bétana.

Türeyey ka kásota am yáriateko, te jú Biblia itom texwa kete ámew púxbatena (Mateo 5:23, 24). Chë tülisi émow wénake Bíbliata nokaw joáteko.

 1 PROBLÉMATA BÉTANE NOKA

BÍBLIATA NOKÄWI: “Wepu [...] tiempo ayu nok bechïbo” (Eclesiastés 3:1, 7). Tiémpote emo makʼka problémata bétana nok bechïbo; wiwitʼti en kunata o en jubita texwa jáchim emo inʼneawi éntok jáchise eyʼya iʼa bétana. Lutüriate jibe aw noka (Efesios 4:25). Elápose omtéteko, kate nanasʼsua. Si suamsi eáteko a yómiako kate wepu problema ilítchita buéwrusi a yánake (Proverbios 15:4; 26:20).

Eláposu ka en kuna o en jubi bénasi eáteko, tülise ámak emo weria; kate yáteka nákwamta a bitʼtua éntok yöriwamta (Colosenses 4:6). Láwtipe problémata tüte, éntok kátem emo nok totʼtoja (Efesios 4:26).

JITA ARA EN YANAKËWI:

  • Tiémpote yew puwʼwa problémata bétana nok bechïbo

  • En kuna o en jubi nokayo, kiele a jikʼkaja. Chúkula empo ara nokná

 2 AT SUAKE A JIKʼKAJA

BÍBLIATA NOKÄWI: “Sïmetakem émo nákke, émo saylakamta bénasi: Emo ériakem émo bitcha, entokem sïmeku emesu émo chë éria” (Romanos 12:10). Tüysi béxresi machi ara jikʼkaja bechïbo éntok ache suuwa jáchisu eyʼya en kuna o en jubi, “émo nákeka émo sailakamta bénasi [...] kaa émo búerialeka” (1 Pedro 3:8; Santiago 1:19). Kate a baitʼtatawa a jikʼkaja tiaka. Jibe ama yumáteko, en jowawi tojʼja wanay en kunata o en jubite tüysi jikʼkaja, o ákea temaje si chúkula ara naw nokná. Si en kunata o en jubita amigo bénasi a bíchako ka saayo bénasi, kate láwtipo oʼomtina (Eclesiastés 7:9).

JITA ARA EN YANAKËWI:

  • Tüyse a jikʼkaja juka en kuna o en jubita nokäwi, elápose ka a türew junʼne

  • Kate kié a nokaw jiba jikʼkaja, ache suuwa juka en kuna o en jubita émow nokbarëwi. ¿Jáchisum machi a púsim o a puxba? ¿Jáchisu benʼna a nokäwi?

3 UTʼTIATE YÁSIME

BÍBLIATA NOKÄWI: “Sïme tekʼkil béxtuarita jípure, te jú kié nokwame ka chúchupawame káytapo tatawa” (Proverbios 14:23, La Biblia Latinoamérica, 2011). Ka kiá ara problémam jiba aw tütenakew türi. Tüysi türi a yáteko. Jámak emo bétana tüysi utʼtiata áwnake, te jita tüwate ama yew wíknake (Proverbios 10:4). Si naw tekipánoateko, tüysi enchimʼmew wénake (Eclesiastés 4:9).

JITA ARA EN YANAKËWI:

  • Ache eyʼya jítasem yánake emeʼe woyika problémata tüte bechïbo

  • Chikti wélapo ache suuwa, enchim utʼtiata jówaw bétana