Pëya di bametsu ulibar

Yaan di ujundi

Yaan di ujundi ulibar

Bayëla Jeuva

Manjaku

Nasiën batsi Aka Kakuran Kawar pa Inja!

 UME 2

Yën ci wun Nasiën batsi?

Yën ci wun Nasiën batsi?

1. Wékawun ngë ka përo ko wi Nasiën batsi ja wi?

Nasiën batsi leemp inja wun, te leempun ngëko bëliëng. Kaats ujundi te ci wun narikaba. (Psaume 90:2) Nul ci wun ajug kakuran kawar kan ci ki di Biblë. (Timothée 1:11) Ngë ka përo ko wi na ja wi par nul leemp inja wun. — Jangiri Révélation 4:11.

2. Wé Biblë jawun uleka Nasiën batsi?

Iñaan netse win Nasiën batsi, par ngë purirëts pëwinul, ape inja uforsa ni bëlipal. (Jean 1:18; 4:24) Maa uci ngë teen ngëko ngi na leemp ngi, ngë purir pëme yën ci wun Nasiën batsi. Nasiën batsi leemp m’ko m’cumal. M’ko ka piban ne nul añgal inja te na lipë. Urëmbar batsi, ngëpesaj ni umundu ka piban ne Nasiën batsi aka uforsa. — Jangiri Romains 1:20.

Ngë purir pëwatsës ume uleka Nasiën batsi uci nja kë jangir Biblë. Di Biblë ngë purir pëme ko wi Nasiën batsi ñgal wi, ni ko wi na bër wi, ngë purir buts pëme ko wi nu ro wi uci bañaan do uwar o umaal. — Jangiri Psaume 103:7-10.

3. Katim Nasiën batsi ka jaa um?

Yeesu aja: “Paapu [nan cii di batsi], katimu kajënts ka ciin kan dëmbana ki.” (Lukas 11:2) Balon ka ja Nasiën batsi ka itim icumal pi, Narikaba ni Ajug. Maa yi cits itim, Nasiën batsi ka katim kaloole rin. Di kara pëleents aka bi katim Nasiën batsi ku rua bi. Di Manjaku katim Nasiën batsi ka rua “Jeuva.” Maa balon ka ru buts kul “Yahweh.” — Jangiri Psaume 83:18.

Di ilon Biblë, katim Nasiën batsi pënana, a ba tsu Ajug o Nasiën batsi. Maa bi Biblë picana bi, katim Nasiën batsi  ci rul ko un wokan wi ngëyas 7.000. Yeesu leents bañaan katim Nasiën batsi bi nu jukan bi bukul. — Jangiri Jean 17:26.

4. Ne Jeuva tsunkar inja?

Nasiën batsi tsunkar inja pi asin napats ni tsunkarul bi

Unoor abuër di umundu tsari, maa ko wi ñgalats pëja ne, Jeuva tsunkarëts inja. Balon bañaan jaar ne Jeuva ka tsu inja wun unoor pa pëteen-teenan inja, maa ko wi cits ucar. — Jangiri Jacques 1:13.

Nasiën batsi wët inja përat ko wi ngë ñgal wi përo. Ngë wara pëlilan bi na wët inja bi përat ne nja ka fetsul o ngë ri ka fetsul. (Josué 24:15) Maa balon rat përo bañaan umaal, kawun unoor cum di umundu. Jeuva lilanëts pëwin kawaraats ki bañaan kë ro ki. — Jangiri Genèse 6:5, 6.

Jeuva ci Nasiën batsi ni m’mee atsunkar inja. Añgal inja pëci uwar di ubira. Di ka jon nu ba ni unoor ni bañaan bi kan nooran biki bacints bukul. Maa aka ko un ka wi na wama wët unoor pa ko tiës. Di Ume 8, nja kéé me ko un ka wi. — Jangiri 2 Pierre 2:9; 3:7, 13.

5. Um bi ngë purir bun pëwok Nasiën batsi?

Jeuva ja inja pëwokul, nja ka ñakan ni nul di bëñaan. Atsunkar kara iñaan. (Psaume 65:2; 145:18) Nul añgal pëpërar bañaan. A roon nu win uforsa wi nja kë ro wi pa përo uwar, ñgal bi nja kë juban bi. Ngë ci bajuban, maa ko wi laañgats inja pëwok Nasiën batsi o pëci bëfetsarul. — Jangiri Psaume 103:12-14; Jacques 4:8.

Jeuva wël inja wun ubira, kawun ngë ka pëpe pëñgalul. (Marc 12:30) Uci m’ci tsi pëwatsës umeu uleka Nasiën batsi a kë ro ko wi na ja wi, kë piban ne m’ñgalul te kë pe pëwokul. — Jangiri 1 Timothée 2:4; 1 Jean 5:3.