Pëya di bametsu ulibar

Yaan di ujundi

Yaan di ujundi ulibar

Bayëla Jeuva

Manjaku

Um bi familu purir bun pëlilan?

 KAJARA 9

Famil nda fetsan Jeuva

Famil nda fetsan Jeuva

“Nda fetsan Nan leempi batsi ni utsia.” — Révélation 14:7

Di ulibar wi, m’win ne ko un ci wi di Biblë apurir pëjuraru ni familu. Jeuva ñgal ind pëlilan. Aja uci nda ro ko wi na ja wi bërum “ngëko ngëcints ngi bëliëng kéé kësësa ind.” (Matthieu 6:33) Jeuva ñgal wi pëci bëfetsarul. Doon ko wi m’purir wi pa pëci bëfetsarul. Kaats ko un ling wi ni pëfetsar ni Nasiën batsi. — Matthieu 22:37, 38.

 1 LINC LINCANI BËFETSARU NI JEUVA

WÉ BIBLË JAWUN: “ ‘Man ci asin ind, ndu ci babuk inji,’ ko wi Jeuva jawun.” (2 Corinthiens 6:18) Nasiën batsi ñgal wi pëci bëfetsarul nawiak. Bëñaan purir pëjuraru kë ci bëfetsarul. Jeuva jau “ciin tsi bëñaan.” (1 Thessaloniciens 5:17) A ñgal wi pëleentsul ko un ci wi di uwaasu ni ko wi m’wejats wi. (Philippiens 4:6) Uci kë ñaan Nasiën batsi ni familu bu ka win ne m’fiar di nul.

Pëñaan Nasiën batsi wara, maa m’ka buts pëcikëndënul. M’purir pëcikëndënul, uci kë juk ko un ci wi di Biblë ni ngëlibar ngi ka ñakan ngi uleka Biblë. (Psaume 1:1, 2) Wejatsi tsi ko wi kë juk wi. (Psaume 77:11, 12) Pa pëcikëndën Nasiën batsi m’ka buts puu maatir ngëreñu Bayëla Jeuva. — Psaume 122:1-4.

Pëleents balon përim Jeuva aci buts ko un purir wi pëjuraru kë linc lincan bëfetsaru ni nul. Uci m’ci tsi përo ko wi, kë pe-kë-pe pëwokul. — Matthieu 28:19, 20.

KO WI M’PURIR WI PËRO:

  • Doon uforsa pa puu jangir Biblë kara unu, kuu ñaan Nasiën batsi.

  • Famil nda tsuun ngëko Nasiën batsi di bërum bënoonts ni unaakësa.

2 NDA ÑGALAN PËJUK BIBLË DI FAMIL

WÉ BIBLË JAWUN: “Nda wokan Nasiën batsi nu wok ind.” (Jacques 4:8) Nda teena unu wi ndu mob wi, pa wul pëci unu win du juk wi Biblë di famil. (Genèse 18:19) Maa nda ka përo ulonko kak. Ko wi ndu ro wi ba rin, nda ka pëles Nasiën batsi. Pa familu pëmob Nasiën batsi uwar, ñakani ni bukul ulekaul “uler wi nda tsef wi di kato, uler wi ndu yandaar wi, uler wi ndu pints wi ni uler wi ndu natsee wi.” (Deutéronome 6:6, 7) Doon pi Josue, nan jai “inji ni bañaan kato inji, wund ka fets Jeuva.” — Josué 24:15.

KO WI M’PURIR WI PËRO:

  • Pa pëjukan familu, ratan ko un wara wi pa kara iñaan di famil.