Pëya di bametsu ulibar

Yaan di ujundi

Yaan di ujundi ulibar

Bayëla Jeuva

Manjaku

Nasiën batsi Aka Kakuran Kawar pa Inja!

 UME 10

Um bi m’purir bun pëyikrën bëga bëcar?

Um bi m’purir bun pëyikrën bëga bëcar?

1. Ne bëga bëcar bëloole ci bun din?

‘Nda lipari bayëlia kafal’ — MATTHIEU 7:15.

Yeesu ja bafetsul bëga bëcar aci bëloole rin. Aci pi bëga bi kan tsu bi iñaan nu ka ubira undits wi kaba. Yeesu ja: ‘Bawin bul cumats’. (Matthieu 7:14) Nasiën batsi ka niiran bëga bi kan fets bi ko un ci wi di Biblë, Përimul pëcar. Ban ci biki di bëga bëcar bu teelër tsi ko wi ba fiar wi. — Jangiri Jean 4:23, 24; 14:6; Éphésiens 4:4, 5.

2. Wé Yeesu jawun uleka iga kafal?

‘Bu ka ja bu me Nasiën batsi, maa ko wi bu kë ro wi ka piban ne bu bërul’. — TITE 1:16.

Yeesu ja bafetsul, aka bañaan bi kéé jukan biki ko un cits wi ucar. Bu ka naam ne bu ci di bëga bëcar. Bu ka ja bu ci bafets Yeesu. Maa m’purir pëme ne bu cits bafets Yeesu. Um bi m’purir bun pëme ko wi? Ban ci biki di bëga bëcar koor bukul, ka piban bukun tsi ko wi bu kë ro wi, ne bu ci bafets Yeesu. — Jangiri Matthieu 7:13-23.

3. Um bi m’purir bun pëyikrën ban ci biki di bëga bëcar?

Teenan ngëko kañan pa pëyikrën bukul:

  • Bañaan bëga bëcar rispitar Biblë, Përim Nasiën batsi. Bu ka ro uforsa pa përo ko wi Biblë ja wi. Bëga bëcar bofats ni iga yi kan jukan yi ngëwejats bañaan bajën. (Matthieu 15:7-9) Bañaan ban ci biki di bëga bëcar bu ka ro ko wi bu kë jukan wi balon. — Jangiri Jean 17:17; 2 Timothée 3:16, 17.

  •   Bafets Yeesu rispitar katim Nasiën batsi, Jeuva. Yeesu rispitar katim Nasiën batsi, aleents kul bañaan. A jurar bañaan ba me katim Nasiën batsi a na jukan bukul pëñaan pa katim Nasiën batsi pëjënts. (Matthieu 6:9) Di ucaaku, bëga boom ka leents bun bañaan katim Nasiën batsi. — Jangiri Jean 17:26; Romains 10:13, 14.

  • Ban ci biki di bëga bëcar ka ñakan ni bañaan uleka Pësiën Nasiën batsi. Nasiën batsi yëli Yeesu umundu, pa pëleents kakuran kawar uleka Pësiënul. Pësiën Nasiën batsi koor pul purir pun pëkuri uwar pa bañaan bajën. Yeesu ñakanan bañaan uleka Pësiën Nasiën batsi, te unu wi na cats wi. (Luc 4:43; 8:1; 23:42, 43) Yeesu aja, bafetsul aka pëleents bañaan uleka pësiën pi. Biyën ka ya bukun di ito bañaan, pa pëleents bukul kukuran kawar uleka Pësiën Nasiën batsi bi Yeesu ro bi? — Jangiri Matthieu 24:14.

  • Bafets Yeesu bofats di umundu wi. M’purir pëyikrën bukul par bu bofats di plutik ni purblem umundu. (Jean 17:16; 18:36) Bu ri ka ro ngëko nga waraatsa ngi, ngi bañaan umundu kë ro ngi. — Jangiri Jacques 4:4.

  • Ban ci biki di bëga bëcar ñgalar mak. Ko wi ba juk wi di Biblë a jurar bukul përispitar bañaan ngëraasa bëliëng. Bañaan ban ci biki di iga kafal bu roon bu kë bof di ngëkam umundu, maa ban ci biki di bëga bëcar bu ri ka ro pi bukul. (Mika 4:1-3) Maa bu ka jej untan bukul ni ko wi ba ka wi pa pëjurar bañaan. — Jangiri Jean 13:34, 35; 1 Jean 4:20.

4. Um bi m’purir bun pëyikrën bëga bëcar?

Boom bëga ka jukan bun ko un ci wi di Biblë, Përim Nasiën batsi, a ba rispitar katim Nasiën batsi a bu leents ne Pësiën Nasiën batsi koor pul kéé kuri pun uwar pa bañaan bajën? Bañaan boom ñgalar bukun te bu ri ka bof di ukam? Pa wi aci bañaan boom? — Jangiri 1 Jean 3:10-12.