Pëya di bametsu ulibar

Yaan di ujundi

Yaan di ujundi ulibar

Bayëla Jeuva

Manjaku

Nasiën batsi Aka Kakuran Kawar pa Inja!

 UME 14

Wékawun Nasiën batsi boflën bañaanul pa përo ko wi na ja wi?

Wékawun Nasiën batsi boflën bañaanul pa përo ko wi na ja wi?

1. Wékawun Nasiën batsi ro boflën bañaan Israel pa pëci bañaanul?

Nasiën batsi boflën bañaan pëbuka Abraam, a ba ci di ucaak uloole a na wël bukul ngëlua. Ucaak bukul ka jaa Israel, wël roon ci ucaak wi kan fets wi ko wi Nasiën batsi ja wi koor wël, te bukul ro bukun tsij Përim Nasiën batsi. (Psaume 147:19, 20) Bañaan ngëcaak bëliëng ka beenira unkonta bañaan Israel. — Jangiri Genèse 22:18.

Nasiën batsi rat bañaan Israel ba ci bayëlaul. Ko un par wi ni bañaan Israel, ka piban ne uci bañaan fets ngëlua Nasiën batsi bu ka ci uwar. (Deutéronome 4:6) Bañaan ngëlon ngëcaak purir pëme Nasiën batsi uwar uci ba teena di bañaan Israel. — Jangiri Isaïe 43:10, 12.

2. Wékawun bafets Yeesu boflër pa përo ko wi Jeuva ja wi?

Bañaan Israel tsu te Jeuva bër bukul, a na rat kanbof bafets Yeesu. (Matthieu 21:43; 23:37, 38) Tsari, bañaan Israel katse ci bayëla Jeuva, bafets Yeesu ci bukun bayëla Jeuva. — Jangiri Actes 15:14, 17.

Yeesu boflën bafetsul pa pëleents kakuran kawar di umundu bëliëng te bu ka jurar bañaan përo ko wi Yeesu ja wi bukul. (Matthieu 10:7, 11; 24:14; 28:19, 20) Uleemp wi, ro ngëko ngëcumal tsari, di utuamara ngënu umundu wi. Tsi bëyaas bëcak di umundu, Jeuva boflën bañaan bacumal a ba ci di pëfetsul. (Révélation 7:9, 10) Bafets Yeesu ci baloole a bu kë jurar bacints bukul. Di umundu bëliëng, ko uloole wi bu kë juk wun di ngëreñu ngi bu kë ro ngi pa pëjuk Biblë. — Jangiri Hébreux 10:24, 25.

 3. Bayëla Jeuva tsari, um bi ba jund bun?

Di uwaanu 1870, balon bañaan, bi kan juk biki Biblë, bu jund pëwini ucar un ci wi di Biblë, wi bañaan dots wi ka jukana pa ngëwaanu ngëcumal. Bu win ne Yeesu ro kanbof bafetsul pa pëleents Përim Nasiën batsi, din a ba jund pëleents Përim Nasiën batsi di umundu bëliëng. Di uwaanu 1931 bu jaj katim Bayëla Jeuva. — Jangiri Actes 1:8; 2:1, 4; 5:42.

4. Um bi Bayëla Jeuva kë ro bun pa pëleents Përim Nasiën batsi?

Di pëcël bapostulu, aro ka kanbof bafets Yeesu di ngëcaak ngëcumal, bu roon bu kë fets ko wi bayër bërum tsi bëga ja wi bukul, un ci wi bapostulu. Bayër bërum tsi bëga, bukul buts bu me ne Yeesu ci wun Nawiak kanbof. (Actes 16:4, 5) Tsari buts, Bayëla Jeuva di umundu bëliëng ka fets ko wi Bayër bërum tsi bëga ja wi. Bu ci bajiëñgal di bëga, bi kan piban biki um bi uleemp Bayëla Jeuva kë rola bun di tsëko tsi bu kë leemp tsi ngëlibar tsi ko un wokan wi m’leents 700. Di umundu bëliëng aka ko un par wi inbof 110.000 bafets Yeesu, Bayër bërum tsi bëga ka jurar bukul a bu kë jukan bukul ko un ci wi di Biblë. Di kara kanbof Bayëla Jeuva aka bayënts ban ci biki bajiëñgal di bëga. Bukul bu tsunkar pëtan Nasiën batsi. — Jangiri 1 Pierre 5:2, 3.

Bayëla Jeuva ka leents kakuran kawar a bu kë jurar bañaan pëci bafets Yeesu. Bu ka ro pi bapostulu Yeesu, bu ka ya di ito bañaan pa pëleents Përim Nasiën batsi. (Actes 20:20) Bu ka jukan buts Biblë pa ban ñgal biki pëme ucar. Maa Bayëla Jeuva bu cits bañaan bëga rin. Bu ci famil dëloole, ban ka biki Asin bukul nan ñgali bukul. Bu yëts tsi bëga a ba tsunkar bacints bukul. (Thessaloniciens 1:3) Bayëla Jeuva boflër pa përo ko wi Nasiën batsi ja wi ni pëjurar bañaan, kawun ba ci famil dan pe ri pëlilan di umundu. — Jangiri Psaume 33:12; Actes 20:35.