Pëya di bametsu ulibar

Yaan di ujundi ulibar

 UME 6

Dawid doots lal

Dawid doots lal

Uci m’lënk, kë room? — M’doots kë tuk kee laaba di asinu o di aninu. Maa aka nalon nan puriri pëjuraru buts. Pewun bañaan bëliëng pëka uforsa. Aci yën? — Aci Jeuva, Nasiën batsi. Nja ka tsas pëme ulon upaas ni Biblë ñakanani, ni kan jakee Dawid. Ame ne Jeuva ka jurarul, kawun na lalats.

Bi Dawid ci bi napats, asinul ni aninul bu jukanul pëñgal Jeuva. Wul kawun Dawid di ka lal ñgal na win ko un lënkan wi. Ame ne Jeuva ci Bëfetsarul te nu jurarul. Bëlon bëyaas, bi Dawid ci bi di pëyafan ngënkarnel, ulion uwiak abi ee jank ulon ukarnel! M’me ko wi Dawid ro wi? A fets ulion a na mob wul di bëjuak a na fiñg wul! Bi ulon uko bëreen ñgal bi pëmob ngënkarnel, a Dawid fiñg buts wul! M’me iñaan nan jurari Dawid? — Aci Jeuva.

Aka bëlon bëyaas bi Dawid piban bi ne, tsi ucar ayeents ko. Bañaan Israel do ci tsi pëkaman bafilisteu, bañaan ulon ucaak. Nalon nasondaari bafilisteu, abuër kayamp te na ka uforsa! Katimul ka jaa Golias. Aci di përiat basondaari Israel ni Jeuva. Golias aja basondaari Israel ba ya pëkamanul. Maa di Israel bëliëng kaats na yeentsi pëkamanul. Bi Dawid te bi ko wan a na ja Golias: ‘Man kamanu! Jeuva ka jurarin ka gañaaru!’ M’jaar ne Dawid ayeents-a? — Ayeents. M’ñgal pëme ko un bi par?

Dawid ajej ulanparan ni ilaak kañan, a na pën pii kaman Golias. Bi Golias win bi ne Dawid aci upaas rin, a na ci di përiatul. Maa Dawid jaul: ‘M’bi pëkamanin ni ulaac, maa, man bi ri wi ni katim Jeuva!’ Din a Dawid tsu pëlaak di ulanparan, a na wëtandër pul Golias. A pëlaak kob Golias di  pëjuk! A Golias yër a cats! A bafilisteu lënk a ba tuk. Um bi upaas pi Dawid purir bun pëfiñg Golias? — Jeuva jurarul wun, te Jeuva pe Golias pëka uforsa!

Dawid doots lal par ame ne Jeuva ka jurarul

Wé m’purir wun pëjuk di Dawid? — Jeuva pewun bañaan bëliëng pëka uforsa. Te aci Bëfetsaru. Unu wi m’lënk wi, lesan ne, Jeuva purir pëjuraru kë yeents.

JANGIRI DI BIBLË

  • Psaume 56:​3, 4

  • Samuel 17:20-​54