Pëya di bametsu ulibar

Yaan di ujundi

Yaan di ujundi ulibar

Bayëla Jeuva

Manjaku

Jukani Babuku

 UME 5

Samuel amob tsi përo uwar

Samuel amob tsi përo uwar

Bi Samuel ci bi napats, atsëp ee ci di kawok tsëko bëñaan pa pëleemp rul, tsëko bëñaan aci tsëko tsi bañaan kë ya tsi pa pëñaan Jeuva. M’me um bi Samuel ro bun te na ya di tsëko bëñaan? Nja ka cakës bërum pëme yën ci wun Aana, anin Samuel.

Ajon ki Aana ñgal ki pëka napats, maa purirëts. Kawun na ñaan Jeuva na jurarul. Aja Jeuva uci na ka napats, nu tsëpandul kawok tsëko bëñaan pa nul pii leemp rul. Jeuva jurarul a na buk napats niints. A na tsuul katim Samuel. Aana ro bi na ja bi Jeuva, bi Samuel ka bi ngëwaanu ngëwaants o ngëwaanu ngëbakër a na tsëpandul tsëko bëñaan pa pëleempar Nasiën batsi.

Eli ro ci nan pei pëci nawiak tsi bëga di tsëko bëñaan. Babukul batëb ka leemp di tsëko bëñaan bu ci buts bawiak tsi bëga. Lesan ne tsëko bëñaan aci kato Nasiën batsi, tsi bañaan kë ya tsi pa pëñaan Nasiën batsi, bañaan ban ci biki rul bu ka përo uwar. Maa babuk Eli do ka ro umaal. Samuel awin ko wi bu kë ro wi. M’jaar ne Samuel ro umaal pi babuk Eli? — Samuel doots umaal, amob tsi përo uwar pi asinul ni aninul jukanul bi.

Wé Eli ro wun ka përo babukul? — Aro ka pëleents bukul bu ka wëtan ka ro umaal. Aro ka pëlaañg bukul pëleemp di kato Nasiën batsi. Maa Eli doots ank, a Jeuva riabatsërul ni babukul. A Jeuva ja kateelër ni bukul.

Samuel aleents Eli kakuran Jeuva

Ulon unu bërëm, bi Samuel ci bi di bëñgoy, a na te iñaan duul: ‘Samuel!’ A na tuk aya di Eli, maa Eli jaul: ‘Nji duutsu.’ A na te kak iñaan duul uyaas utëbantsën, maa tsi uyaas uwajantsën a Eli ja Samuel uci na te kak iñaan duul nu ja: ‘Jeuva, ñakani; man cikëndënu.’ Unk di Samuel do run. A Jeuva jaul: ‘Jaan Eli man teelër ni bukul undo  umaal wi ba ro wi.’ M’jaar ne a raf pa Samuel pëleents Eli kakuran ki? — Rafats. Samuel aro lal, maa a bi leents ko wi Jeuva jaul wi. Jeuva ro bi na ja bi. Babuk Eli batëb ee fiñga, a Eli cats buts.

Ngë purir pëjuk ko uwar di Samuel. Aro uwar ñgal bi na win bi balon kë ro umaal. A wi buts? Kë mob tsi përo uwar pi Samuel? Uci m’do ank, kë lilan Jeuva kë lilan buts asinu ni aninu.

JANGIRI DI BIBLË

  • 1 Samuel 2:​22-​26; 3:​1-​21