Pëya di bametsu ulibar

Yaan di ujundi

Yaan di ujundi ulibar

Bayëla Jeuva

Manjaku

Um bi familu purir bun pëlilan?

 KAJARA 7

Um bi nda ka bun pëkus babuk ind?

Um bi nda ka bun pëkus babuk ind?

“Irim yi ndë leentsu ink tsari aka pëci di uwaasu, m’ka pëjukan yul babuku.” — Deutéronome 6:6, 7

Bi Jeuva leemp bi famil, aja asin ni anin napats ka bukun pëkusul. (Colossiens 3:20) Ind ka bukun pëkus babuk ind bu ka ñgal Jeuva, bu kéé ci batsafal ban me biki ko. (Timothée 1:5; 3:15) M’ka buts pëtsas pëme ko un ci wi di uwaas abuku. Ko wi kë ro wi abuër ka wara par bu kateena di wi. Uci m’tsu përim Jeuva di uwaasu bërum, kë rura purir pëjukan pul babuku uwar. — Psaume 40:8.

 1 DOON PA BABUKU PËLILAN PËÑAKAN NI WI

WÉ BIBLË JAWUN: “Iñaan na caran puu cikëndën nu tsëkandër te nu rura ñakan.” (Jacques 1:19) M’ñgal pa babuku pëlilan pëñakan ni wi. Bu ka pëme ne m’ñgal pëcikëndën bukul uci ba ñgal pëñakan ni wi. Ciin uwar ni bukul bu ka yeents pëleentsu ko un ci wi di uwaas bukul. (Jacques 3:18) Uci ba me ne kë leentsar bukul bu ri ka yeents pëleentsu ko wi ba wejats wi. Yëlan pëmira bukul, kë piban bukul ne m’ñgal bukul. — Matthieu 3:17;Corinthiens 8:1.

KO WI M’PURIR WI PËRO:

  • Uci abuku ñgal pëñakananu cikëndëniul.

  • Dukaan ka ñakan ni babuku, tsats lip unu wi purblem ci wi.

2 TSASAN PËME KO WI BABUKU ÑGAL WI PËJA

WÉ BIBLË JAWUN: “Nan pibani bëlipal tsi ko ka win uwar.” (Proverbes 16:20) Pa wi pëme ko un ci wi di uwaas abuku, m’kaats pëteena di ko wi nu jau wi rin. Upats a roon bu ka car pëja ko, ujëkanda cits wul wi ba wejats wun. Biblë aja: “Uci iñaan cësa aja ko te netse me bi uci bi, aci bëfuur.” (Proverbes 18:13) Tsats car uriab. — Proverbes 19:11.

KO WI M’PURIR WI PËRO:

  • Uci abuku kë ñakan tsë falul uñakan, wëtanul nu leentsu ko wi na ñgal wi.

  • Lesan bi m’do bi ka wejats bi m’ling bi ni nul.

 3 NDA TEELËRI BI NDU KUS BI BABUK IND

WÉ BIBLË JAWUN: “Abuk inji, cikëndëni përim asinu, tsats fin ko wi aninu kë jau wi.” (Proverbes 1:8) Jeuva ja asin ni anin napats ka bukun pëkusul. Nda ka pëjukan babuk ind bu ka rispitar ind bu ka cikëndën ind. (Éphésiens 6:1-3) Uci ‘nda teelërëts nda tsijats uwejats uloole’ upats ka me. (1 Corinthiens 1:10) Uci nda teelërëts tsi ko, ind tsë ñgom tsi bërum bukul, par ko wi purir pëtsu bukul ba rits rispitar ind.

KO WI M’PURIR WI PËRO:

  • Nda ñakani ndu teelër bi nda ka bi pëkus babuk ind.

  • Uci nda teelërëts ni aaru o ayënu bi nda ka bi pëkus babuk ind, tsasan pëcikëndën ko wi nu jau wi.

 4 NDA TEENAN BI NDU RO BI

WÉ BIBLË JAWUN: “Pibani napats bëga bi na ka bi pëyandaar.” (Proverbes 22:6) Uci m’ñgal babuku pëci uwar m’ka pëkus bukul. Nda ka pëka bi ndu ro bi pa pëkus babuk ind. Katucana bof di pëkus napats. (Psaume 127:4; Proverbes 29:17) Maa pëkus napats cits katucana rin, aci pëjurarul nu me wékawun nda jaul na rits ro ko o na ro ko. (Proverbes 28:7) Nda jukani buts bukul pëñgal Biblë bu ka yël pëme ko wi Biblë ñgal wi pëja. (Psaume 1:2) Ko wi ka jurar bukul bu ka ka uwejats un fac wi. — Hébreux 5:14.

KO WI M’PURIR WI PËRO:

  • Jurari babuku bu ka me ne Nasiën batsi ci, te bu purir pëfiar di nul.

  • Jurari bukul bu ka me përand ko un waraatsa wi, pi ngëko gan ci ngi di internet. Jukani bukul bu ka rand bañaan ban ñgal biki pëpints ni bukul.

“Pibani napats bëga bi na ka bi pëyandaar”