Pëya di bametsu ulibar

Yaan di ujundi

Yaan di ujundi ulibar

Bayëla Jeuva

Manjaku

Nasiën batsi Aka Kakuran Kawar pa Inja!

 UME 5

Wé Nasiën batsi ñgal wun pa umundu?

Wé Nasiën batsi ñgal wun pa umundu?

1. Wékawun Nasiën batsi leemp umundu?

Jeuva leemp umundu pa bañaan bajën. Umundu ci pa inja. Niints ni ñgaats nacak, Adam ni Eva bu roots leempa pa pëci di batsi. Nasiën batsi ro leemp ba ngëwaanju pa pëci di batsi. (Job 38:4, 7) Nasiën batsi tsu niints nacak di tsëko tsëwar, tsi kan jaka tsi utol Eden. (Genèse 2:15-17) Jeuva ro ñgal pa bukul pëka ubira undits wi kaba ni babuk bukul di umundu. — Jangiri Psaume 37:29; 115:16.

Di ujund umundu, utol Eden rin do un ci tsëko tsëwar. Niints ni ñgaats nacak bu ro ka pëbuk pëcuman umundu. Kotiës-kotiës bu bi ka ro tsu umundu bëliëng uci tsëko tsëwar. (Genèse 1:28) Umundu di ka coka yas. Bañaan ka ci di umundu rin. — Jangiri Psaume 104:5.

2. Wékawun tsari umundu cits tsëko tsëwar?

Adam ni Eva ro ko wi Nasiën batsi pok wi bukul, kawun Jeuva ruak bukul di utol. Bu pën di tsëko tsëwar, te kaats iñaan najën nan yëlani pëtsu umundu uci kak tsëko tsëwar. Biblë aja: ‘Umundu wëla ba ro ngëwutsëtsuël’. — Job 9:24. — Jangiri Genèse 3:23, 24.

Ne Jeuva mui përo ko wi na ro wi ñgal përo pa bañaan bajën? Nau! Nul pewun pëka uforsa. Ka ro ko wi na ja wi. (Isaïe 45:18) Ka tsu bañaan bëliëng bu ka ci bi na ro bi ñgal bukul pëci. — Jangiri Psaume 37:11, 34.

3. Lum di umundu kii ci run kak tsëko tsëwar?

Umundu ka ci kak tsëko tsëwar, uler wi Yeesu kii siën wi wul. Di ukam wi kan jaka wi Armajedon, Yeesu ka ci ni ngëwaanju, pa pë ba ni bañaan ban bër biki Nasiën batsi. A kë ba nu ric Useetaani pa ngëwaanu 1.000. Bañaan bi kan fets biki Nasiën batsi bu ri ka fiñga, par Yeesu ka jurar  bukul nu buëran bukul. Bu ka ka ubira undits wi kaba di umundu wi kan ci wi Tsëko tsëwar. — Jangiri Révélation 20:1-3; 21:3, 4.

4. Lum di unoor kë ba run?

Lum di Nasiën batsi kë ba run ni umaal di umundu? Yeesu ro leents ko wi kan ‘piban’ wi ne unu wan awokani. Ngëko ngi ka wina ngi tsari di umundu alënkan, ka piban ne ngë ci tsi ‘utuamara umundu’. — Jangiri Matthieu 24:3, 7-14, 21, 22.

Yeesu ci Nasiën di batsi, kéé siën umundu bëliëng pa ngëwaanu 1.000, nu ba ni unoor bëliëng. (Isaïe 9:6, 7; 11:9) Yeesu ka siën umundu, nu ci pi Nawiak tsi bëga di tsëko bëñaan, ka përar ngëjuban bañaan ban ñgal biki Nasiën batsi. Nasiën batsi ka tsu Yeesu nu ba ni pëmaak, pëtsaf ni pëcats. — Jangiri Isaïe 25:8; 33:24.

5. Yën kéé ci wun di tsëko tsëwar?

Di Usaal Ngëreñu kë tsënk rul bañaan ban ñgal biki Nasiën batsi a ba ñgal përo ko wi na ja wi

Bañaan bi kan cikëndën biki Nasiën batsi kéé ci bukun di tsëko tsëwar. (Jean 2:17) Yeesu aja bafetsul, ba tsas bañaan ban wara biki uwaas, bu ka jukan bukul përo ko wi Nasiën batsi ja wi. Tsari Jeuva ci di pëjurar bañaan bacumal bu kéé purir pëka ubira undits wi kaba di tsëko tsëwar di umundu. (Tsephania 2:3) Di Usaal Ngëreñu Bayëla Jeuva, bañaan ka juk ngëko ngëwar. Niints ka juk bi na purir bi pëci uwar ni aarul ni babukul, ñgaats ka juk bi na purir bi pëci uwar ni ayënul ni babukul. Upats ka fets Nasiën batsi ni basin bukul ni banin bukul, bu ka juk pëme bi kakuran kawar purir bi pëjurar bukul. — Jangiri Mika 4:1-4.